«Manchester Siti» yarim himoyachisi Samir Nasri zamonaviy futboldagi eng murosasiz yulduzlardan biridir. U tez-tez murabbiylar qolib, muxlislar bilan ham aytishib turishga odatlangan. Xususan, sobiq jamoasi - «Arsenal» fanatlari bilan munosabati yaxshi emas. Chunonchi, Samir 2011 yilning yozida London jamoasidan  Manchesterga ko'chib o'tgach, ular uchun sof g'animga aylangandi. Frantsiyalik futbolchi Goal.com saytiga intervyu berar ekan, shu noxush holatga ham to'xtalib, shimoliy Londondan faqat pul uchun ketmaganini yana bir bora alohida ta'kidladi. Ha, Samir Nasri muhabbat va nafrat orasi bir qadam ekanligini o'z tajribasidan yaxshi biladi. Zero, u «kanonirlar» fanatlarining chinakam yoqimtoyi edi va bittagina qarori bilan ularning mislsiz nafratlariga uchradi. Futbolchining aytishicha, sobiq muxlislarining yovqarashlari endilikda uning kulgusini qistayotgan ekan. To'g'ri, «Manchester Siti»ning amaldagi yarim himoyachisi «Emireyts»ni «Ittihod»ga almashtirgani hamono butun shimoliy London uchun bosh xiyonatchi bo'lib qolganini istehzo bilan tilga olsada, voqealarning bunday rivojidan sira xursand emas. Aytish joiz, londonliklar uni arab shayxlari pullariga uchganlikda ayblashadi. Samir esa klub almashtirish qarori birinchi navbatda, sovrin yutish orzusiga bog'liq bo'lganini takrorlashdan charchamaydi. E'tiborlisi, frantsiyalik «mittigina» yulduz «shaharliklar» safidagi ilk mavsumdayoq premer-liga chempionligiga erishib, maqsadiga etishgandi. Shunga qaramay, uning ko'ngli xijil, baribir. Ha, yana o'z o'rnida muxlislarning sovuq munosabatlari o'yiniga hech qanday ta'sir qilmasligini ham ishonch bilan ta'kidlaydi. «Manchester Siti» kuchliroq edi va shuning uchun uning safiga qo'shildim. Bunda ko'proq pul topishimni sira o'ylaganim yo'q, aksincha, shaxsiy ishtiyoqim, sovrinlarga ishtahamni qondirish uchungina shunday yo'l tutdim. — Odamlar xoh muxlis bo'lishsin, xoh yo'q  — bunday holatni to'g'ri qabul qilishlari, barchasini tushunishga harakat qilishlari kerak. Oddiy misol, har qanday mutaxassisni yirikroq kompaniyaga taklif etishsa va u o'zida  ishtiyoqni sezsa, albatta, u erga boradi. Ochiq aytaman, «Arsenal»ni aynan sodiq muxlislari borligi uchun ham qattiq sevganman. Chunonchi, ular jamoadan ketgunimcha meni go'yoki, qo'llarida ko'tarib yurishardi. Keyin hammasi birdaniga o'zgarib ketdi va bundan avvaliga ozgina siqildim. O'sha vaqt fanatlar oldiga chiqib, «Ey do'stlar, bu nimasi? Axir sizlarga qanday yomonlik qildim?» - deya baqirgim kelardi. Xullas, o'rtamizdagi muhabbatning nafrat bilan o'rin almashishi mutlaqo tushunarsiz holat...». Davomi InterFUTBOL gazetasi blogida
— deya xabar beradi uff.uz nashri.