Bugun O'zbekiston kubogi yarim final dastlabki o'yini doirasida “Lokomotiv” “Bunyodkor”ga qarshi bahs yuritdi. Anchagina keskin kurashlarga boy tarzda o'tgan uchrashuvda “temiryo'lchilar” Sardor Mirzaev tomonidan kiritilgan yagona gol evaziga zafar quchishdi. O'yindan so'ng o'tkazilgan matbuot anjumanida “Loko” ustozi Andrey Miklyaev quyidagicha fikr bildirdi. – Bugun va nihoyat gol ura olganimizdan juda xursandman. Zero so'nggi uchrashuvlarda raqib darvozasi tomon yo'l topishga biroz qiynalayotgan edik. Umuman olganda esa bugun haqiqiy kubok o'yiniga guvoh bo'ldik. Xavfli vaziyatlar va tezkor o'yin kuzatmadik, “Bunyodkor” o'z jarima maydoniga berkilib oldi. Biz esa yaratilgan bir nechtagina qulay imkoniyatlardan birini golga aylantira oldik va natijada g'alaba bizga nasib etdi. Nima bo'lganda ham bugun biz g'olib bo'ldik, buning uchun yigitlarga tashakkur izhor etaman. Tarkibda bir nechta kutilmagan o'zgarish qilganimiz esa oxirgi paytlarda tez-tez o'yin o'tkazayotganimiz bilan bog'liq. Qolaversa yurtimizda mavsum ham nixoyalab bormoqda. Ba'zi o'yinchilar mavsum boshidan buyon tanaffussiz o'ynab kelishayotgan edi. Shu sababli bunday o'yinchilarga dam berish orqali hali kuchga to'la bir nechta futbolchilarni sinab olishni ma'qul ko'rdik. Natija esa yomon bo'lmadi, omad bugun bizga kulib boqdi, – deydi tajribali mutaxassis.
— deya xabar beradi uff.uz nashri.