Yodingizda bo'lsa, ushbu darvozabon 2011 yilgi futbol mavsumida Qarshining «Nasaf» jamoasi tarkibida OFK kubogi sohibiga aylangandi. Bugungi kunda o'z vatani - Ukrainada istiqomat qilayotgan Kozachenko o'ziga yangi jamoa izlayapti. Ushbu mamlakat ikkinchi divizioni vakili «Energiya» hozircha Dmitriyning so'nggi jamoasi bo'lib turibdi. Undan avvalgi mavsumlarda esa Lu-ganskning «Zarya», «Nikolaev» klublari sharafini himoya qilgandi. Biz mahoratli posbon bilan bog'lanib, O'zbekistondagi faoliyati, hozirda nima bilan shug'ullanayotgani, umuman, futboldagi hayoti haqida suhbatlashdik. - Dima, bugungi kunda nimalar bilan bandsiz? - Avvalo, siz orqali O'zbekistonda meni tanigan barchaga, «Nasaf» muxlislari, sobiq jamoadoshlarim, klub rahbariyatiga salom yo'llamoqchiman. O'zbekiston, xususan, Qarshidan ajoyib taassurotlar qolgan. Mehmondo'st xalqingizni aslo unutmayman. Yana O'zbekistonga qaytishni xohlayman. Bilmadim, bu istak amalga osharmikan? Hozircha hech qaerda o'ynamayapman, o'zimga yangi klub izlayapman. So'nggi jamoam Ukraina 2-ligasi vakili «Energiya» bo'lib turibdi. - Futbolchilik faoliyatini yakunlash va murabbiylikka o'tish haqida o'ylamayapsizmi? - Aslo yo'q. Endigina 34 yoshga to'ldim. Menimcha, darvozabonlar uchun bu ayni gullagan davr. Takliflar bor, ularni o'rganib chiqib, bir qarorga kelaman. Yuqorida aytganimdek, O'zbekistonga bajonidil qaytgan bo'lardim. - Lekin buning iloji yo'q. Chunki bizda legioner darvozabonlarga cheklov qo'yilgan. «Nasaf»da ko'proq kim bilan do'stlashgan edingiz? - Hamma bilan munosabatim yaxshi bo'lgan. Ayniqsa, ampluadoshim Eldor Suyunov hamda jamoa etakchilaridan biri Artur Gevorkyan bilan juda yaqin edik. - «Nasaf»ga qanday kelib qolgandingiz? - Viktor Kumikov taklif qilgandi. O'zbekiston shaharlari, ayniqsa, Toshkent va Qarshi menda juda iliq taassurot qoldirgan. 2011 yilgi mavsum butun faoliyatimni bezaydi, desam xato bo'lmas. «Nasaf» safida OFK kubogini qo'lga kiritdim. O'zbekiston chempionatida bronza medaliga ega chiqdik. Taniqli mutaxassis Anatoliy Demyanenko qo'l ostida o'ynaganimni unuta olmayman. Bir so'z bilan aytganda, «Nasaf» va butun o'zbek futbolidan minnatdorman. - O'zbekistonlik darvozabonlar haqida qanday taassurotlar qolgan? - Kuzatuvlarim asosida O'zbekiston chempionatida iste'dodli posbonlar juda ko'p ekaniga amin bo'ldim. Ayniqsa, Eldor Suyunov, Ignatiy Nesterov va Murod Zuhurovni alohida ta'kidlashim mumkin. Shuningdek, «Paxtakor»da ham tajribali darvozabonlar bor edi. Ular bilan internet tarmog'i orqali gaplashib turamiz. - «Nasaf»ni nega tark etgandingiz? - Mavsum yakunlangach, Luganskning «Zarya» jamoasidan taklif tushgandi. Bu jamoaning Ukraina premer-ligasida ishtirok etayotgani diqqatimni tortgandi. Qolaversa, vatanimni sog'ingandim. «Nasaf» klubi rahbariyati va futbolchilar bilan do'stona xayrlashdik. Mavridi kelganda, qarshilik fidoyi muxlislarga o'z salomimni yo'llamoqchiman. - OFK kubogi siz uchun qanday ahamiyat kasb etgan? - Faoliyatimdagi hozircha yagonaligini saqlab turgan sovrinni aynan «Nasaf» tarkibida qo'lga kiritganman. Bu yutuq menga qanchalik qadrli bo'lsa, O'zbekiston futboli uchun ham shunchalik muhim hisoblanadi. O'z navbatida, chempionat bronza medallarini qo'lga kiritganim ham juda ahamiyatli. Davomi interfutbol.uz saytida
— deya xabar beradi uff.uz nashri.