«Manchester Siti» darvozaboni Klaudio Bravo Chempionlar Ligasi doirasida sobiq jamoasi «Barselona»ga qarshi maydonga tushdi. Ana shu o'yin oldidan chililik darvozabon Kataloniyaning Mundo Deportivo nashriga intervyu berdi. - «Kamp Nou»ga qaytayotganingiz haqida qanday fikrdasiz? - Xotirjamman. Ammo mazkur o'yinning jamoamiz uchun o'ta muhimligini ham yaxshi tushunaman. Bu stadionga qaytayotganimdan xursandman. Chunki faoliyatimning eng yorqin damlarini aynan shu erda o'tkazdim. Ushbu klub tufayli jahon futboli elitasiga kirdim. - Yaxshi qabul qilishlarini kutyapsizmi? - Ishonchim komil, muxlislar iliq qarshi olishadi. «Barselona»ni ajoyib tarzda tark etdim. Bu klubda o'ynab, barcha sovrinlarni qo'lga kiritdim. Lekin «Manchester Siti»ga o'tganimdan afsusda emasman. - Sizningcha, kim g'olib bo'ladi? - Menimcha, jamoalar o'z o'yinlarini namoyish qilishadi. «Barselona»ga devorlari yordam berishi mumkin. Biroq biz o'zimizning kuchli taraflarimizni namoyish etib, rejani bajarishimiz kerak. g'alaba uchun har ikki klubning imkoniyatlari bir xil. - Messi, Suares va Neymar bilan yana birga maydonga tushasiz. Farqi - bu safar ular sizning darvozangizga tahdid solishadi... - Ular bilan bir klubda o'ynaganim - omadim. Jamoalarimizning o'yin uslubi o'xshab ketadi. Biroq «Barselona» tarkibida Messi bor. Leoning o'yinini qanchalik tahlil qilmang, undan nima kutishingizni bilmaysiz. - Mark-Andre ter Shtegenni «Selta»ga qarshi uchrashuvdagi harakati uchun tanqid ostiga olishdi. Uning o'yiniga qanday baho berasiz? - Har qanday darvozabon tanqid qilinadi. Ayniqsa, gap «Barselona» haqida ketganda. Nima bo'lgan taqdirda ham, ter Shtegen - kuchli darvozabon. Ishonchim komil, u bosimlarga bardosh beradi. - Darvozabonlar uchun xatolarni unutish qiyinmi? - Ushbu pozitsiyada o'ynaganlar bu savolga qanday javob berishni yaxshi bilishadi. O'ylashimcha, darvozabon har qanday jamoada muhim o'yinchi hisoblanadi. Bosimga bardosh berish uchun esa yaxshi o'ynash kerak. Davomi bor. Suhbatning davomi interfutbol.uz saytida.
— deya xabar beradi uff.uz nashri.