«Barselona» hujumchisi Neymar yozda «PSJ»ga o'tishga juda yaqin turgan edi.
Parijliklar prezidenti Nossir al Xalayfiy San-Pauluga borgan va futbolchining otasi va agenti bilan muzokara olib borgan. Ammo ular qo'ygan talab haddan ortiq baland bo'lgani uchun transfer amaga oshmay qolgan.
Xabar qilinishicha, Neymar yiliga 40 million evro maosh talab qilgan, ammo «PSJ» bu talabni rad etgan. Ammo transfer amalga oshmay qolishiga asosiy sabab sifatida Braziliya sudi tomonidan Neymarga qo'yilgan 45 million evrolik jarimani ham «PSJ» to'lab berishi talab qilingani ko'rsatilmoqda. Neymar otasi bilan birgalikda 2011 yildan to 2013 yilga qadar bo'lgan muddat ichida soliq to'lashdan qochgani uchun Braziliya sudi tomonidan aynan shuncha jarimaga tortilgan.
Eslatib o'tamiz, Neymar yaqinda «Barselona» bilan shartnomasini 2021 yilga qadar uzaytirdi. Unga ko'ra hujumchi yiliga 25 million evro maosh oladi, transfer qiymati esa 250 million evro qilib belgilangan.
— deya xabar beradi uff.uz nashri.