Garri Keyn yaqin-yaqingacha «Lester» to'purari Jeymi Vardi bilan bitta zaxira o'rindig'ini isitib o'tirardi. Mana, u oxirgi ikki yil mobaynida «Tottenxem»ning  o'rinbosar futbolchisidan evro-arenadagi eng yaxshi hujumchilardan biriga aylandi. APLda yorqin taassurot qoldirgan Keyn endi Evro-2016ga jiddiy umid bog'lamoqda va Frantsiyada barchani hayratga solish niyatida. - Garri, Angliya milliy jamoasi o'yinini ilk marta qachon ko'rgansiz, uning tafsilotlarini eslay olasizmi? - Maykl Ouen Argentina termasi darvozasiga qanday gol urgani kechagiday yodimda. Aqlga sig'mas yurish — o'yinni kuzatib o'tirar ekanman, qachondir shunga o'xshash nimadir qilishni dilimga tugib qo'ygandim. Bu mening dastlabki xotiralarimdan biri. Lekin ungacha ham oilamiz davrasida yoki akam bilan terma jamoa o'yinlarini tomosha qilardim va biznikilar gol urishsa, behad quvonardim. Oddiy aytganda, doimo ashaddiy muxlis bo'lganman. - Bundan 2 yilcha oldin «shporlar» tarkibiga endi-endi kirishga urina boshlagandingiz. Aytingchi, o'sha payt terma jamoa bilan Evro-2016ga borishingizni tasavvur qila olarmidingiz? - O'zi doimo milliy jamoa tarkibidan joy olib, yirik turnirlarda qatnashishni o'ylaganman. Lekin deylik, 2 yil oldin bu men uchun deyarli imkonsiz ish sanalardi. Demakki, yanada qattiq va qalban ishlashga uringanman. Futbolning mohiyati ham shu - sen bor kuchingni sarflaysan va evaziga nimadir olasan. Mana, oxirgi 18 oyda natijalar ko'rina boshladi. Endi esa Evro-2016 startini sabrsizlik bilan kutyapman. Turnir men uchun ulkan voqelik hisoblanadi va umid qilamanki, Frantsiya maydonlarida ham iqtidorimni maksimal darajada namoyish etaman. - 2013 yil. Chempionship doirasidagi o'yin. «Lester» o'shanda «Barnsli»ga yutqazgandi - 0:2. Garri Keyn va Jeymi Vardi esa hattoki, maydonga tushishmagandi. Shundan buyon sizlar bosib o'tgan yo'lni tasavvur qilish ham qiyin. - Ha, vaqt to'xtamay va sezdirmay «uchyapti». Axir go'yoki, kechagina men va Jeymi bitta zaxira o'rindig'ini isitish bilan band edik. O'zaro ko'rishganimizda, o'sha damlarni eslashga imkon tug'ilgani yo'q, lekin endi Evropa chempionati payti bu haqda chaqchaqlashishga fursat topilsa kerak. Darhaqiqat, ko'p narsa o'zgarib ketdi. Deylik, Jeymi fantastik mavsumni o'tkazdi. Ko'ryapsizmi, futbolda ba'zan voqealar qanchalik tez o'zgaradi? Asosiysi, o'z kuchingiz va salohiyatingizga ishonishda davom etishingiz shart. Xullas, biz og'ir mehnat ertami-kech o'z samarasini berishini isbotladikki, bunday g'oyat xursandmiz. Demak, ozgina iqtidori bor futbolchi harakat qilsa, top-saviyada o'ynash darajasiga chiqadi, albatta. - O'tgan yili Chexiyada o'tkazilgan U-21 toifasidagi Evropa chempionatida qatnashdingiz. Turnirda orttirilgan tajriba nechog'li qo'l keldi? - Garchi natijamiz o'xshamagan bo'lsada, musobaqa juda katta foyda berdi. Misol uchun, biz har 3-4 kunda o'yin o'tkaziladigan turnirlarda barchasi qanday kechishini ko'rdik, tushundik. Oddiy aytganda, xalqaro musobaqa ruhini yaqqol his etdik. O'ylashimcha, bu o'ta muhim. To'g'ri, aslida Chexiyada natija ko'rsatishni ham ko'zlagandik, ammo tajriba to'plash bilan cheklandik. Endi shu tajriba Evro-2016da o'z so'zini aytishidan umidvorman. - Avvalgi mavsumda qayd etgan muvaffaqiyatlaringiz ham klub, ham mamlakat uchun yoqimli kutilmaganlik bo'ldi. Aytingchi, jamoatchilik e'tibori sezilarli oshgach, nima o'zgardi? - Bu safar barchasi mutlaqo boshqacha bo'ldi. Darhaqiqat, bir yilcha oldin men haqimda deyarli hech kim bilmasdi. Endi esa taniqli futbolchiman. Bas, shunday ekan, maydonda meni kuchliroq ta'qib etishlari tabiiy hol. Deylik, ba'zan raqibning 2 nafar himoyachisi tengdaniga qarshilik ko'rsatdi. Nachora, bunga ko'nikishdan o'zga yo'l yo'q. Binobarin, malakali hujumchilar har qanday vaziyatda gol urishni eplashadi. - Inglizlar har safar terma jamoadan katta natijalar kutishadi, talab qilishadi. Sizningcha, futbolchilar bunday bosimni engib o'ta oladilarmi? - Shubhasiz. Bosimga chidash - professional futbolchi zimmasidagi ishning bir qismi. Butun mamlakatning bizga musht tugib o'tirgani o'z-o'zidan tushunarli. Chindan ham, milliy jamoada o'ynash ruhiy tomonlama oson emas, ayniqsa, Angliyada. Lekin umumiy holatga chidashdan o'zga ilojimiz ham yo'q. - Ueyn Runi bilan uncha ko'p birga o'ynamagansiz. Sizningcha, u futbol maydonida yaxshi sherikmi? - Boshlang'ich tarkibda kimlar maydonga tushishini bosh murabbiy hal qiladi. Agarda u oldingi chiziqda men va Ueynga ishonch bildirsa, o'zaro tushunib, to'p suramiz, deb o'ylayman. Chunonchi, gap ajoyib futbolchi, jamoa sardori va etakchisi haqida bormoqda. Hozircha har bir mashg'ulot va o'yinda hammasi yuqori darajada o'tdiki, bu ham binoyidek tandem hosil qila olishimizga umid beradi. Davomi InterFUTBOL gazetasi blogida
— deya xabar beradi uff.uz nashri.