Xalqimizda ajoyib maqollar ko'p. Misol uchun, «10ga kirding - songa kirding» matali ham ma'noga to'la. Mana, oliy ligada aynan 10-tur o'yinlari bo'lib o'tdi. Autsayder jamoaning g'alaba qozonishi har turda ham kuzatilavermaydi. Amaldagi chempionning o'z maydonida o'rtamiyona raqibdan engilishi, boz ustiga, son jihatidan ustunlikka erishgan holda, maydonni boshini egib tark etishi ham noyob hodisa. Ayniqsa, bizning elit ligamiz uchun. Shuningdek, etakchi jamoalarning ochko yo'qotishlari... Xullas, shu kriteriyalar bo'yicha o'lchasak, chempionatning 10-turi darhaqiqat, muxlislarbop bo'ldi.  Zero, tur doirasida autsayderning g'alabasi ham, gigantlar to'qnashuvi ham, nihoyat, amaldagi chempionning «sensatsion» mag'lubiyati ham ro'y berdi. DEBOChA YuTUQ «Obod» nihoyat, oliy ligadagi ilk g'alabasini tantana qildi. Musobaqa debyutantiga buning uchun oz emas, ko'p emas - naq 10ta o'yin kerak bo'ldi. «Obodchilar»ning 10-turga qadar ketma-ket 5ta o'yinni boy berishganini inobatga olsak, «So'g'diyona»ga qarshi bahs natijasi ular uchun qay darajada muhim ekanligini tasavvur qilish qiyin emas. Ammo intiq kutilgan g'alaba «Obod»ga musobaqa jadvali so'nggi qatorini tark etish imkonini bermadi, baribir. Ammo  yuqoridagilar bilan oradagi ochkolar farqi qisqargani ham katta gap. O'tgan hafta shuningdek, «Olmaliq» ham o'z maydonida g'alaba nashidasini surdi. Igor Shkvirin jamoasi «Mash'al»ni qabul qildi va yagona gol hisobiga o'rtadagi 3 ochkoni o'z tomoniga og'dirdi. Poytaxt viloyati vakillari ushbu g'alabadan so'ng turnir jadvalida birdaniga 3 pog'ona yuqorilashdi. Ya'ni «Andijon», «Navbahor» va «So'g'diyo­na»dan oldinga o'tishdi. «Buxoro» esa kutilganidek, o'z uyida «Navbahor»dan 3 ochko tortib olib, «Paxtakor» o'zib ketdi va «Qizilqum» bilan tenglashdi. Buxorodagi o'yinda yana «anshlag» bo'lganini ham aytish o'rinli. Muhimi, jamoa a'zolari muxlislarning ayni faolliklari qadriga etishyapti va imkon qadar tomoshabop futbol ko'rsatish harakatidalar. TUR «SENSATsIYa»SI 10-turning eng kutilmagan natijasi shubhasiz, poytaxtda qayd etildi. «Paxtakor»-«Neftchi» o'yini bir vaqtlar futbolimizda o'ziga xos klassika sanalardi. Ammo bunga ancha bo'ldi - kamida 14-15 yil. Mana, «sherlar» va vodiyliklar o'rtasidagi oxirgi to'qnashuv muxlislarning o'sha ajoyib damlarni birrov esga olishlarini taqozo etdi. Statistikaga qarasak. «Neftchi» Toshkent­da oxirgi marta 2001 yili g'alaba qozongan ekan. Shundan so'ng Farg'ona jamoasi uchun omadsiz davr boshlandi. Nihoyat, oradan 15 yil o'tgach, «Neftchi» poytaxtda «Paxtakor»dan yana ustun keldi. Yana qanday tarzda, deng? Mehmonlar uchrashuvning 20-daqiqasidayoq maydonda bir kishi kam bo'lib qolishdi - Alisher Samatov «qizil» olib, jamoadoshlarini qiyin ahvolda qoldirgandek bo'ldi. Ammo bu chetlatish farg'onaliklar o'yinida umuman sezilgani yo'q va hisob ham aynan «Neftchi» tomonidan ochildi. Mansur Saidovning ajoyib uzatmasidan so'ng Murod Bobojonov to'pni darvozaga shunchaki, «yumalatib» yubordi. Muhimi, ikkinchi bo'limda maydonga Jaloliddin Masharipov tushirilgach, «Paxtakor» muvozanatni tiklagan bo'lsa-da, «Neftchi» iroda ko'rsatishda davom etdi. Jamoaning ikkinchi goli muallifi - Otabek Isroilov. E'tiborni tortadigan jihati, bu safar ham golga aynan Mansur Saidov assistentlik qildi. Ha, «Paxtakor»ga nimadir bo'lyapti yoki nimadir etishmayapti. Endi shu «nimadir» tagiga etish kerak tezroq. Aks holda... «ANDIJON» ALAMI Turning yana bir kutilmagan natijasi Andijonda kuzatildi. Umuman, «Andijon»  Baxtiyor Ashurmatov qo'l ostida ham bir tekis o'yin namoyish etolmayapti. Deylik, jamoa ortda qolgan o'yinlarda yirik hisobli mag'lubiyatni ham, xuddi shunday g'alabani ham ko'rib ulgurdi. Eng alamli va xunuk mag'lubiyatga esa 5-turda «Buxoro» maydonida duch kelgandi. Esingizda bo'lsa, Ashurmatov jamoasi o'sha uchrashuvda o'z darvozasidan 5 marta to'p olib chiqqan va bunga atigi 2ta gol bilan javob bergandi. Ammo o'sha mag'lubiyat ham andijonlik muxlislarda 10-turda qayd etilgani kabi alam uyg'otmagandir. To'g'ri, hisob u qadar yirik ko'rinish olgani yo'q, ammo «Andijon» uchun «Sho'rtan»ga 1:3 ko'rinishida boy berilgan o'yin yana-da alamli bo'lishi turgan gap. Chunki jamoaning o'z maydonida yutqazishi har doim og'riq uyg'otadi. Endi shu mag'lubiyat autsayderdan qabul qilinsa, og'riqning  ikki hissa kuchayishi muqarrar. MARKAZIY O'YINDA MUVOZANAT Turning markaziy o'yini shubhasiz, Qarshida bo'lib o'tdi. Unda «Bun­yodkor»ni qabul qilgan «Nasaf» g'alaba qozonish uddasidan chiqqanida, chempionlik poygasida o'z mavqeini nisbatan yaxshilab olardi. Boisi, qarshiliklar o'tgan tur «Metallurg»ga 0:1 hisobida yutqazishgach, turnir jadvalida aynan «Bunyodkor» va «Lokomotiv»dan 3 ochko ortda qolishayotgandi. Shunday ekan, musobaqa jadvalidagi bevosita raqibga qarshi o'yinning katta ahamiyat kasb etishi aniq. O'z navbatida, «Bunyodkor» uchun ham natijaning ahamiyati aslo kam emasdi. Zero, «qaldirg'ochlar» bu yil oliy ligada nihoyat, yana raqobatbardosh kuchdek ko'rinmoqdalar. «Bun­yodkor» shu hozirgi sur'ati va shashtini saqlab qolish uchun ham  Qarshidan yaxshi natija bilan qaytishi shart edi. Har ikki jamoa g'alabani ko'zlagan muhim o'yinda murosa ko'chasi tanlanganini ko'p ko'rganmiz. Bu safar ham shunday bo'ldi va tomonlar bir ochkodan olishdi. Ushbu durang «qaldirg'ochlar» uchun mavsumdagi ikkinchisidir. Yodingizda bo'lsa, jamoa 3-turda «Mash'al»ga qarshi kechgan o'yinda hisobni ochish uddasidan chiqolmagandi. Xullas, markaziy o'yinda «Lokomotiv»ni mutlaqo qoniqtiradigan natija qayd etildi. KUChLI TO'RTLIK UChUN KURASh Navoiyda «Qizilqum» va «Metallurg» o'rtasida kechgan o'yin ham ko'pchilik kutmagan hisob bilan xotima topdi - 1:1. Umuman, musobaqa jadvalida yonma-yon borayotgan jamoalarning o'zaro kurashi har doim qiziqarli ko'rinish oladi. «Metallurg» 10-tur oldidan 4-o'rinni egallab turgan, «Qizilqum» esa uning ortida edi. Boz ustiga, jamoalarni atigi 2 ochko ajratib turgandi. Shu sababli, maydonda keskin kurash borishi kutilgandi. Yakunda o'yin muxlislar kutgandek qiziqarli tus oldi - jangovar 1:1 hisobi fikrimizga dalolat.  TUR QAHRAMONI - MANSUR SAIDOV «Neftchi» nihoyat, uzoq yillik noxush an'anaga barham berdi va «Paxtakor»ni safarda mag'lub etdi. Bu o'yinda gollarni Murod Bobojonov va Otabek Isroilov urishdi, ammo chin qahramon sifatida Mansur Saidovni ko'rsatishga qaror qildik. Zero, faxriy yarim himoyachi har ikki gol hammuallifi bo'ldi. To'g'ri, uni bosh qahramon o'laroq tanlashimiz sababi faqat shu emas. Jamoa sardori butun vaqt davomida haqiqiy etakchilarga xos harakatlandi. U hujumda ham, himoyada ham birdek faollik ko'rsatib, maydonda eng ko'p ter to'kkan futbolchilardan bo'ldi. Boz ustiga, farg'onaliklar agar Saidov yaratgan vaziyatlardan unumliroq foydalanishganidami, hisob yirikroq ko'rinish olishi muqarrar edi. Shu sababli ham, e'tiborni aynan Mansur Saidovga qaratdik. TUR ISTE'FOSI - NO''MON HASANOV «Paxtakor»-«Neftchi» o'yini natijasi o'z navbatida, toshkentliklar boshqaruviga ham ta'sir o'tkazdi. «Paxtakor» bu yil barqarorlikdan ancha yiroq va mavsum  hali yarmiga etmay turib, chempionlik kurashidan chiqib ulgurgandek. Jamoaning 10ta o'yindan faqat 4tasida g'alaba qozonib, 3 martadan durang va  mag'lubiyat qayd etgani barchasini aytib turibdi. Boz ustiga, «sherlar» oliy ligadagi so'nggi 2ta tur o'yinini boy berishgani etmagandek, kubok turnirida «Buxoro»ga qarshi o'tkazilgan ikki uchrashuvda ham bir xil - 0:1 hisobida engilib, kurashdan chiqib ketishdi. Tabiiyki ketma-ket 4ta o'yinda yutqazgan jamoada qandaydir o'zgarish qilish kerak edi va klub rahbariyati bosh murabbiyni iste'foga chiqarishni lozim topdi. Xullas, salbiy natijalar sabab, No''mon Hasanov vazifasidan ozod qilindi. Davomi InterFUTBOL gazetasi blogida.
— deya xabar beradi uff.uz nashri.