Sir emaski, Braziliya dunyo futboliga bir-biridan kuchli iqtidorlarni etishtirishda etakchi davlatlardan biri sanaladi. Ushbu mamlakat hozirgacha ne-ne yulduzlari bilan faxrlanmadi, deysiz. Pele porlagan paytlardan to Neymarning ajabtovur harakatlariga guvoh bo'layotgan hozirgi davrga qadar qanchadan-qancha futbolchilar o'z nomlarini tarix zarvaraqlariga zarxal harflar bilan bitishga ulgurdilar. Mana, endi yangi avlod etishib chiqmoqda. Sports.ru sayti shuni inobatga olgan holda, kelajagi porloq deya e'tirof etilayotgan braziliyalik yoshlardan reyting tuzdi.
10. UOLAS
Prototipi: Fernandino
Ampluasi: tayanch yarim himoyachisi
Klubi: «Gremio»
Tug'ilgan sanasi: 1995 yil 4 aprel
Uolas to'pni olib qo'yishga usta, o'z maydonida koptokka ega chiqqach, tezlik bilan oldinga intiladi. U hujumlarni rivojlantiradi, maydonni yaxshi ko'ra biladi. «Gremio»da 29 yoshli Maykon bilan o'ynayotgan yigitchaning aniq to'p uzatish bo'yicha foiz ko'rsatkichi 86ga teng. Bir oy muqaddam «Sport»ga qarshi o'yinda Pedru Roshega oyog'ining tashqi qismi bilan golli «pas» berdi. Placar jurnalining Braziliya chempionatidagi tayanch yarim himoyachilaridan tuzgan reytingida Uolas oltinchi o'rinda qayd etildi.
9. Markos GIL'ERME
Prototipi: Villian
Ampluasi: hujumkor yarim himoyachi
Klubi: «Atletiko Paranaense»
Tug'ilgan sanasi: 1995 yil 5 avgust
Ushbu yosh futbolchi «Atletiko Paranaense»dagi debyut mavsumini a'lo kayfiyatda o'tkazdi. Gilerme 11ta gol urib, jamoasining eng yaxshi merganiga aylandi. Natijada, U-20 terma jamoasi safidan joy olib, Janubiy Amerika yoshlar chempionatida qatnashish huquqini qo'lga kiritdi. E'tiborlisi, mazkur turnirda ham Markos 4 marta to'p kiritib, jamoadoshlari orasida eng yaxshi ko'rsatkichni qayd etdi. Bir necha hafta oldin 20 yoshli futbolchi «Atletiko» safidagi 100-o'yinida maydonga tushdi. Shu munosabat bilan uning libosidagi «10» raqami oldiga yana bitta nol qo'shib qo'yildi.
8. NATAN
Prototipi: Oskar
Ampluasi: hujumkor yarim himoyachi
Klubi: «Vitess»
Tug'ilgan sanasi: 1996 yil 13 mart
2013 yili o'smirlar o'rtasidagi jahon chempionatida 5ta gol urgan Natan o'tgan yili «Atletiko Paranaense»ning asosiy tarkibidagi debyutini nishonladi. U tezkor, to'pni qizg'onmaydi, hujumlarda texnikasini namoyish etadi, har ikki oyog'ida bir xil aniq zarba bera olish xususiyatiga ega. Yozda «Chelsi» uni 4,5 million evroga sotib olib, bir yil muddatga «Vitess»ga jo'natdi. Natan Gollandiya klubining ikkinchi jamoasida ikkita to'p kiritgan bo'lsa, asosiy jamoada bir marta zafar quchdi.
7. MARLON
Prototipi: Lusio
Ampluasi: markaziy himoyachi
Klubi: «Fluminense»
Tug'ilgan sanasi: 1995 yil 7 sentyabr
Braziliya yoshlar terma jamoasining markaziy himoyachisi o'tgan yilning yozida «Fluminense»da porladi. Raqib forvardlarini to'xtatish, o'z navbatida, jamoasining yangi hujumini boshlashda faol. Bu aynan braziliyalik himoyachilarda qadrlanadigan jihat. Marlon kam qoida buzadi (bir o'yinda 1,3ta fol) va hujum tashkil etishda foydali harakat qiladi (Braziliya «A» seriyasi himoyachilari orasida aniq «pas» berish bo'yicha etakchi). 2013 yilgacha u tayanch yarim himoyasida o'ynagan, terma jamoadagi sherigi jarohat olgach esa markaziy himoyadan joy egalladi. Aytishlaricha, «Barselona» Marlonni o'z safiga qo'shib olish bo'yicha eng asosiy da'vogar bo'lib turibdi.
6. KLEYTIN'O
Prototipi: Robino
Ampluasi: hujumchi
Klubi: «Figeyrense»
Tug'ilgan sanasi: 1995 yil 23 oktyabr
Braziliya yoshlar termasi forvardi o'ta effektli - qanotdan yorib kirish chog'ida uch nafar raqibini dog'da qoldirishi, qaychi uslubida to'p tepishi yoki ajoyib driblingi evaziga hujumga joziba kiritishi mumkin. Kleytino gol urishdan ko'ra, chiroyli «pas» uzatishni ma'qul biladi (joriy mavsumda 2ta to'p kiritib, 5 marta golga assistentlik qilgan). Tezkorligi va texnik salohiyati evaziga vinger va hujumchi ortidagi forvard rolida ajoyib ko'rinadi.
Davomi InterFUTBOL gazetasi blogida.
— deya xabar beradi uff.uz nashri.