Yoz fasli ham kirib keldi. Hademay issiq kunlar boshlanadi. Har bir faslning o'ziga yarasha gashti. Ayniqsa, yozda tabiat barcha in'omlaridan baxramand bo'ladi. Sport olamida yoz faslining o'zgacha o'rni bor. Sababi, unda dunyo darajasida musobaqalar bo'ladi.
Ha, yana sakkiz kundan keyin Frantsiya davlatida futbol bo'yicha Evropa chempionati start oladi. Hozircha, mazkur katta futbol forumining asl mohiyatini tushinib etkanimizcha yo'q. Hademay uning salahiyati butun dunyoda ko'z-ko'z qilinadi. Mana shunda oldimizga nachog'lik qiziqarli va ulkan musobaqa turganini his qila boshlaymiz.
Evropaga kechadan ushbu ob-havo kirib keldi. Rosa bir oy mobaynida biz ham evrofutbol atmosferasi bilan yashaymiz. Endi futbolga qiziqmagan oshnangiz ham futbolga qiziqadigan do'stingiz bilan bo'layotgan suhbatni indamasdan eshitadi. U erdagi gollarni, terma jamoalarni va yulduzlarning xatti-harakatlarini maroq bilan tinglaydi. Boshqacha bo'lishi mumkin emas. Evro-2016 barchani birdek o'ziga mahliyo qila oladi.
Biz ham saytimizda bugundan Evro-2016 bilan bog'liq turkum maqolarni berishni boshlaymiz. Zero, hamma narsaning o'z vaqti bor, deganlaridek bunga ham etib keldik.
Dastlab, o'yinlar qaysi shaharlarda va stadionlarda o'tishi haqida ma'lumot beramiz. Qolgan ma'lumotlar ham sekin-asta berib boriladi.
Demak, futbol o'yinlari Frantsiyaning 10ta shahrida bo'lib o'tadi. Mazkur qarorga tashkiliy qo'miga mezbon davlat aniqlanganda kelgandi. 10ta shaharning 10ta stadionida barcha uchrashuvlar o'tadi. O'yinlarning soni 51ta bo'ladi. Bu yilgi musobaqada - yangi formatga ko'ra, 24ta terma jamoa ishtirok etadi.
Quyida shaharlar, stadionlar va unga sig'adigan muxlislar soni bilan tanishib olishingiz mumkin.
1  "Alyants Rivera" stadioni, Nitstsa shahri, 35 624ta muxlis sig'adi
2  "Velodrom" stadioni, Marsel shahri, 67 394ta muxlis sig'adi
3  "Jeffrua-Gishar" stadioni, Sent-Eten shahri, 42 000ta muxlis sig'adi
4  "Matmut-Atlantik" stadioni, Bordo shahri, 43 000ta muxlis sig'adi
5  "Munisipal" stadioni, Tuluza shahri 35 472ta muxlis sig'adi
6  "Park de Prens" stadioni, Parij shahri, 48 713ta muxlis sig'adi
7  "Per-Morua" stadioni, Vilnyov-d'Ask shahri, 50 186ta muxlis sig'adi
8   "Stad de Lyumer" stadioni, Lion shahri, 59 500ta muxlis sig'adi
9   "Stad de Frans" stadioni, Sen-Deni shahri, 80 000ta muxlis sig'adi
10 "Feliks Bolar" stadioni, Lans shahri, 41 233ta muxlis sig'adi. Har bir stadionga hali alohida to'xtalib o'tamiz.
Darvoqe, UFF.uz sayti ham ushbu musobaqaga boshqacha tayyorgarlik ko'rmoqda. Hatto kichik syurprizimiz ham bor. U haqida keyinroq ma'lumot beramiz.
Saytimizdan yiroqlashmang, eng qiziq endi boshlanadi... A.Akbarov
— deya xabar beradi uff.uz nashri.