Hozirda «Man. Siti» sharafini himoya qilayotgan Kevin de Bryuyne zamonaviy futbolning yorqin yulduzlaridan. Uning bu darajaga ko'tarilish yo'lidagi mashaqqatlari, faoliyati keng yoritilmagan. Xorijlik kasbdoshimizning quyidagi maqolasi ana shu bo'shliqni to'ldiradi, degan umiddamiz. Mavsum ancha xavotirli boshlandi. Kevin Belgiya terma jamoasi bilan Bokuga yo'l olgan bo'lsada, maydonga tushmadi. «Sen mashg'ulotlarda tez charchab qolyapsan, yuzlaring qizarib ketyapti», - degandi o'shanda terma jamoada ikkinchi murabbiy vazifasini ado etayotgan Mark Vilmots. Keyinchalik «Genk» safidagi o'yinlardan birida Kevinning oyoq tomirlari tortishib, qaltiroq bosdi. U maydonni barvaqt tark etishga majbur bo'ldi. Tahlillar uning qonida mononukleoz virusi borligini ko'rsatdi. Aynan shu kuni yosh futbolchi Angliyadagi buvisi vafot etganligi to'g'risidagi xabardan voqif bo'ldi. Shu bois, Kevin dafn marosimini o'tkazish uchun tumanli o'lkaga uchib, 3 haftadan ke-yin Belgiyaga qaytdi. Ikki oylik tig'iz muolajalardan so'ng nihoyat, u safga qaytdi. Mavsum yakunida, «Bryugge»ga qarshi bahsda tom ma'nodagi «nokaut» holatiga tushdi. Birdaniga boshida qattiq og'riq sezib, hech narsani idrok etolmay qoldi. Muxlislarning maydonga yugurib tushishgani, darvozabon Tibo Kurtua murabbiy Verkauterenni shampan sharobiga cho'miltirgani, himoyachi Nadson Braziliya bayrog'iga burkanib olgani haqida keyinchalik amakivachchasi Kareldan eshitdi. Kuchli miya chayqalishi Kevinning xotirasidan «Genk»ning chempionlik shodiyonalarini butunlay o'chirib tashlagandi. Kevinning onasi - Ann Kalan Afrikada tug'ilib, Angliyada ulg'aygan, Flandriyada Ervich de Bryuynega turmushga chiqqandi. Kalanning otasi, ya'ni Kevinning bobosi hozir ham Londonning g'arbiy tumani Ilingda istiqomat qiladi. De Bryuynelar oilasi - «Liverpul» muxlisi. Har gal Rojdestvo bayramida Kevin Angliya­dan «Liverpul» ramzlari tushirilgan sovg'alarni olardi. O'zi «Dronen» klubida to'p sursada, doimo Ouenga taqlid qilar, Mayklning Frantsiya mundialida Argentina darvozasiga urgan golidan ibrat olishga intilardi. «Kevin 12 yoshga chiqqanida sinfdoshlari chang'ida uchish maqsadida toqqa yo'l olishgandi. O'g'lim uyda qoldi. Ma'lum bo'lishicha, Maykl Ouen uchun sportning ekstremal turlari bilan shug'ullanish man etilgan, demak Kevin ham chang'ida uchishdan voz kechishi lozim edi», - deb yozgandi otasi o'z asarida. 2000 yili de Bryuyne «Gent»ning e'tiboriga tushdi va tez orada u jamoasi bilan Belgiya kubogini qo'lga kiritdi. Keyinchalik Kevin Parijda tashkil etilgan o'smirlar turniridan ham zafar bilan qaytdi. «Sovrin (6 kg.) shunchalik katta ediki, uni ko'tarolmadim. Men o'z jamoadoshlarimdan, ular esa raqiblaridan bir yoshga kichik edilar. Musobaqada 350 nafar yosh futbolchilar ishtirok etishgandi. Men turnirning eng yaxshi o'yinchisi unvoniga sazovor bo'lgandim», - deydi Kevin. Mashg'ulotlardan so'ng barcha murabbiylar dam olishga ketishar, lekin ulardan biri - Sharli Musonda texnik mahoratini maromiga etkazish niyatida bo'lgan talabalar bilan qo'shimcha mashg'ulotlar o'tkazardi. Davomi Interfutbol.uz saytida.
— deya xabar beradi uff.uz nashri.