Myunxenning «Bavariya» klubi 5 noyabr shanba kuni Bundesliganing 10-turida «Xoffenxaym»ga qarshi maydonga tushadi. E'tiborlisi shundaki, myunxenliklar ekologik aktsiya doirasida qayta ishlangan chiqindilardan tayyorlangan formalarda maydonga tushadilar. ADIDAS firmasi Myunxen shahrida 100% okean chiqindisidan tarkib topgan futbol formasini namoish etdi. Maldiv orollari sohilidan yig'ilgan plastik chiqindilar qayta ishlanib, yuqori dizayndagi futbolkalar ishlab chiqarilgan. Shuningdek, forma o'zining «toza» dizayni bilan ham ajralib turadi, ya'ni unda dunyo okeanini asrashga undovchi bir necha belgilar bor. Formaning yoqasiga «For the oceans» yozuvi qo'yilgan, klub logotipi va homiy belgisi ekologik havfsiz yo'l bilan biriktirilgan. «Bavariya» klubi bosh homiysi Telekom ushbu aktsiyani qo'llab-quvvatladi va logotipning oddiy ko'rinishidan voz kechdi. «Men Ispaniya sohillarida o'sganman va qayta ishlangan okean chiqindisidan tayyorlangan bu formani kiyishdan bahtiyorman. Dunyo okeani himoyaga muhtojligini ko'rsatishda bu aktsiya juda qo'l keladi», — deydi Xabi Alonso.
— deya xabar beradi uff.uz nashri.