Mamlakat kubogining nimchorak finalidan o'rin olgan “Qo'qon-1912” va “Navbahor” jamoalari o'rtasidagi uchrashuvda "lochinlar" sardori Xayrullo Karimov qizil kartochka olib maydonni tark etgandi. Bugun PFL rasmiy sayti tartib-intizom qo'mitasining navbatdagi yig'ilish qarorini e'lon qildi. Unga ko'ra, Xayrullo Karimov ikkita o'yinga diskvalifikatsiya qilindi va jarimaga tortildi. Karimov “Buxoro” bilan o'tgan uchrashuvda maydonga tushmagandi. Demak,  “Navbahor” sardori Oliy Liga 11-turida Qarshining “Nasaf” jamoasi bilan o'tadigan bahsda ham ishtirok eta olmaydi. Karimov 12-turda maydonga qaytish imkoniga ega bo'ladi. Yoshlar birinchiligining 10-turidan o'rin olgan “Buxoro” – “Navbahor” jamoalari o'rtasidagi uchrashuv chog'ida yoshlar jamoasi murabbiyi Durbek Umaraliev zaxira o'rindig'idan chetlatilgandi. Hakamga e'tiroz bildirgani sababli muxlislar safidan joy olishga majbur bo'lgan Umaraliev ogohlantirilib, jarimaga tortildi. TIQ qarorida agarda shunga o'xshash holat takrorlanadigan bo'lsa yanada keskin jazo choralari ko'rilishi ko'rsatib o'tilgan.
— deya xabar beradi uff.uz nashri.