Vengriyada Professionel tennischilar uyushmasi - ATR musobaqalari taqvimidan joy olgan "Budapest Challenger-2016" xalqaro turnirida ishtirok etayotgan hamyurtimiz Denis Istomin dastlabki g'alabasini nishonladi.
Hamyurtimiz yakkalik bahslaridagi birinchi uchrashuvini germaniyalik Daniel Brandsga qarshi o'tkazdi. Ilgari har ikki tennischi o'zaro uch marotaba kuch sinashgan bo'lib, Qozog'iston va Frantsiyadagi turnirlarda Brands, Toshkentdagi musobaqada hamyurtimiz zafar quchgan edi.
"Budapest Challenger - 2016" turniridagi uchrashuvda Denis Istomin raqibidan kuchli ekanini namoyish eta oldi. Hamyurtimiz ustunligida o'tgan bellashuv 6:2, 6:3 hisobida yakunlandi. Shu tariqa mamlakatimizning eng kuchli raketka ustasi germaniyalik tennischi bilan raqobatdagi umumiy hisobni tenglashtirdi - 2:2.
Denis Istomin ikkinchi davrada slovakiyalik Norbert Gombos bilan raqobatlashadi.
— deya xabar beradi uff.uz nashri.