Bahreynda bo'lib o'tayotgan yoshlar o'rtasidagi Osiyo chempionati, D guruhi so'nggi turida O'zbekiston va Xitoy yoshlar terma jamoalari o'rtasida kechadigan uchrashuvda maydonga tushadigan tarkiblar ma'lum bo'ldi.
Ushbu sahifa orqali uchrashuv tafsilotlari bilan tanishib borishingiz mumkin. Uchrashuv Toshkent vaqti bilan soat 21.30 da boshlanishi belgilab qo'yilgan.
U-19 Osiyo chempionati
D guruhi, 3-tur
O'zbekiston U-19 - Xitoy U-19 - 0:0 (tugadi)
O'zbekiston U-19: 12.Umidjon Ergashev, 2.Aziz Suyunov, 5.Xushnud Avilov,  7.Sanjar Qodirqulov, 8.Saidjamol Davlatov, 10.Suxrob Nurilloev, 13.Javohir Esonqulov, 16.Jamshid Yusupov, 20.Xusniddin G'ofurov, 22.Begzod G'anijonov, 23.Nurillo To'xtasinov
Xitoy U-19: 22.Shi Ksiadong, 5.Xuang Chuang, 7.Jang Xongjiang, 9.Vu Vey, 10.Jang Yuan, 14.Gao Xuaje, 15.Yao Daogang, 17.Yang Liu, 18.Xu Jingxang, 19.Kao Xongjing, 20.Xuang Jengyu.
1'. O'yin boshlandi. Eslatib o'tamiz, bugungi uchrashuvning guruhdagi holatga hech qanday ta'siri yo'q. O'zbekiston allaqachon birinchi o'rinni egallashga ulgurgan, Xitoy esa dod desa ham, voy desa ham endi guruhdan chiqa olmaydi.
4'. O'yin tempi u qadar baland emas. Jasur Abduraimov shogirdlari hujum tashkil qilishmoqda, ammo shiddat ko'zga tashlanmayapti.
7'. Xitoy burchak to'pini xavfli amalga oshirdi. To'p qaytarildi, ammo jarima maydonchamizdagi kichik sarosima bizga yoqmayapti. Balki bunga tarkibdagi o'zgarishlar sababdir? Shunday bo'lsa yangi futbolchilar tezda o'yinga kirishib ketishiga umid qilamiz.
9'. Xitoydan yana bir xavfli hujum va undan keyin yana burchak to'pi tepildi. Bu safar haytovur himoya ishonchliroq o'ynadi.
12'. Bizda hech qanday o'zgarish yo'q, maydonda teng kurash. Guruhdagi narigi uchrashuvda ham shunday vaziyat, Tojikiston va Avstraliya o'yinida hozircha - 0:0.
15'. Dastlabki xavfli zarba Xitoy tomonidan berildi. 14-raqamdagi Gao uzoqdan u qadar kuchli emas, ammo xavfli zarba yo'lladi. Darvozabon o'z o'rnida.
20'. Hech kimga ochko kerak bo'lmagan o'yin mana shunaqa zerikarli o'tarkan. Bu o'yin Jasur Abduraimovga ham yoqmayapti shekilli, shogirdlariga qattiq-qattiq gapirib tashladi.
25'. Xafa bo'lmanglaru, lekin O'zbekiston yoshlar terma jamoasining bugungi o'yini O'zbekiston milliy terma jamoasiga o'xshab ketyapti. Mujmal o'yin bilan biroz zeriktirib qo'yishdi shovvozlar...
28'. Bo'larkanu mana! Hujumda ish o'xshamagandi, darvozabon o'yinni biroz qizdirdi. Umidjon Ergashev to'pni qo'ldan chiqarib yubordi, ammo xitoylik hujumchi shu erda ham to'g'ri zarba yo'llay olmadi.
31'. Xuang Chuang (sof xitoycha ism) uzoqdan ajoyib zarba yo'lladi va Umidjon Hamroev to'pni qaytarib qoldi.
32'. Bugun nafaqat hujum, himoyada ham o'yin qovushmayapti. Yang Liu deyarli birga bir vaziyatga chiqib, gol urish uchun ajoyib imkoniyatga ega bo'ldi. Ammo o'zi aybdor, tepgan to'pi yuqoridan ketdi.
37'. O'zbekistonning birinchi zarbasi aynan shu daqiqada, jarimadan yo'llandi. Saidjamol Davlatjonovning zarbasini Shi Ksiadong qaytardi.
39'. Xitoy o'zi omadsiz jamoa ekan. Yang Liu deyarli ochiq qolgan darvozaga gol ura olmagandan keyin, yana nima deyish mumkin?
42'. Jasur Abduraimov shogirdlaridan to'pni ushlab turish va pas orqali o'yin tashkil etishni talab qilyapti. Lekin o'xshamayaptida shunaqa o'yin!
45+1. Birinchi bo'lim 0:0 hisobida tugadi. Kutamiz, ikkinchi bo'limda biror o'zgarish bo'lib qolar. Ma'lumot uchun: Tojikiston va Avstraliya o'yinida ham hisob ochilgani yo'q.
46'. Ikkinchi bo'lim boshlandi.
53'. Saidjamol Davlatjonov raqib jarima maydonchasi ichida himoyachini bir necha bor aldadi va oxiri o'z harakatiga o'zi ham aldanib qoldi.
57'. Gao Yong Jing qulay vaziyatda darvozamiz tomon zarba yo'lladi, biroq bundan qulayroq vaziyatlarda bo'lmagan gol shu safar bo'larmidi? Bunisi ham qiyshiq ketdi.
65'. Sanjar Qodirqulov maydon markazi bo'ylab oldinga o'tib bordi va zarba yo'lladi. Ammo zarba ham kuchsiz, ham qiyshiq chiqdi.
67'. Xitoy ancha uzoq masofadan jarima zarbasi yo'lladi va bunisi ham avvalgilari singari samarasiz yakuniga etdi.
73'. Uzoq kutilgan o'zgarish biroz kutilmagan bo'ldi. Nima uchundir eng faol o'yinchilardan biri - Sanjar Qodirqulov zaxiraga olindi va uning o'rniga Mahmudxojiev tushirildi.
79'. Marhamat, har ikki tomondan "qovun tushirishlar"dan iborat "manzirat" - himoyada Esonqulov qo'pol xatoga yo'l qo'yib, to'pni yolg'iz qolgan Gao Xuajega o'tkazib yubordi. Xuaje esa to'pni hatto to'xtata olmadi ham...
85'. O'yinda barqarorlik. Ya'ni, uchrashuv barqaror tarzda zerikarli kechmoqda. Mabodo biror tanishingiz uni ko'rmay qolgan bo'lsa, Oliy ligadagi biror o'yinni misol keltirib, tushuntirib berarsiz...
88'. Guruhdagi narigi o'yinda ham hisob xuddi shunday - 0:0. Lekin u erda bizdagidan farqli o'laroq keskin kurash kechyapti shekilli, Avstraliyadan bir o'yinchi 81-daqiqada qizil kartochka olib, maydondan chetlatilgan. Yon qo'shnimiz Tojikiston guruhdan ikkinchi o'rin bilan chiqishga juda yaqin turibdi.
90+2. Umidjon Ergashev jamoamizni mag'lubiyatdan qutqarib qoldi. Darvozabon xavfli zarbani bartaraf etdi.
90+3. Bo'ldi, o'yin tugadi. Biz chorak finaldamiz, Xitoy esa uyiga golsiz, ammo bir ochko bilan qaytadi. Hammaga rahmat, Fut.uz'dan uzoqlashmang...
— deya xabar beradi uff.uz nashri.