Bu jamoalarning o'zaro uchrashuvlari xoh milliy chempionat, xoh O'zbekiston kubogi doirasida bo'lsin, doimo shiddatli va murosasiz kechgan. Milliy chempionatlar tarixiga nazar solsak, hozirgacha “Qizilqum” — “Lokomotiv” jamoalari yigirma bir marotaba o'zaro ro'baro' kelgan. Shundan ettitasida navoiyliklar zafar quchgan bo'lsa, to'rtta o'yinda tomonlar murosa yo'lini tanlashgan. Qolgan yana o'nta bahsda omad temiryo'lchilarga kulib boqqan. To'plar nisbati bo'yicha hozircha ustunlik “Lokomotiv” tomonida — 18:29. O'zaro o'yinlarda navoiyliklar raqibidan 25 ta ochkoni tortib olgan. Temiryo'lchilar esa 34 ochko jamg'arishga muvaffaq bo'lgan. Bu jamoalarning oxirgi uchrashuvi birinchi davrada Toshkentda o'tkazilgan. Unda uchrashuvning 2-daqiqasida Jasur Hasanov kiritgan yagona gol temiryo'lchilarga uch ochokni taqdim etgandi. Mazkur o'yin oldidan har ikki jamoa tarkibida jiddiy yo'qotishlar yo'q. Faqat katta o'zgarish temiryo'lchilar murabbiylar tarkibida amalga oshirilganini hisobga olmaganda barchasi risoladagidek. Boisi, 25-turda “Lokomotiv” safarda “Qo'qon-1912” jamoasi bilan o'zaro ochkolar bo'lishganidan keyin bosh murabbiy Vadim Abramov hamda murabbiy Marat Miftaxuddinov temiryo'lchilar murabbiylar shtabini tark etishgan. Bu o'zgarishdan keyin oxirgi turda “Lokomotiv” futbolchilari Toshkentda “Buxoro”ni qiyinchiliksiz (2:0) mag'lubiyatga uchratishgandi. Ishonamizki, Navoiyda bo'ladigan navbatdagi uchrashuv ham murosasiz va hayajonli kechadi. Qolaversa, “Qizilqum”ning temiryo'lchilar uchun noqulay raqib ekanligini nazarda tutsak, konchilar o'z muxlislarini xursand qilishiga umid qilamiz. Jamoamizga faqat omad va g'alaba yor bo'lishini tilab qolamiz. O'ZARO UChRAShUVLAR 2004 yil 15 mart. “Qizilqum” — “Lokomotiv” — 0:0 2004 yil 5 noyabr. “Lokomotiv” — “Qizilqum” — 5:0 2005 yil 16 aprel. “Qizilqum” — “Lokomotiv” — 1:1 2005 yil 25 oktyabr. “Lokomotiv” — “Qizilqum” - 1:3 2006 yil 7 may. “Lokomotiv” — “Qizilqum” — 1:1 2006 yil 9 sentyabr. “Qizilqum” — “Lokomotiv” — 1:0 2007 yil 26 may. “Qizilqum” — “Lokomotiv” — 1:0 2007 yil 16 sentyabr. “Lokomotiv” — “Qizilqum”- 3:0 2008 yil 5 iyul. “Qizilqum” — “Lokomotiv” — 1:0 2008 yil 16 avgust. “Lokomotiv” — “Qizilqum” — 2:1 2009 yil 29 iyun. “Qizilqum” — “Lokomotiv” — 1:0 2009 yil 7 avgust. “Lokomotiv” — “Qizilqum” — 2:1 2010 yil 3 aprel. “Qizilqum” — “Lokomotiv” — 0:1 2010 yil 21 oktyabr. “Lokomotiv” — “Qizilqum”- 1:0 2012 yil 25 iyun. “Lokomotiv” — “Qizilqum” — 0:1 2012 yil 8 avgust. “Qizilqum” — “Lokomotiv” — 1:1 2013 yil 31 may. “Lokomotiv” — “Qizilqum” — 3:1 2013 yil 26 avgust. “Qizilqum” — “Lokomotiv” — 1:0 2014 yil 16 may. “Lokomotiv” — “Qizilqum” — 4:1 2014 yil 26 sentyabr. “Qizilqum” — “Lokomotiv” — 2:3. 2015 yil 6 iyun. “Lokomotiv” — “Qizilqum” — 1:0.
— deya xabar beradi uff.uz nashri.