2016 yilning 3 iyun kuni O'zbekiston Milliy olimpiya qo'mitasi tashabbusi bilan an'anaviy tarzda o'tkazib kelinadigan “Olimpiya kuni” sport bayrami tashkil etiladi.
Avvalo shuni ta'kidlash joizki, “Olimpiya kuni” dunyoda eng ommaviy tarzda nishonlanadigan sport bayramlaridan biri hisoblanib, har yili Xalqaro olimpiya qo'mitasiga a'zo 206 davlatda o'tkaziladi. Tadbirni o'tkazishdan ko'zlangan asosiy maqsad – aholi orasida sog'lom turmush tarzini hamda olimpizm g'oyalarini keng targ'ib etish, katta-yu, kichik qalbida jismoniy tarbiya va sportga bo'lgan mexrni yanada yuksaltirishdan iboratdir.
O'zbekiston Milliy olimpiya qo'mitasi 25 yildirki Xalqaro olimpiya qo'mitasi tashabbusini qo'llab – quvvatlagan xolda, mamlakatimizda “Olimpiya kuni”ni keng nishonlab kelyapti. Bu kun tadbir ishtirokchilari o'zlarini xaqiqiy olimpiyachi sifatida his etish imkoniyatiga ega bo'ladilar.
O'zbekiston Milliy olimpiya qo'mitasi hududida o'tkazilagan musobaqalar 21 ta (yosh) guruhda o'tkazilib, 5 yosh va undan katta bo'lgan ishtirokchilar turli masofalarga (50 metrdan – 1609 metrgacha) yugurish bo'yicha bahs yuritadilar.
Bundan tashqari “Olimpiya kuni” ishtirokchilari sportning boks, taekvondo (WTF), dzyudo, velosport, stol tennisi, engil atletika va kamondan otish turlari bo'yicha o'z imkoniyatlarini sinovdan o'tkazadilar.
“Olimpiya kuni”ning barcha ishtirokchilari (jamoalar murabbiylari, vakillari, hakamlar va musobaqa tashkilotchilari) Xalqaro Olimpiya qo'mitasining sertifikatlari bilan taqdirlandilar.
“Olimpiya kuni”ning tantanali ochilish marosimi O'zbekiston Milliy olimpiya qo'mitasida soat 8:30da boshlanadi.
Ma'lumot uchun. Bu yilgi “Olimpiya kuni” sport bayramining marafon bahslarida Respublika OAVlari xodimlari o'rtasida alohida musobaqa o'tkaziladi. Mazkur musobaqada qatnashish niyatida bo'lgan ijodkorlar o'zlari haqidagi ma'lumotlarni 2 iyun kuni soat 15:00ga qadar 244-41-41 telefoni orqali ro'yxatga kiritishlari mumkin.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.