Barchaga ma'lum, OFK miqyosidagi JCh-2018 saralashi uchinchi raundida 12ta jamoa 4,5ta yo'llanma uchun kurash olib boryapti. Eslasangiz, qit'amizda  JCh-2010 va JCh-2014 saralashining hal qiluvchi raundi 10tadan jamoa ishtirokida o'tgandi. Umuman, hozirgi tsiklning 4-turidan so'ng favoritlar va yaqqol autsayderlar guruhi shakllanib ulgurdi, go'yo. Deylik, «pley-off» o'yinlariga yo'l ochadigan 3-o'rin uchun kurashadigan jamoalar ham aniqday. O'zi birinchi davra yakuniga etmay turib, bashorat qilish o'rinli sanalmasada, 4-turdan keyingi holat bo'yicha muayyan xulosalar chiqarish mumkin. Demak, bugun joriy tsikl va oldingi ikki saralashni o'zaro solishtiramiz. Bunda shartli ravishda 2010 va 2014 yillardagi mundial saralashlarining 3-turidan keyingi, ya'ni birinchi davra yakuniga 1ta tur qolgan vaqtdagi holatni inobatga oldik. Rossiya-2018. Ha, milliy jamoamiz saralashning hal qiluvchi qismini o'z tarixida birinchi marta ancha ishonchli boshladi. Faqat gollar soni kamroq. Lekin quvontirayotgan jihatlar ham yo'q emas. 4ta o'yinning 3tasida gol qo'yib yubormadik. Marragacha yana 6ta o'yin bor. Taxminiy hisob-kitoblarga ko'ra, ulardan 4tasida g'alaba qayd etilsa, ya'ni 12 ochko olinsa, jamoamiz JCh-2018ga to'g'ridan-to'g'ri borsa kerak. Ehtimolki, ozroq ochko ham yo'llanma yutishga kifoya qilar, faqat buning uchun raqobatchi jamoalar ko'proq yutqazishlari yoki durang o'ynashlari lozim... JCh-2018 saralashi. Uchinchi raund. «A» guruhi. 4-turdan keyingi vaziyat. Guruhimizdagi vaziyat hozirdanoq tushunarli. Eron va J.Koreya termalarining 1-2-o'rinlar uchun jiddiy kurash olib borishlari tayin. 15 noyabr kuni J.Koreyada bo'ladigan o'yin ko'p narsaga oydinlik kiritib berishi mumkin. Futbolchilarimiz o'sha uchrashuvda kamida 1 ochko olsalar, hozirgi mavqemiz o'zgarmaydi. Shuning barobarida ijobiy finishga bo'lgan umid ancha oshadi. To'g'ri, Suriya va Qatar termalarini hozirning o'zida hisobdan chiqarib qo'yish yaramaydi. Zero, ular ham nimadandir umid qilish imkoniyatiga egalar. Lekin ortda qolgan 4ta tur doirasidagi o'yinlariga qarasak, bu jamoalarning bir maromda odimlashlariga shubha bor. Harqalay, Qatar va Suriya termalari juda tez o'zgaruvchan jamoalardek taassurot uyg'otishyapti. Ularda deylik, ruhiyat masalasida, shuningdek, jismoniy kuchni to'g'ri taqsimlash bo'yicha muammolari yo'q emas. Jamoa               O'         G'         D         M        T-N        O 1. Eron              4         3         1          0         4-0         10 2. O'zbekiston 4         3         0          1         4-1         9 3. J.Koreya        4         2         1          1         6-5         7 4. Suriya            4         1         1          2         1-2         4 5. Qatar             4         1         0          3         3-6         3 6. Xitoy          4             0             1             3             2-6          1 JCh-2018 saralashi. Uchinchi raund. «B» guruhi. 4-turdan keyingi vaziyat. Ushbu guruhda chindan ham, motivatsiya va salohiyat jihatidan bir-biriga teng raqiblar yig'ilgan ko'rinadi. So'nggi Osiyo kubogida juda yaxshi o'yin namoyish etgan Iroq va BAA termalari hozircha nisbatan pastroqda borishyapti. Lekin shunisi aniqqi, ular oxirigacha kurashadilar. Tailandliklar uchun esa, shu bosqichga etib kelishganining o'zi katta natija sanalsa kerak. Saudiya Arabistoni termasi aksincha, so'nggi rasmiy turnirlarda juda bo'sh ko'ringandi. Mana, saudlarda bosh murabbiy o'zgargani o'z samarasini beryapti. Jamoa sur'atni tezda oshirdi va ayni payt guruhdagi raqiblar ko'ngliga g'ulg'ula solyapti. Qarang, hamma asosiy xavfni Muhammad al Sahlaviydan kutayotgan bir pallada Navaf al Obid va Fahad al Muvallad katta sahnaga chiqishdi. Avstraliya termasining esa jamoaviy o'yin bobida hamon yaqqol ustun ekanligi sezilib turibdi. Deylik, «yashil qit'a» vakillari yaponlarga qarshi kechgan bahsda to'pga egalik qilish bo'yicha 65 foizlik natija ko'rsatishdi. Ayni shu jihat «sokkeruz»ga maydonda o'z uslubini joriy etish imkonini beryapti. Jamoa                    O'      G'      D         M        T-N        O 1. S.Arabistoni  4       3      1          0         8-3         10 2. Avstraliya        4       2      2          0         7-3         8 3. Yaponiya              4       2      1          1         6-4         7 4. BAA                     4       2      0          2         5-6         6 5. Iroq                    4       1      0          3         6-6         3 6. Tailand             4       0      0          4         1-10       0 Braziliya-2014. Favorit terma jamoalar qatori bizning termamiz ham so'nggi bosqichga doimgidek ishonchli tarzda etib keldi. Bu yog'iga  8tagina o'yin qolgan va ularda chamasi 14 ochko olish talab etilardi. Afsuski, marrada ochkolarimiz soni 13ta bo'ldi... JCh-2014 saralashi. To'rtinchi raund. «A» guruhi. 3-turdan keyingi vaziyat. Milliy jamoamiz avvalgi saralash raundini yuqori sur'atda o'tkazdi. Misol uchun, bir qator asosiy futbolchilarsiz ham yaponlarni safarda enggan edik. Tojikiston terma jamoasiga qarshi o'yinda kartochkalar sonini sun'iy ravishda ko'paytirib olingani chatoq bo'ldi va buning uchun keyinchalik rosa afsuslandik ham. Chunonchi, FIFA o'sha uchrashuvda futbolchilarimizni ataylab kartochka ishlaganlarini payqab, diskvalifikatsiya muddatini yana bitta o'yinga cho'zib qo'ydi. Natijada hal qiluvchi bosqich doirasidagi ilk uchrashuv, ya'ni Eron termasiga qarshi bahsni chin etakchilarsiz o'tkazdik. Shunga qaramay,  o'yin sifati yaxshi bo'ldi, ammo afsuski, natija... Xullas, asosiy saralash bosqichi bu safar ham biz uchun omadsiz boshlandi. Eslang, yaponiyalik Yuichi Nishimura ikkinchi bo'limda Odil Ahmedovning toza golini hisobga olmagani etmaganidek, 90-daqiqada darvozamizdan to'p olib chiqqandik. Shu o'yindan so'ng Vadim Abramov darhol ishdan bo'shatildi va terma jamoa boshqaruvini Mirjalol Qosimov o'z qo'liga oldi. 2-turda Livanda qayd etilgan durang - alohida mavzu. Baqaloq darvozabonning jon kuydirishlari, Jasur Hasanovning qanotda besamar yugurishlari... 1-tur. 03.06.2012 O'zbekiston - Eron - 0:1 Livan - Qatar - 0:1 2-tur. 08.06.2012 Livan - O'zbekiston - 1:1 Qatar - J.Koreya - 1:4 3-tur. 12.06.2012 J.Koreya - Livan - 3:0 Eron - Qatar - 0:0 Jamoa               O'         G'         D         M        T-N        O 1. J.Koreya        2         2         0          0         7-1         6 2. Eron              2         1         1          0         1-0         4 3. Qatar             3         1         1          1         2-4         4 4. O'zbekiston  2         0         1          1         1-2         1 5. Livan          3             0             1             2             1-5          1 Davomi iff.uz caytida.
— deya xabar beradi uff.uz nashri.