O'zbekiston milliy terma jamoasi katta murabbiyi Ravshan Haydarov milliy terma jamoaning JCh-2018 saralashidagi raqibi hisoblangan Suriya terma jamoasining o'yinini kuzatish uchun Vetnamga boradi. O'zbekiston milliy terma jamoasining JCh-2018 saralashi guruh bosqichidagi raqibi – Suriya terma jamoasi 31 may kuni Xanoi shahrida Vetnam terma jamoasiga qarshi o'rtoqlik uchrashuvida maydonga tushadi. Mazkur o'yin Suriya terma jamoasi uchun saralash bahslaridan oldingi tayyorgarlik vazifasini o'tab beradi. Ta'kidlash joiz, mazkur o'yin O'zbekiston milliy terma jamoasi murabbiylar shtabida katta qiziqish uyg'otgan. Shu bois, milliy terma jamoa katta murabbiyi Ravshan Haydarov raqib o'yinini kuzatish va o'rganish uchun Vetnamga uchib ketgan. Mazkur safarda Haydarovga terma jamoa operatori Jamoliddin Solixov xamrohlik qiladi. Eslatib o'tamiz, O'zbekiston milliy terma jamoasi JCh-2018 saralashi "A" guruhi bahslarini 1 sentyabr kuni Toshkentda aynan Suriya terma jamoasiga qarshi o'yin bilan boshlaydi. Avvalroq xabar berilganidek, O'zbekiston milliy terma jamoasi JCh-2018 saralashiga tayyorgarlik jarayonida 2 iyun kuni Toshkentda Ekvatorial Gvineya terma jamoasiga qarshi o'rtoqlik uchrashuvida maydonga tushadi. Uchrashuv Toshkentdagi Bunyodkor stadionida bo'lib o'tadi.
— deya xabar beradi uff.uz nashri.