Bugun oliy liga 27-tur o'yinlari doirasida “Lokomotiv” Qarshining “Nasaf” klubiga qarshi bahs yuritdi va qiziqarli tarzda kechgan uchrashuvda 3:2 hisobida chiroyli g'alabaga erishdi.

O'yindan keyin o'tkazilgan matbuot anjumanida “Lokomotiv” ustozi Andrey Miklyaev quyidagicha fikr bildirdi.

– Uchrashuvni yomon boshlamadik. Ikkita gol kiritishni ham uddaladik. Lekin himoyada yo'l qo'yilgan xatolar sabab o'z darvozamizdan ham ikki bor to'p o'tkazib yubordik. Ammo yigitlar o'zlarini yo'qotib qo'yishmadi, ular ruhan “sinib” qolishmadi va yakunda g'alaba to'pini urish bizga nasib etdi.

Ayni paytda biz mavsum yakuni arafasida turibmiz. Butun mavsum davomida muntazam maydonga tushib kelgan o'yinchilarga biroz dam olish imkonini taqdim etyapmiz. Masalan, Temur Kapadze endilikda yosh futbolchi emas. Qolaversa u deyarli har o'yinda maydonga tushib kelmoqda. Oxirgi paytlarda tez-tez o'yin o'tkazganimiz sababdan uni bugun ham zaxiradan maydonga tushirishga qaror qildik.

Shuningdek, Bikmaev ham “Bunyodkor” bilan o'yinda o'zidan yaxshi taassurot qoldira olgani uchun ilk daqiqalardan o'ynadi. Gevorkyan esa zaxirada qoldi. Arturni o'yinning kechishiga qarab ikkinchi bo'limda maydonga tushirmoqchi edik.

Umuman olganda, o'yin ancha tomoshabop ko'rinish oldi. G'alaba qo'lga kiritganimizdan mamnunman va buning uchun yigitlarga minnatdorchilik bildiraman, – deydi tajribali mutaxassis.
— deya xabar beradi uff.uz nashri.