Futbol olami Joze Mourino va Mario Balotelli kabi murabbiyu, futbolchilarning kutilmagan, ba'zan kurakda turmaydigan mulohazalariga ko'nikib qolgan. Shu bois, bu olamga jindakkina aloqasi bor muxlis ularning shaxsiy «bayonot»larini jiddiy qabul qilmaydi va shunga yarasha, o'z munosabatini bildiravermaydi. Qolaversa, Joze yoki Mario kabi murabbiy va futbolchilarning xurmacha qiliqlari, alamzadalik ruhidagi gap-so'zlari aksariyat hollarda biror shaxsga qaratiladi. Boshqacha aytganda, ularning qaysidir xalq yoki mamlakat futboli, muxlislar yoki stadionlar, shuningdek, soha jurnalistikasi xususida bepisand gapirishlari kuzatilmaydi. Xullas, futbol dunyosida rivojlanmagan davlatlar sporti, xususan, jurnalistikasiga nisbatan ham alohida hurmat-ehtirom ustuvor. Yuksak madaniyat tamoyillariga mos jo'yali tanqidlar esa o'z yo'liga. Harqalay, futbol olami sha'nu-shavkat, qadr-qimmatni unutmagan holda bildirilgan tanqidiy munosabatni hamisha qo'llab-quvvatlaydi. FIFA va uning tarkibidagi konfederatsiyalar rahbarlari bilan bog'liq to's-to'polonlarning og'riqsiz o'tishi sababi ham shunda. O'sha o'rinli «to'ntarish»larda faqat shaxslar aybdor, deb topildi va jazolandi. Alohida xalq yoki mamlakat futboli sha'niga nisbatan biror nojo'ya gap-so'z aytilmadi. Shuning uchun ham jahon futbol jamoatchiligi barchasini jimgina kuzatdi. Hattoki,  Rossiyadek qudratli davlat doping muammosi tufayli qo'yilgan keskin taqiqqa oxir-oqibat, bo'ysundi. Chunki bir-ikki juz'iy jihatlarni hisobga olmaganda, o'sha taqiqlar asosli ko'rindi, chog'i. Ammo ta'kidlash kerak, asosli tuyulsada, Rossiya sport jamoatchiligi bu taqiqlarni o'ziga juda og'ir oldi. Ta'bir joiz bo'lsa, yaralangan rus ayig'i to'lg'onib-to'lg'onib o'tirdi. Hammasi tushunarli: muammo 1-2 nafar alohida sportchiga tegishli bo'lganida, rus sport jurnalistikasi keskin choralarga chidardi. O'rtaga mamlakat sha'ni, qadri tushgani uchun bu masalaga hattoki, Rossiya prezidenti aralashdi. Yuqoridagi mulohazalardan xulosa chiqarsak, Vitaliy Denisovning o'zbek futbol jurnalistikasiga nisbatan bepisand qarashini qanday baholash mumkin? Milliy jamoamizning har bir o'yinida jiddiyligi bilan ajralib turadigan futbolchi qaysi mantiqqa ko'ra, o'zbek futbol jurnalistikasi sha'niga soya solishga jazm etdi? Qani undagi jiddiylik? Agar o'zi yaxshi bilmasa, o'zbek futbol jurnalistikasi tarixi va bugunini otasidan so'rasa bo'lardi-ku?! Axbor Imomxo'jaev, Roman Turpishev kabi futbol jurnalistlari sharhini ting­lab ulg'aygan Gennadiy Denisov futbol matbuotining bugungi saviyasidan ozmi-ko'p xabardor, axir. Savol tug'iladi: Vitaliy Denisov o'zbek futbolida qalam tebratayotgan qaysi jurnalist  maqolalarini o'qigan? Gap-so'zlaridan sezilib turibdiki, u mamlakatimizda chop etiladigan nainki o'zbekcha, balki ruscha futbol nashrlarini ham o'qimaydi. O'qimasa yoki o'qiy olmasa, bunga uning o'zi aybdor. Vitaliy muxlislar o'rtasida og'ir-bosiq futbolchi sifatida tanilgan va shundayligicha qolgani ma'qul. Kichik Denisov bepisand hazillashish oqibatini bilmaydi, chog'i. Keling, bilmaganini o'rgataylik, tushuntiraylik. Agar u bilishni istasa, bildirish barchamizning vazifamizdir. Mabodo bilishni istamasa, umumiy munosabat boshqacha bo'lishi muqarrar. U osmondan tushmagani kabi o'zbek futbol jurnalistikasi ham erdan chiqmagan. Yo'q, o'zbek futbol jurnalistikasini tanqidlardan xoli bayroqdor soha sifatida maqtash fikridan mutlaqo yiroqmiz. E'tirof etish kerakki, soha jurnalistikasida  kamchiliklar va muammolar etarli. Deylik, «Lokomotiv» uzoqqa cho'zilgan omadsizlikdan so'ng nihoyat, inqiroz sari yuz burgan TsSKA ustidan g'alaba qozongach, qaysi jurnalis­timiz Vitaliy Denisovni maydon chetida shodiyona qarshi oldi va uni zafar bilan qutladi? Yoki milliy jamoamizning oktyabr oyidagi uchrashuvlari yakunlangach, qaysi nashr u bilan to'laqonli suhbatlashdi? Hech biri! Bu - bizning kamchiligimiz. Futbolchi istamasada, holi-joniga qo'ymay, suhbat uyushtirish, intervyu olish - o'zbek futbol jurnalistlari uchun burchdir. Aslida futbol nashrlarimiz, «Sport» telekanalining nainki Rossiya, balki Xitoy, Yaponiya, Janubiy Koreya, arab va Evropa futboli muhitida ham maxsus muxbirlari bo'lishi - zamon talabi. Ochig'i, Vitaliysi tushmagur shundan xafa va bu masalada u haq. Ana, Vadim Afonin «Krasnodar» va «Orenburg» jamolarining kubok doirasidagi qarama-qarshiligida ajoyib o'yin ko'rsatdi. Biroq biror o'zbek futbol jurnalisti o'sha uchrashuvni bevosita stadionda kuzatmadi. Kuzatgan bo'lganida, kuzatuv sadosini sezardik. Shu tariqa ajoyib funktsional tayyorgarlikka ega Vadim Afoninning milliy jamoamizga chaqirilmayotgani sabablari noma'lumligicha qolmoqda. Futbol nashrlarida  esa, Samvel Babayanning izohlari chop etilmoqda, xolos. Axir yuzma-yuz ochiq suhbatga nima etsin?! Vadim Afoninning ko'nglida qanday gap-so'zlar yashirinib yotibdi - buni bilmaymiz. Vitaliy Denisov milliy jamoa­miz muammolarini ochiq so'zlay oladigan kam sonli futbolchilardan biri. Biz hozircha shu imkoniyatdan etarli darajada foydalanmayapmiz. Ko'rinib turibdiki, o'zbek futbol jurnalistikasiga muhim va nomuhimni ajratishda ilg'orlik etishmayapti. Futbol nashrlari o'rtamiyona saviyali futbolchilar bilan uyushtirilgan va u qadar zarur hisoblanmaydigan suhbatlarga to'la. Ayni chog'da xalqaro miqyosdagi chiqishlarimiz yo'q, hisobi. Bu - maqolalar yozilmayapti, degani emas, albatta. Aslida xalqaro futbol muammolarini qamrab olgan maqolalar ham mavjud nashrlarimizda. Masalan, futbolni yangi taraqqiyot bosqichiga ko'tarish uchun jahon chempionati final bosqichi ishtirokchilari sonini 40taga etkazish zarurligi Mishel Platini tomonidan aytilishidan ancha avval «Interfutbol» sahifalarida asoslangan. Yoki Osiyo qit'asi bepoyonligini hisobga olib, OFK doirasidagi jahon chempionati saralash o'yinlarini ikki mintaqada o'tkazish va hududiy assotsiatsiyalarni shakllantirish g'oyasi ham vaqtida «Interfutbol»da yoritilgan. Muammo shundaki, bu ishlardan xalqaro futbol jamoatchiligi bexabar. Rus va ingliz tillarida maqola yozish yoki dolzarb mavzuga daxldor chiqishlarni mazkur tillarga tarjima qilish - o'zbek futbol jurnalistikasidagi bosh masala. Shunday yo'ldan bormas ekanmiz, Vitaliy Denisov kabi yana o'nlab futbolchilar, mutaxassislar turli iddaolar qilishdan tiyilishmaydi. Faxrlansa arziydigan yutuqlarimiz mavjud. Biroq mavjud yutuqlarni namoyish eta bilish ham darkor. Qarang, Saudiya Arabistoni va Eron yoshlari o'rtasidagi yarim final uchrashuvi sharhi davomida hisob 5:4 bo'lganida, sharhlovchi «An'anaga ko'ra, arablar hozir gol urishlari kerak», dedi va uning aytgani amalga oshdi. Bizningcha, bu shunchaki, tasodifiy holat emas, balki o'yinni kuzatish va idrok qilish natijasidir. Bu o'rinda kichik shu'la haqida so'zladik, xolos. Holbuki, futbolimizni zalvorli-zalvorli mushohadalar yoritib turibdi. Futbolimiz ham shunga yarasha, ildam odimlamoqda. Bugun «Qizilqum» va «Sho'rtan» jamoalarining etakchilar yoki autsayderlar safiga qo'shilmasliklari aniq, ya'ni har ikkisi uchun endilikda ochko ahamiyatsiz. Shunga qaramay, ochkoga chanqoq «Navbahor» va «Obod» vakillari ularga qarshilik ko'rsata olishmadi. Shu zayl oliy ligada ochko ulashish an'anasi barham topmoqda. Davomi bor. Mazkur mulohazani to'liq holda "InterFUTBOL" gazetasida o'qiysiz.
— deya xabar beradi uff.uz nashri.