Yakunlangan mavsum o'z ligalari taxtidan joy olishgan «Lester», «Barselona» va boshqa g'oliblar chempionlik sharafiga qanday bayram uyushtirishdi? Albatta, g'alaba barcha joyda ko'tarinki ruhda nishonlanadi, lekin uzoq kutilgan (yoki kutilmagan) va mashaqqat bilan qo'lga kiritilgan oltin medal o'zgacha shavq ulashadi-da, baribir. Mana, «Lester»ning chempionlik bayramiga deyarli butun shahar yig'ildi, Chexiya ligasida tengsiz bo'lgan «Viktoriya»ning baxtiyor fanatlariga esa bepul ichimlik tarqatildi. Umuman, barcha baxtli oilalar bir-biriga o'xshash bo'lishini klassikadan bilamiz. Futbol oilalarida ham xuddi shunday. Biroq har kim g'alabani turlicha nishonlaydi. Demak, quyida evrofutbol yakuniga nazar solib, joylarda oltin medal sohiblari qanday bayram qilishganini ko'rib chiqamiz. APLning «sensatsion» g'olibi -  «Lester» chempionlik paradiga 16 may kuni chiqdi. Klaudio Raneri jamoasi o'rin olgan avtobus shaharning markaziy ko'chalari bo'ylab harakatlanib, mag'rur futbolchilar va klub xodimlarini  Viktoriya xiyoboniga olib bordi. U erda g'oliblar uchun maxsus sahna tayyorlab qo'yilgandi. Keyin ulkan ekranda mavsumning eng yorqin lahzalari va dono  Ranerining eng sara so'zlari yozilgan videolavhalar namoyish etildi. Tadbirga Brinatiyaning mashhur rok-guruhi - Kasabian (uning a'zolari aynan  Lesterdan) musiqiy ma'no olib kirdi. Xabar berilishicha, bayramda chamasi 250 ming kishi qatnashgan. Vaholanki, Lester shahri aholisi atigi 337 ming kishiga teng. Demak, yosh bolalar va qariyalarni hisobga olmasak, jamoa zafar onlarida butun shahar nafasini yaqqol his etgan. Kataloniya poytaxti esa 15 may kuni sevimli «Barselona»sining Ispaniya chempionatidagi navbatdagi g'alabasini nishonladi. Aytish joiz, Luis Enrike jamoasi chempionlikni so'nggi turda rasmiylashtirgani boismi, bu safargi shodiyonalar o'zgachalik kasb etdi. Minglab odamlar klub rangiga muvofiq kiyingan holda, ko'chalarga otildilar va «Barselona»ning chempionlik avtobusi sayrini olqishlar ostida kuzatdilar. «Ko'k-anorranglilar» futbolchilari shunga yarasha, avtobusning yuqori qavatida tinmay qo'shiq kuylashdi, raqs tushishdi,  muxlislar esa ularni suratga olishdan charchashmadi. Tabiiyki, ular o'z «nishon»larini asosan Messi, Suares va Neymarga to'g'rilashdi. Umuman, shahar bo'ylab tantanavor sayr chamasi 2 soat davom etdi. Aynan o'sha kuni Germaniyada «Bavariya» ham chempionlik xursandchiligini o'z muxlislari bilan baham ko'rdi. Voqea joyi - Myunxenning markaziy maydoni  Marienplatsga odam sig'may qoldi. Futbolchilar, bosh murabbiy Xosep Gvardiola va ularning oila a'zolari shahar hokimiyati binosi ayvoniga chiqib, muxlislar olomoniga samimiy salom yo'llashdi va umumolqishlar ostida chempionlik tovog'ini namoyish etishdi. Eng qizig'i, bundesliga g'oliblari bayram dasturi doirasida raqs maydonida ham miriqib ko'ngilxushlik qilishdi. Ularni Amerikaning One Republic guruhi o'z chiqishlari bilan qizg'in qutladi. «Yuventus» 14 may kuni «Sampdoriya»ni mag'lubiyatga uchratgach, navbatdagi chempionlik sharafiga maydonning o'zida katta bayram uyushtirdi va uni kiyinish xonasida davom ettirdi. O'yin yakuniga etgach, tribunalar hayqirig'i ostida jamoaga chempionlik kubogi topshirildi va shundan so'ng futbolchilar zafarga bag'ishlangan maxsus qo'shiqni jo'r holda kuylab berishdi. Keyinchalik bayram «Yuventus»ning Vinovodagi mashg'ulotlar bazasiga ko'chdi. U erda  Massimiliano Allegri jamoasi tiffozilar qurshovida chinakamiga yayradi. «PSJ» chempionlik oqshomi uchun «Park de Prens» stadionini ma'qul ko'rdi. Ya'ni Frantsiya chempionati oxirgi tur o'yinidan so'ng ancha oldin naqd qilingan oltin medalni muxlislar bilan to'lib-toshgan qadrdon arenasida «yuvdi». Avvaliga Loran Blan shogirdlari maxsus bezatilgan saqnaga ko'tarilishdi va chempionga atalgan sovrinni qabul qilib olishdi. Shundan keyin esa muxlislarga yuzlanib, mavsumning eng hayajonli lahzalarini ular bilan birga boshdan o'tkazishdi. Aytgancha, «PSJ» bayram bahonasida o'sha kuni birinchi raqamli yulduzi - shvetsiyalik hujumchi Zlatan Ibragimovich bilan ham tantanali tarzda xayrlashdi. U jamoadan erkin agent maqomida ketadigan bo'ldi. Davomi InterFUTBOL gazetasi blogida
— deya xabar beradi uff.uz nashri.