Jahon futbolida katta mablag'larning ahamiyati yuqoriligi inkor etib bo'lmas haqiqatga aylangan. Yaqinlashib kelayotgan yoz faslida ham grand klublarning «yulduzlar ovi»ga chiqishlari ehtimoli yuqori. Bu borada futbolchilarning Evro-2016dagi ishtiroklari e'tiborga olinadi. Bugun esa ko'hna qit'adagi badavlat jamoalar diqqatini allaqachon o'ziga tortishga ulgurganlar haqida so'z yuritamiz. Quyida nomi keltiriladigan o'yinchilarning yozda top-klublar safini to'ldirishlari deyarli aniq bo'lgan. Pol Pogba, «Yuventus» Aksariyat futbol ixlosmandlarining fikri yakdil: Neymar va Pogba Ispaniya grandlari safida o'zlarini ko'rsatib, sayyoramizning eng yaxshi futbolchilari nomiga da'vogarlik qilishlari lozim. Evro-2016 23 yoshli frantsuzga o'zini ko'rsatish uchun ajoyib imkoniyat tuhfa etadi, vaholanki, u shundoq ham buyuk jamoalar oromini o'g'irlashga ulgurgan. Turinliklar o'z yulduzlarini joriy yil yozida sotmoqchi emaslar, ammo bunday qaysarliklar «Barselona», «Chelsi» yoki «Manchester Siti» singari klublarni aslo xavotirlantirmaydi. Shunchaki, jahon miqyosida rekord o'rnatadigan to'lov orqali «Yuventus»ni ko'ndirish kifoya. Har qanday jamoa markazi Pol bilan kuchayishi tayin. «Manchester Yunayted» qachonlardir shunday iqtidorni arzimagan pulga sotib yuborganidan achinayotgan bo'lsa, ajabmas. Xaridorlar: «Manchester Siti», «Chelsi», «Barselona», «Manchester Yunayted» Jon Stounz, «Everton» Yosh himoyachi murakkab mavsum yakunlangach, bemalol engil tin olishi mumkin. To'g'ri, uning o'yinidagi kichik pasayish xaridorlar sonini biroz kamaytirdi. Binobarin, Jon vaziyatni o'zgartirishga astoydil intilgan. Sheriklari orasida ham futbol, ham jismoniy nuqtai nazardan kuchli o'yinchilarning yo'qligi uning o'z sifatlarini to'laligicha namoyon etishiga to'sqinlik qildi. Ushbu muammoni esa har qaysi top-klubda yo'qotish mumkin. «Chelsi» bir yil avval transfer borasida deyarli kelishib olgandi, ammo yakunda bitim tuzilmadi. Ochig'ini aytganda, Stounzni APLning deyarli barcha kuchli klublari o'z saflarida ko'rishni xohlashmoqda, biroq hozircha eng badavlat uchlik bilan kifoyalanamiz. Xaridorlar: «Manchester Siti», «Chelsi», «Manchester Yunayted» N~golo Kante, «Lester» 25 yoshli futbolchi yuksaladiganlar ro'yxatida pesh­qadamdek ko'rinmoqda. Birinchidan, jahon futbolida yuksak darajadagi tayanch yarim himoyachilar soni tobora kamaymoqda. Shunday ekan, 20-25 million Kante uchun arzirli summa, maydon markazida «o'yin buzuvchilar»ga ehtiyoj sezayotgan top-jamoalar bu fikrimizga qo'shilishsa, ajabmas. Bunday futbolchi butun boshli o'rta chiziqdagi o'yin shaklini o'zgartirib yuborishga qodir. Hattoki, Riyod Mahrezga bo'layotgan qiziqish N~Gologa bo'layotgan qiziqish oldida hech narsa emasdek, go'yo. Xaridorlar: «Arsenal», «Manchester Yunayted», «PSJ» Per-Emerik Obameyang, «Borussiya» D. Hozir 26 yoshli forvardning ayni gullagan davri. Joriy mavsumdagi 29 o'yinda 25ta gol - hujumchini top-to'purarga aylantirishi mumkin bo'lgan ajoyib ko'rsatkich. Obameyang nafaqat hujumlarni sifatli yakunlashi, balki joyini tez o'zgartira olishi bilan ham har qanday klubning oldingi chizig'ini jonlantirishi aniq. «Borussiya» maydalashmoqchi emas, muzokaralarni 60 million dollar bilan boshlamoqchi. Dortmundliklar qulay takliflar tushgan paytda o'z etakchilarini ushlab turishga o'rganishmagan. Matts Xummelsning printsipial raqib - Myunxenning «Bavariya»siga sotilishi bu fikrni isbotlashi mumkin. Ammo Per-Emerikning holatida oxirigacha qat'iyatliroq bo'lish talab etiladi. Xaridorlar: «Arsenal», «Manchester Yunayted», «Barselona», «Real» Romelu Lukaku, «Everton» O'z safida grandlar diqqatini tortgan futbolchilarni jamlagan «iriskalar»ning joriy mavsumdagi muvaffaqiyatsizliklarini izohlash qiyin. Aksariyat futbolchilar imkoniyatlari darajasida ishtirok etolmadilar, ammo buning uchun hech kim belgiyalik hujumchini ayblamasa kerak. Romelu 22 yoshda, shunday ekan, 32 o'yinda 18ta gol urishi ajoyib ko'rsatkich. Uning jismoniy kuchi va bardoshliligi himoyachilarga ko'plab noqulayliklar tug'diradi, ammo sayyoramizning kuchli klublariga qarshi bahslarda muntazam ravishda golli vaziyatlarni yarata oladimi? Top-klublar bu masalaga oydinlik kiritishmoqchi, zero «Chelsi»da Lukakuning o'zini ko'rsatishi uchun imkoniyat taqdim etishmadi. Xaridorlar: «Manchester Yunayted», «Chelsi», «Tottenxem» Zlatan Ibragimovich, «PSJ» Shvetsiyalik hujumchi bugungi ro'yxatimizdan tushib qolishi ham mumkin edi, chunki u erkin agent sifatida qaerga borishni o'zi hal qiladi. Evropadagi eng maqbul ikkita variant - «Milan» va «Manchester Yunayted». Italiyada o'ziga yarasha g'ovga duch kelishi aniq, zero «rossoneri» Ibraning maoshini to'lay olmasligi mumkin. «MYu»da esa Lui van Gal bilan ishlay olmasligini aytgandi, golland ketdi. Mabodo «Old Trafford»da Joze Mourino ishlasa, shved birinchi reys bilanoq Angliyaga uchishi aniq. Xaridorlar: «Manchester Yunayted», «Milan» Granit Jaka, «Borussiya» M. Shveytsariyalik yarim himoyachi o'z kuchini APLda sinab ko'rish niyati borligini yashirmadi, uning serqirra iqtidori esa tumanli o'lka top-klublaridan birining e'tiborini tortishi ehtimoldan xoli emas. «Liverpul» unga qiziqib ko'rdi: mabodo Ilkay Gyundogan transferi o'xshamasa, «qizillar» «Borussiya»ning bosh-qa vakili bilan muzokara o'tkazishlari mumkin. Da'vogarlar orasiga «Arsenal»ni ham qo'shsak bo'laveradi, faqat «to'pchilar» hozircha aniq taklif bilan chiqishmagan. Jakaning o'zi Evro-2016 boshlanguniga qadar qaerda o'ynashiga aniqlik kiritish niyatida, shunday ekan, tez orada uning transferi borasida o'zgarishlar kuzatilsa aslo ajablanmaymiz. Xaridorlar: «Liverpul», «Arsenal» Riyod Mahrez, «Lester» Futbolchilar Assotsiatsiyasi tomonidan yil futbolchisi nomiga loyiq ko'rilgan Mahrez Angliya chempionatiga o'zgacha joziba baxsh etganlardan biri. Jazoirlik endigina 24 yoshga to'ldi, u top-klublarga qarshi ajoyib o'yin ko'rsatdi. Shu bois, badavlat jamoalar Riyodni sotib olish orqali hujumdagi salohiyatlarini ochishlari mumkinligiga shubha qilishmayapti. «Lester», tabiiyki, hujumkor yarim himoyachini saqlab qolishga intiladi. Shunchaki, xaridorlarning takliflari jiddiyligiga qarab vaziyat o'zgarishi mumkin. Xaridorlar: «Arsenal», «Manchester Siti», «PSJ» Davomi InterFUTBOL gazetasi blogida.
— deya xabar beradi uff.uz nashri.