Matbuotning ko'rinishi hozirda o'zgargan. Gazeta xodimining qiziqqon odamlardan intervyu olishga ham ehtiyoji yo'q. Ijtimoiy tarmoqni yaxshilab kuzatib o'tirsa, bas, shu erning o'zida uning qarmog'iga tushadiganlar topiladi. Aniqrog'i, shu joyning o'zida qahramoni bilan “intervyu” uyushtirib olishi mumkin.
Kuni kecha O'zbekiston terma jamoasi a'zosi Vitaliy Denisov ana shunday “intervyu” qahramoniga aylandi. Taxminimizcha, u o'zi bilmagan holda fikr bildirib qo'ydiyu, tortishuvlar natijasida HOZIRChA deb hisoblayotgan fikrini battar qat'iylashtirib, oqibatda bir-ikki jurnalist bilan “san-man”ga ham bordi. Voqea haqida qisqacha ma'lumot:
Rus matbuotining O'zbekistondagi kichikroq futbol sayti yopilayotgani haqidagi xabariga izoh yozar ekan, Denisov tvitterdagi akkauntidan o'zbek jurnalistlari haqida salbiy ma'noda tvit yozdi, aniqrog'i, fikr bildirdi. Vitaliyning nazdida, o'zbek jurnalistlari ichida HOZIRChA u bilan uchrashgan jurnalistlarning birortasi saviyali emas ekan. Aniqrog'i, tuzukroq jurnalistni ko'rmagan ekan… hali. Hay, bu ham bir fikr, deb o'tib ketishimiz mumkin edi, biroq uning nima uchun yangragani va qay holatda keltirilgani odamni qiziqtirib qo'ydi. Denisov bu gapini RUS MATBUOTIga aytdi, hamma gap shunda. U bu so'zlarni shunday ohangda aytdiki, chetdan qarab turgan odam beixtiyor Vitaliyning bu so'zlari istehzodan boshqa narsa emasligini payqaydi.
Taniqli shaxslarning ijtimoiy tarmoqdagi vazni boshqalarga qaraganda anchayin og'irroq bo'ladi. Rossiyada yashayotgan va Rossiya klubida to'p surayotgan O'ZBEKISTONLIK YIGIT o'z vatanida saviyali jurnalistni uchrata olmagan bo'lsa, bordir – har holda yurtga kam keladi, deyarli intervyu bermaydi – ammo u bu gapi bilan butun mamlakat jurnalistikasiga baho berib yuborayotganini ichki farosati ila idrok qilmog'i lozim edi.
Denisov tvitterdagi “do'stlari” ichida bir qator o'zbekistonlik jurnalistlar borligini bilgani holida, bu gapni yozishi to'g'ri bo'lmagan baribir. Chunki u keyinroq tvitterdagi suhbatlar qizib ketishi asnosida “o'zbekistonlik ko'p jurnalist bilan gaplashmaganini”, “unga shunday tuyulganini”, “intervyu berishni xushlamasligini” aytib o'tdi va bu iqrorlar ko'proq himoyachining zarariga xizmat qildi. Bir sohaga baho berayotgan paytda uni to'lig'icha o'rganmasdan turib gapirmagan ma'qul. Ko'pchilik haqida gapirilgan gapga ko'pchilik oldida javob beriladi. “Falon xalq ichida hali tuzugini ko'rmadim”, degan gap uchun o'sha falon xalq oldida mulzam bo'lib turish bor. Ehtiyot bo'lish kerak. Shu gapni biroz boshqacharoq ko'rinishda yozsa, olam guliston edi. Hay…
Qizig'i, Denisovning fikrini qo'llab-quvvatlagan va bu “ishi” uchun unga jurnalistlar “Eng yaxshi futbolchi” nominatsiyasida ovoz bermasligini “bashorat qilgan” hamkasblarimiz ham topildi. Vaholanki, ular bu haybarakallachilik bilan O'ZLARINI ham o'sha toifaga kiritib qo'yishganini payqamadilar, chog'i… Mayli, hammaga insof bersin, lekin ijtimoiy tarmoq yukini har bir odam, xususan taniqli kishilar ko'tara bilishlari kerak. Tvitterda o'tirib olib aqllilik qilayotganda, har bir gapi intervyu shaklida matbuotda yoritilishi mumkinligini, hatto keyinroq o'chirib tashlasa ham “skrinshotlar”da qolishini fahmlamog'i darkor.
Pashshadan fil yasay olishni O'ZBEK JURNALISTLARI ham bilishadi. O'zbekona andishadan ba'zan voz kechishga ham to'g'ri kelinadi. Bu sohaning yovuz qoidasi shunaqa – hech kimni ayash yo'q, suyukli kishisini-da noto'g'ri gapi, fe'li uchun javob berdirishga majbur qiladi.
Vitaliy shu kabi shov-shuv ko'taradigan jurnalistlarni oldin ko'rmagan bo'lsa, mana – kecha tanishib ham oldi. Agar boshqa ma'nodagi saviyani so'ragan bo'lsa, o'zbek matbuotini o'qisin. Ona tilidagisi bo'lmasa, davlat tilidagisini o'qisin. Himoyachimiz shunda jurnalistlar o'zi o'ylaganchalik juda-a-a saviyasiz emasligiga guvoh bo'ladi. Aks holda, ko'chada uchratib qolmagani uchun ularni yo'q deb o'ylamasin. O'ylasa ham aytmasin. Uni o'sha – u bilan ko'chada uchrashib qolmagan jurnalist o'qiyotgan bo'lishi mumkin… Xayrulla HAMIDOV
— deya xabar beradi uff.uz nashri.