1news.uz — 22 oktyabr kuni yurtimiz bo'ylab mamlakatimiz sportiga oid navbatdagi xushxabar tarqaldi. Yosh va shu bilan birga anchagina taniqli og'ir atletikachimiz Adhamjon Ergashev o'smirlar o'rtasida jahon chempionligini qo'lga kiritdi. To'g'ri, hamyurtimiz o'z vazn toifasida er yuzining eng kuchli atleti deb tan olinishi barchamizni to'lqinlantiradi, ammo men bu voqeaga biroz o'zgacharoq nazar bilan qarab ko'rishni taklif qilgan bo'lardim. Birinchidan o'zbek o'g'lonlari va qizlarining dunyo maydonlaridagi zafarli yurishlari endilikda yangilik bo'lmay qoldi. Deyarli, har kun desak lof bo'lar-u, har hafta u yoki bu sport turidan vakillarimizning nufuzli musobaqalardagi munosib ishtiroki haqida eshitamiz. Adhamjonning bu galgi yutug'i esa har qachongidan ham kutilgan edi. Yo'q, azbaroyi xohlaganimizdan emas, shunchaki, tahlillar, taxminlar, imkoniyatlar – barchasi bizga shunday fikrlashga asos bo'lardi. Ergashevning g'alabasiga yana bir, eng asosiy – mantiqiy echim bor edi. Bu qanday echim ekan, deya qiziqayotgan bo'lsangiz, maqolamizni oxirigacha o'qishni tavsiya qilgan bo'lardik. Hozir esa so'z Adhamjonning chiqishlari xususida boradi. Malayziyaning Penang shahrida bo'lib o'tayotgan o'smirlar o'rtasidagi jahon chempionatiga federatsiyamiz raisi o'rinbosari Shahrillo Mahmudov birgina sportchini olib ketdi. (U kishining o'zi chempionat oldidan o'tkazilgan Xalqaro OAF ijroiya qo'mitasi yig'ilishi va Kongressida qatnashdi. Yoshlar va o'smirlar terma jamoamizning to'liq tarkibi esa boshqa bir mas'uliyatli musobaqa – noyabr oyida Yaponiyada tashkil etiladigan qit'a chempionatiga hozirlik ko'ryapti.) Muhimi shuki, ishonch bildirilgan sportchimiz o'zini yuksak darajada oqladi. Namangan viloyati Yangiqo'rg'on tumanida tug'ilib o'sgan Adhamjon Ergashevni nafaqat diyorimizdagi sport ishqibozlari, balki jahon og'ir atletika jamoatchiligi ham yaxshi taniydi. Eslatib o'tamiz, u II o'smirlar Olimpiya o'yinlari va yoshlar (o'zidan 2-3 yosh kattalar) o'rtasidagi jahon chempionati sovrindori. Endi o'z yosh toifasida jahon chempioni ham. Bevosita musobaqaga to'xtalsak, Adhamjon dast ko'tarishdayoq oltin medalni qo'lga kiritib, g'oliblikka asosiy da'vogar ekanligini bildirib qo'ydi. Uchinchi urinishda zarur bo'lgan 125 kg og'irlikdagi toshni ko'tarib, asosiy raqibi – Rossiya vakili Zulfat Garaevdan 1 kg o'zib ketdi. Kolumbiyalik sportchini 4 kg, Chin yurti polvonini esa 5 kg ortda qoldirib ketdi. Bu – chempionlik uchun qo'yilgan dadil qadam edi. Zero Garaev siltab ko'tarishda hamyurtimizga qarshi turib bera olmadi, 6 kg kam natija qayd etdi. Koreyalik Vi Shinning bu yo'ldagi harakatlari ham zoe ketdi – u 150 kgda to'xtadi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.