28 yoshida «Xoffenxaym» klubi boshqaruvini qabul qilgan Yulian Nagelsmann Championat.com ijodkorlarini izlanishga da'vat etdi. Shu tariqa yakunlangan mavsum «ko'hna qit'a»da ishlagan eng yosh va iqtidorli murabbiylar haqida alohida maqola yozildi. Keling, endi yosh, lekin tadbirli mutaxassislar bilan tanishib chiqaylik. Avval ham aytilgandi, 28 yoshli Yulian shu yilning 11 fevral kuni «Xoffenxaym» bosh­qaruvini qo'lga olib, Evropaning etakchi ligalarida faoliyat yuritayotgan eng yosh mutaxassisga aylandi. Albatta, yosh murabbiy uchun o'z jamoasini kuchlilar safida olib qolish oson bo'lmadi. Lekin shuni unutmaslik kerakki, Nagelsmann ish boshlagan payt «Xoffenxaym» autsayderlar qatorida edi. Kris O~ Laflin - 37 yosh Shimoliy irlandiyalik yosh mutaxassis Belgiyaning «Sent-Tryuyden» jamoasi bosh ustozligiga o'tgan yilning sentyabrida tayinlandi. O'shanda chempionatning 6-turi ortda qolgandi. O~Laflin 2 yil davomida Yannik Ferreraga assistentlik qilgach, keyinchalik uning o'rnini egalladi. Umuman olganda, taniqli futbolchi darajasiga ko'tarilolmagan, o'z yurtida «Kliftonvin» hamda «Larn» kabi jamoalar sharafini himoya etish bilan cheklangan Kris murabbiylik sohasiga o'zining yoshlik davri o'tgan JARda qadam tashladi. 2007 yili «Orlando Payrets» klubida yordamchi murabbiy vazifasini bajardi, keyin Kongoning «Vita»sini mustaqil boshqardi. Muhimi, yosh mutaxassis «Sent-Tryuyden»­da qoniqarli faoliyat yuritib, jamoani elitaga qaytardi va  u yakunlangan mavsum ham chakki taassurot qoldirmadi. Jimmi Telin - 37 yosh Shvetsiyalik yosh murabbiyga ham jamoa bilan birga o'z nufuzini ko'tarib olish nasib etdi. 2014 yili «Yonchyoping»ni qabul qilgan Jimmi keyingi mavsumdayoq uni ikkinchi liga g'olibiga aylantirib, elitaga olib chiqdi. Qizig'i, kuchlilar safida  to'p surish uning o'ziga nasib etmagandi. Yanada e'tiborlisi, Telin klubda Shvetsiya terma jamoasining sobiq futbolchisi Mats Gren o'rnini egalladi. Eng qizig'i, «Yonchyoping»ning 32 yoshli sardori Tommi Telin - Jemmining ukasi. Xullas, jamoa o'ziga xos oilaviy pudrat rahbarligida to'p surmoqda. Igor Tudor - 37 yosh Evropalik yosh murabbiylar orasida aynan xorvatiyalik Tudor futbolchi sifatida ko'proq shuhrat qozongan. U «Yuventus»da 100 martadan ko'proq, Xorvatiya terma jamoasi tarkibida esa 55 marta maydonga tushgan. Igor futbolchilik faoliyatini jonajon klubi - «Xayduk»da yakunladi. Yana 5 yil o'tgach esa, jamoa boshqaruvini qo'lga oldi. Bir yildan so'ng Tudor shogirdlari mamlakat kubogini qo'lga kiritishdi. 2015 yilga kelib, uni PAOK­ning rossiyalik sohibi Ivan Savvidi o'z jamoasiga taklif etdi. Asosiysi, yosh mutaxassis Yunonistonda ham o'z g'oyalarini amalga tatbiq etishni uddaladi. Harqalay, PAOK mavsum davomida yorqin o'yinlari bilan ajralib turdi. To'g'ri, Tudor jamoasi EL guruh bosqichida 3-pog'ona bilan cheklandi, lekin uning «Borussiya» D. va «Krasnodar» kabi raqiblarga imkon darajasida qarshilik ko'rsatganini ham aytish joiz. Goran Sablich - 36 yosh 8 yillik umrini Kievning «Dinamo»siga baxshida qilgan xorvatiyalik yana bir himoyachi - Goran Sablich o'z vatanida «Split»ga ustozlik qilmoqda. Yangi murabbiyning debyutini qoniqarli baholash mumkin. Uning o'tmishdoshi - Zoran Vulich 11ta uchrashuvda atigi 15 ochkoni ta'minlagandi. Savich davrida esa natijalar keskin yaxshilandi. Muhimi, «Split» Xorvatiya chempionatida etakchilar qatoriga qo'shildi. Yosh mutaxassis ijobiy o'zgarishlardan tashqari, sobiq jamoadoshi Artyom Milevskiyni kun tartibiga rioya qilmagani uchun jamoadan chetlatgani bilan ham e'tiborga tushdi. Yakob Mikelsen - 35 yosh Daniyalik yosh mutaxassis ham xuddi Joze Mourino kabi professional futbolchi maqomiga ega bo'lmagan. Biroq 14 yoshidan (!) 10 yoshli bolakaylarga o'z maktabida ustozlik qila boshlagan. Shu tariqa Yakob maktabdagi o'qishni murabbiylik amaliyoti bilan birgalikda olib bordi. 2007 yili 27 yoshli mutaxassis «Skovbakken» ayollar jamoasi boshqaruvini qabul qildi. Oradan yana 2 yil o'tgach, uni erkaklar jamoasiga o'tkazishdi. 2012 yili yosh mutaxassis faoliyatida kutilmagan o'zgarish yuz berdi - uni Tanzaniya o'smirlar terma jamoasiga taklif etishdi. Bir yildan keyin Mikelsen vataniga qaytdi. Nihoyat, 2015 yilning yozida uning azaliy orzusi ro'yobga chiqdi. Daniya oliy ligasi a'zosi - «Syonneryyusk» Yakobga  bosh murabbiylik lavozimini topshirdi. Avvalgi mavsum 10-pog'onani band etgan jamoa uning rahbarligida hattoki, chempionlik uchun jiddiy kurash olib bordi. Demak, daniyalik yosh ustozning ishlari chakki emas. Robbi Nilson - 35 yosh «Xarts» hozirda o'zining sobiq himoyachisi - Robbi Nilson rahbarligida o'ynamoqda. Robbi 1999-2009 yillarda shu jamoa sharafini himoya qilib, 200 martadan ko'proq maydonga tushgan. U 2014 yili mutasaddilar taklifiga rozilik bildirib, ikkinchi ligaga tushib ketgan jamoada murabbiylik qila boshladi. Xullas, «Xarts» Nilson etakchiligida ligada g'olib chiqib, yana elitaga qaytdi. Natijada Robbi  mamlakatning eng yaxshi murabbiyi maqomiga da'vogarlik qildi. Mana, uning jamoasi Shotlandiya PLda ham muvaffaqiyatli ishtirok etib, faqatgina «Seltik» hamda «Aberdin»dan orqada joylashdi. Davomi InterFUTBOL gazetasi blogida
— deya xabar beradi uff.uz nashri.