Andijon shahrining Bo'ston dahasida joylashgan viloyat  BO'FMda Bolalarni himoya qilish kuni munosabati bilan musobaqa tashkil etildi. Musobaqada muassasada tarbiyalanayotgan 2005-2006 yillarda tug'ilgan yosh futbolchilardan iborat 12ta  jamoa ishtirok etdi.
Futbol maktabi “Andijon PFK” qoshida tashkil etilganligi bois, uchrashuvlarni klub mutasaddi va futbolchilari ham kuzatib bordilar. Bahslar davomida tarbiyalanuvchilar ichida ko'plab iqtidorlar kashf qilindi, desam mubolag'a bo'lmasa kerak. Ayniqsa, musobaqaning eng zo'r o'yinchilari deb topilgan Shohjahon Yorqinboev va Muhammadqodir Rustamovlarning harakatlari mutaxassislarda juda iliq taassurot qoldirdi.
Musobaqaning final o'yinida Muhammadrasul To'htasinov va Muhammadjon Yusupov murabbiyligida shug'ullanuvchi ikki jamoa to'qnashib, birinchi murabbiy shogirdlari 2:0 hisobida g'alaba qozondilar.
Tantanali tadbirda ishtirokchilarni “Andijon PFK” rahbari Ma'rufjon Abdusalomov, viloyat “Yoshlik” jismoniy tarbiya va sport jamiyati mutasaddisi O'tkirbek Toshpo'latov, O'zbekistonda xizmat ko'rsatgan murabbiy Iskandar Galiulin va muassasa direktori Bekzodbek Karimovlar bayram bilan tabriklab, musobaqa g'olib va sovrindorlariga fahriy yorliq va estalik sovg'alari topshirdilar. Taniqli futbolchimiz Vagiz Galiulinning otasi fahriy murabbiy Iskandar Galilulin musobaqaning eng yaxshi hujumchisiga farzandining shaxsiy sovg'asini topshirdi. “Andijon” klubi futbolchilari Davron Tursunov Ibrohim Otaxonov va Farhod Bekmuratovlar boshqa nominatsiyalarda o'zini ko'rsatgan o'yinchilarga sovg'alar ulashishdi.   
- Bayram munosabati bilan tashkil etilgan musobaqada ko'plab iqtidorlar voyaga etayotganiga guvoh bo'ldik, - deydi BO'FM direktori Bekzodbek Karimov. Bolajonlarning “Andijon” klubida to'p suruvchi mahoratli futbolchilar bilan uchrashib, ulardan sovg'a olishlari haqiqiy bayram tuhfasi bo'ldi.   Elmurod ERMATOV, Andijon      
— deya xabar beradi uff.uz nashri.