Oliy Liganing 11-turida "Obod" mehmonda "Mash'al"ga qarshi to'p suradi. Ayni paytda toshkentliklar ushbu o'yinga qizg'in ravishda tayyorgarlik ko'rmoqda. Mazkur o'yinga tayyorgarlik xususida "Obod" hujumchisi Alisher Azizov UFF.uz internet portaliga o'z fikrlarini bildirib o'tdi.
- "Mash'al"ga qarshi har doimgidek tayyorgarlik ko'rmoqdamiz. Oliy ligada yuzaga kelgan kichik tanaffusdan foydalangan holda bu o'yinga ancha barvaqt tayyorgarlikni boshladik. Bu o'yinga qadar jarohatda bo'lgan futbolchilarimiz safga qaytishlari mumkin. O'ylaymanki, jamoamiz "Mash'al"ga qarshi optimal formada bo'ladi.
- "Mash'al" haqida qanday fikrdasiz?
- Bu jamoa doimo yaxshi o'yin ko'rsatib keladi. Negadir, bu mavsumda jamoaning ishlari birdek kechmayapti. Shunga qaramay, "Mash'al" haqiqiy professional ekanligini unutmasligimiz lozim. Aytish kerakki, bu jamoaga ham, bizga ham ochko juda zarur. Deyarli yonma-yon turganligimiz hisobga olganda, uchrashuv juda qiziqarli kechadi.
- "So'g'diyona" ustidan qozonilgan g'alaba "Obod"ni qanchalik kuchaytirdi?
- Bilasizmi, "Obod" mavsumni yomon o'tkazmayapti. Biroq bizga g'alaba etishmayotgandi. "So'g'diyona"ni mag'lub qilganimiz ishonchimizni ancha oshirdi. Shu g'alabani uzoq vaqt kutdik. Endi kelgusi o'yinlarda biroz engilroq bo'lishini taxmin qilmoqdaman.

— deya xabar beradi uff.uz nashri.