Samvel Babayan bosh murabbiyligidagi O'zbekiston milliy terma jamoasi Ekvatorial Gvineya hamda Kanadaga qarshi o'yinlar oldidan Toshkentda navbatdagi yig'inini boshladi.
Avvalroq xabar berilganidek, terma jamoa bosh murabbiyi mazkur yig'inga xorijda to'p surayotgan milliy terma jamoa futbolchilarini chaqirmagan. Murabbiylar shtabi, Odil Ahmedov ("Krasnodar", Rossiya), Vitaliy Denisov ("Lokomotiv", Rossiya) hamda Aziz Haydarov ("Ash Shabob", BAA) hamda Sardor Rashidov ("Al Jaish", Qatar)ga kichik ta'til berishga qaror qilgan. Milliy terma jamoa bosh murabbiyi Samvel Babayan mazkur yig'inga taklif etgan futbolchilar haqida avvalroq xabar berilgan edi.
Ekvatorial Gvineya hamda Kanadaga qarshi o'yinlarda Samvel Babayan terma jamoa tarkibida hali maydonga tushmagan bir qator yangi futbolchilarni sinovdan o'tkazishni maqsad qilgan.
Eslatib o'tamiz, O'zbekiston milliy terma jamoasi 2 iyun kuni Toshkentda Ekvatorial Gvineya terma jamoasiga qarshi maydonga tushsa, 7 iyun kuni Avstriyadagi yig'in davomida Kanada milliy terma jamoasiga qarshi o'rtoqlik uchrashuvini o'tkazadi.
O'zbekiston milliy terma jamoasining Toshkentdagi yig'inidan fotosuratlarni saytning "Galereya" bo'limida tomosha qilish mumkin.
— deya xabar beradi uff.uz nashri.