Kecha “Sport” telekanalidagi "FIFA" ko'rsatuvida boshlovchi Dilshod To'xtabekov “Nasaf” va “Bunyodkor” jamoalari o'yini sharhidan so'ng shunday muhim o'yin bo'lishiga qaramasdan, stadionda muxlislar soni kamchilikni tashkil etganini aytib o'tdi.
Darhaqiqat, bundan bir-ikki yil avval xuddi shu o'yin bo'lganida, stadion liq to'lgan bo'lardi. Xo'sh, vohalik muxlislarni futboldan bezdirayotigan narsa nima? Nima uchun ularning “Markaziy” o'yingohga tashrifi borgan sari kamayib bormoqda? Balki boshlovchi aytganidek ular ham poytaxtlik muxlislardan shunchaki o'rnak olishmoqdami? Yoki futbolga qiziqish susayib borayotgandir? Chipta narxi-chi?
Xullas, bu mavzu atrofida son-sanoqsiz savollarni qalashtirib tashlash va ularga javob izlash mumkin.
Lekin oddiy muxlis sifatida mening nazarimda ishqibozlarni stadiondan bezdirayotgan narsa umuman boshqa tomonda.
Bilasizmi, printsipal uchrashuvlar bo'layotgan vaqtlarda stadionga kirish haqiqiy muammoning o'ziga aylanadi. Chipta haqida gap-so'z bo'lishi mumkin emas. Agar o'z vaqtida harakat qilsangiz, har qanday uchrashuvning chiptasini “Markaziy” stadion kassalaridan topishingiz ham, o'z narxida sotib olishingiz ham mumkin. Lekin muxlislarni zada qilayotgan narsa bu chiptalarning vaqti kelib hech narsaga yaramay qolayotganidir. O'n-o'n besh ming so'mga chipta sotib olib ham, stadionga kira olmasdan uyga qaytib kelishingiz hech gap emas. Bu narsa o'zimning ham bir necha marotaba boshimdan o'tmoqda. Ayniqsa, OChLdagi o'yinlarda chiptaning oddiy qog'ozdan farqi bo'lmay qolishi ehtimoli juda katta.
Hayronman, o'yindan bir soat oldin o'yingohning darvozalariga qulf uriladi. Ikki ming odam qo'lida chipta bilan dodini istaganiga aytib yugurmaydimi, hech kim tinglamaydi. Darvoza ichkarisidagi IIB xodimlari esa kalit ularda emasligini aytib turaverishadi. Buyoqqa qarasangiz, kassadagi chiptalar sotuvi hali ham tuxtagani yo'q. Shuncha odam qo'lida chipta bilan tashqarida o'tirsa, joy qanday qilib to'lib qoladi? Axir chiptalar o'rindiqlarga moslab chiqariladi-ku! Unga joyingiz ko'rga hassadek qilib ko'rsatib qo'yilgan bo'lsa... Xullas, tushunish qiyin.
Eng alam qiladigani, biroz ertaroq kelib, “o'yingoh”ga kirib olish baxtiga muyassar bo'lgan tanishlaringiz stadionning to'lmaganini aytib chiqishadi. Mana bunisini endi umuman tushunish qiyin.
So'ngi ikki yilda “Markaziy” stadionga kirish uchun xavfsizlik talablari ancha kuchaytirilgan. IIB xodimlarining bu ishni bekamu-kust bajarayotganini qadrlash kerakdir, biroq  muxlis ozgina erkinlikni istashi ham bor gap.
Masalan, o'yingohga kirish uchun dastlab ikki yuz metr beridan (Viloyat Ipoteka banki ro'parasidan) “post” o'rnatilgan bo'ladi. Bu erda engilgina nazoratdan o'tganingizdan so'ng (muhim o'yinlar vaqtida esa bu erdan o'tish ham oson emas) stadionga qarab yo'lga tushasiz. O'yingohga chamasi 50 metrlar qolganida yana bir “post”gu duch kelasiz. Bu anchayin muhim post bo'lib, u erdagi IIB xodimlari ham sidqidildan ishlashadi. Bu erda nafaqat chiptalaringiz, balki kiyim-boshingiz, cho'ntaklaringiz birma-bir paypaslab ko'rilganidan so'nggina ichkariga o'tishingiz mumkin. Agar bordi-yu, cho'ntagingizga smechka degandek narsalar olgan bo'lsangiz, darhol odamlar ichida elkangizdan sudrab chiqib, to'kib tashlashingizni talab qilishadi. Ayniqsa, yoshi kattaroq muxlislar uchun bunday nazoratlardan o'tib yurish yana ham qiyin.
O'rni kelganda yana bir jihatni ham aytib o'tish lozimki, “Markaziy” stadionga borgunga qadar 200 metr beridan boshlab qatorasiga smechka sotuvchilar. Negadir ularning bu ishiga qarshilik ko'rsatishmaydi, ammo semechkani ichkariga olib kirishingizga yo'l qo'yishmaydi.
Ehtimol o'yingohning ozodaligi masalasida qilinayotgan bu ishni ham  qadrlash kerakdir. Lekin shuni deb muxlislarni stadiondan bezdirish shartmikan? Axir muxlis o'yinga dam olish uchun boradi.  Hamma o'yinlar ham birdek qiziqarli kechavermagach, smechka chaqib vaqt o'tkazsa nimasi yomon? Bor-yo'g'i yuzta chiptaning pulini to'rtta farroshga maosh qilib berishsa, o'yingohni yog' tushsa yalagudek qilib bermaydimi? Yozning qoq chillasida suv olib kirishni taqiqlashlarini esa qanday tushunish kerak?
Mayli, yana mavzuga qaytamiz. Xullas, ikkinchi “post”dan ham o'tib, 10 qadam tashlashingiz bilan stadion hovlisidagi darvozaga duch kelasiz. Bu erda esa chiptangiz, cho'ntaklaringiz yana bir nazoratdan o'tgach, ichkariga shoshilasiz. Endigi duch keladigangiz o'yingohning panjara darvozalari va yana o'z xizmat vazifasini bajarayotgan mas'ul xodimlari. Baxtga qarshi darvoza ochiq bo'lsa, militsiya xodimlarining nazorati va stadion ishchilarining chiptangiz girdini yirtib berishidan so'ng ichkariga yo'l olishingiz mumkin. Bordi-yu, biroz kechikkan bo'lsangiz, bu darvozadan bunisiga, undan keyingisiga qarab yuguravering, dodingizni hech kim tinglamaydi. Qo'lingizda chipta, o'yin boshlanishiga yarim soat vaqt bor, siz esa asabingiz tarang, uyga qaytasiz.
Xo'sh, mana shunday qiyinchiliklar bilan stadionga kirishni hamma muxlislar ham istashadimi? Og'rimagan boshimni og'ritib nima qilaman, deydiganlar qancha? Qolaversa, bizning xalqimiz uchun boshingizda kimningdir nazorat qilib, qarab o'tirishi ham og'ir botadi.
Ikki kun avval Evropa Chempionlar ligasi finalini miriqib tomosha qildik. O'yindan ko'ra stadiondagi muhit qalbimizni ko'proq to'lqinlantirdi. U erda ham xavfsizlik uchun javobgar xodimlar ko'zga tashlandi, ammo o'z o'rnida va biznikichalik ko'p emas.  Bir jihatdan xavfsizlik uchun talablarning kuchaytirilgani yaxshi. Qolaversa, ayni davrda bu narsaga yuzaki qarab bo'lmaydi. Ammo Qarshi shahridagi bozorlar, boshqa maydonlar kun bo'yi odamlar bilan gavjum va bu erda sizni hech kim tekshirib o'tirmaydi.  Shunday ekan, stadionda ham biroz erkinlik qilish kerakmasmi?. Jahongir, Qarshi shahri
— deya xabar beradi uff.uz nashri.