Bugun oliy liga 27-turining markaziy uchrashuvi Toshkentda “Lokomotiv” – “Nasaf” jamoalari o'rtasida bo'ladi. Bu uchrashuv shubhasiz futbol ishqibozlarini ham, mutaxasisu jurnalistlar uchun ham qiziq. Chunki bu yilgi mavsumda chempionlik uchun kurash olib borayotgan “temiryo'lchilar” ikkinchi davra boshidan o'z tarkibini kuchli futbolchilar bilan boyitib olgan “Nasaf” jamoasi bilan qanday o'ynaydi? Birinchi davradagi Qarshida bo'lib o'tgan uchrashuvda alamli mag'lubiyatga uchragan “ajdarlar” bu safar “Lokomotiv”dan ustun kela oladimi? Bugungi uchrashuvdan keyin ushbu savollarga javob topiladi. Mazkur jamoalar bugun Toshkentda 12-bor o'zaro hisob-kitob qilishadi. “Nasaf”ning Toshkentdagi so'nggi g'alabasiga to'rt yil bo'lgan bo'lsa ham, o'zaro o'yinlarda jamoamiz “Lokomotiv” ustidan 4 marta g'alaba qozongan, “temiryo'lchilar”ning g'alabasi bitta kam. Jamoalar Toshkentdagi uchrashuvlarda 4 marta murosa ko'chasini ham tanlashgan.  Ushbu jamoalarning Toshkentdagi uchrashuvlarida 15 marta darvozalar ishg'ol qilingan. Bu nisbat 7-8ni tashkil qiladi. Ya'ni “ajdarlar” bitta to'p farqi bilan oldinda borishmoqda. Bugun shuningdek ushbu uchrashuvda quyidagi savollarga ham javob topiladi. O'z safida nomdor va katta tajribaga ega futbolchilarni jamlagan “Lokomotiv” jamoasi bu o'yinda imkoniyatlaridan qanday foydalanadi? “Nasaf”chi? “Nasaf” bu yilgi mavsumning ikkinchi davrasida eng muvaffaqiyatli transferlarni amalga oshirgan jamoalardan biri bo'lib turibdi. Mahalliy o'yinchilarimizda ozroq hayajon bo'lishi mumkin. Ammo legioner futbolchilarimizda raqibning kim bo'lishining farqi yo'q.
— deya xabar beradi uff.uz nashri.