Belgiya terma jamoasi Evro-2016ning «E» guruhida Irlandiya, Shvetsiya va Italiya termalariga qarshi bahs olib boradi. Jamoa dastlabki uchrashuvda italiyaliklarga ro'baro' keladi. Garchi bo'lajak uchrashuvdagi mag'lubiyat deyarli hech nimani hal qilmasada, terma jamoa bosh murabbiyi Mark Vilmots dastlabki uchrashuvdagi muvaffaqiyatga ishonmoqda. O'tgan hafta La Gazzetta dello Sport nashriga intervyu bergan Vilmots bo'lajak turnir haqidagi fikrlari bilan o'rtoqlashdi. - Belgiya FIFA reytingida etakchilardan biri. Bu holat bosim o'tkazyaptimi? - Reyting - matematik hisoblar natijasi. Shunday ekan, u hech qanday bosim o'tkaza olmaydi. Shunchaki, qanchalik yaxshi ishlaganimizni ko'rsatib turadi, xolos. - Jahon chempionatidan so'ng jamoangiz yana o'sdimi? - Belgiya yosh jamoa edi. Hozir ham shunday. Lekin tajribamiz biroz oshgan. Braziliyada Ganadan so'ng turnirning eng yosh jamoasi edik. Lekin buning unchalik ahamiyati yo'q, deb hisoblayman. Albatta, saralash davomida ayrim jihatlarga o'zgartirish kiritdik. - Jamoangiz endi aqllimi? - Endi ko'proq tajribaga egamiz, degan bo'lardim. Futbolchilar yosh bo'lishlariga qaramay, asabiylashishmayapti. Kristian Benteke va Kevin de Bryuyne kabi o'yinchilar uchun millionlab pullar sarflandi. Ularda o'z kuchlariga bo'lgan ishonch ortgan. Biz xotirjammiz. - Futbolchi sifatida yirik turnirlarda qatnashgansiz. Bu holat yordam beryaptimi? - Shubhasiz. Agar qiyinchiliklarga duch kelsangiz, bunday vaziyatlardan qanday chiqib ketishni bilasiz. Biz Frantsiyada shinam bazani izladik. Chunki jahon va Evropa chempionati kabi yirik turnirlarda mayda-chuyda narsalar ham muhim o'rin tutadi. - Siz qattiqqo'lmisiz yoki mulo­yim murabbiymisiz? - Bilmasam. Qattiqqo'l murabbiylarni sanang-chi. - Joze Mourino, Fabio Kapello. - Kim muloyim? - Karlo Anchelotti, masalan. - Kimning qanday murabbiy ekanligini bilish uchun uning jamoasiga nazar solish kerak. Qattiqqo'l emasman, ammo intizom tarafdoriman. Shuningdek, meni hurmat qilishlarini istayman. Terma jamoa - bir oila. Agar unda hurmat bo'lmasa, muammolar tug'ilaveradi. - Bir paytlari, imkon tug'ilsa, Italiya terma jamoasidan Marko Verrattini taklif qilishingizni aytgandingiz. U jarohat tufayli Belgiyaga qarshi uchrashuvni o'tkazib yuboradi. - Markoni Italiya terma jamoa­sining eng kuchli futbolchisi, demaganman. Uni eng funktsional, deganman. Verrattining himoyalanishi va hujumda ishtirok etishi juda yoqadi. Albatta, bu Italiya terma jamoasi uchun yo'qotish. Ammo bizning tarkibimizda ham jarohat olgan va charchagan o'yinchilar bor. Premer-liga futbolchilardan ko'p kuch oladi. Davomi InterFUTBOL gazetasi blogida
— deya xabar beradi uff.uz nashri.