40 yoshida ham professional darajada to'p surib, o'zbek futbolida o'ziga yarasha iz qoldirgan Abdumajid Toirov bugungi kunda murabbiylik faoliyatini olib boryapti. Metin himoyachi sifatida tanilgan Toirov futbolchilik faoliyatini bundan roppa-rosa 20 yil avval, aniqrog'i, 1996 yili Termizning ASK klubida boshlagan. Besh yil davomida «Surxon» sharafini himoya qilgan futbolchi 2000 yili Farg'onaning «Neftchi» jamoasi safini to'ldiradi. Uning yulduzli onlari aynan vodiyda o'tgan. Olti yil mobaynida Farg'ona klubida o'ynagan himoyachi keyinchalik «To'palang», «Quruvchi», «Olmaliq», «Xorazm», «Andijon», «Navbahor» jamoalari sharafini himoya qildi. «Neftchi» tarkibida bir bor mamlakat chempioni bo'ldi, to'rt marta O'zbekiston kubogi finalida o'ynadi, lekin bu sovrinni yutish unga nasib qilmadi. Yaqin o'tmishning tajribali himoyachisi, mana ikkinchi yildirki, murabbiylik faoliyatini olib boryapti. Biz Abdumajid akadan bugungi faoliyati xususida intervyu oldik. - Murabbiylik faoliyatingiz qanday boshlandi? Futbolchilik davringizdanoq shunga tayyorgarlik ko'rib borganmidingiz yoki... - Murabbiy sifatida ish boshlaganimga bir yildan oshdi. Albatta, futbol o'ynab yurgan kezlarimda, bir kun kelib murabbiy bo'laman, deb o'z oldimga maqsad qo'ygandim. Faoliyatimning so'nggi yillarida o'zimni shunga tayyorlab bordim. Ko'z tegmasin, hozircha hammasi ko'ngildagidek ketyapti. - Murabbiylik siz o'ylaganchalik qiyin ekanmi? Chunki futbolchilik davrida bu kasb mashaqqatlari sizga bilinmagan bo'lishi mumkin. Endilikda murabbiylarga oson emasligini tushunib etayotgandirsiz? - Ha, dastlab o'zimni biroz noqulay sezdim. Sababi, har doim murabbiy qarshisida turishga o'rganib qolgandim. Endi esa, aksincha, futbolchilar ro'parasida turibman. Shuningdek, ularga to'g'ri futbol o'ynashni o'rgatishim kerak. Vaqt o'tgani sayin bu yangi olamga ko'nikib boryapman. Bilasizmi, agar qilayotgan ishingiz o'zingizga ma'qul kelsa, undan qaysidir ma'noda qoniqish hosil qilsangiz, har qanday qiyinchiliklar bilinmaydi. To'g'ri, ish oson emas. Lekin mashg'ulotlar chog'ida jarayonga shunchalik kirishib ketasizki, boshqa narsalar, ba'zi muammolarni tamomila unutasiz. Xuddi atrofda siz va futbolchilardan boshqa hech narsa yo'qdek tuyuladi. - Bugungi kunda «Bunyodkor» klubida ishlayapsiz. Taklif qachon va kim tomonidan bo'ldi? Bu siz uchun kutilmagan chorlovmidi? - Futbolchilik faoliyatimni yakunlaganimdan so'ng ma'lum muddat o'zim uchun jonajon bo'lib qolgan «Neftchi» jamoasi o'rinbosarlariga murabbiylik qildim. Keyinroq Sergey Lushan bilan bog'lanib, «Bunyodkor»ga ishga olishini so'radim. Oilam Toshkentda bo'lgani uchun shunday yo'l tutdim. Sergey Ivanovich yo'q demadi va o'shandan beri «Bunyodkor»da ishlab kelyapman. Bugungi kunda «Bunyodkor-2» murabbiyiman. Afsuski, hozir 2-ligada qatnashyapmiz, bizga 1-divizionda joy berishmadi. - Ikkinchi liganing holati, ya'ni saviyasi qanday? - Bilasizmi, aslida, jamoamizni 1-ligaga tayyorlagan edik. Shuning uchun ham 2-divizion bizga qiziq emas. O'zingiz o'ylab ko'ring, ba'zi jamoalarning o'z maydoni ham yo'q. Bunday holatda qanday saviya haqida gapirish mumkin? Davomi Interfutbol.uz saytida
— deya xabar beradi uff.uz nashri.