Bekoboddagi o'yin natijasi jamoamiz uchun o'ta muhim edi. “Metallurg” maydonida g'alaba qozonish orqali oliy ligada qolish borasidagi imkoniyatlarni o'nglab olish imkoniyati yuzaga kelardi. Lekin, futbolchilarimiz bu safar ham ishonchni oqlay olishmadi. 90 daqiqalik bahs davomida “Metallurg” jamoasi a'zolari raqibdan har tomonlama ustun ekanliklarini amalda isbotlab, yirik hisobdagi g'alabani tantana qilishdi. Ushbu mag'lubiyatdan keyin jamoamiz musobaqa jadvalida ikki pog'ona pastlab, chempionat yakunlanishiga ikki tur qolganida 15-o'rinni band etib turibdi.
Uchrashuvning birinchi bo'limida maydon egalari ustunlikka erishishdi. Shunday bo'lsada, futbolchilarimiz hisobni ochishga erishishdi. Bu vaziyatda Abdumalik Abdullaev raqib himoyachilaridan to'pni olib qo'ydi va ulardan qochib ketib darvozani nishonga oldi. Hisob ochilgach, mezbonlar hujumkorlikni oshirishdi. “Metallurg” futbolchilari Korniychuk darvozasi oldida bir qator xavfli vaziyatlarni yuzaga keltirishdi. Himoyachilarimiz 22-daqiqaga qadar bexato tarzda harakat qilishdi xolos. Esonqulovning to'p oshirishidan keyin qulay vaziyatga chiqib borgan Toshmatov yakuniy zarbani berishda xatoga yo'l qo'ymadi – 1:1. 32-daqiqada esa Esonqulov bu safar Abdullaevga imkoniyat yaratib berdi. “Metallurg” to'purari ham vaziyatdan samarali foydalandi.
Bo'limning yakuniy qismida “Metallurg” jamoamiz himoyasida yuzaga kelgan xatolardan keyin yana ikkita gol urishga erishdi. 43-daqiqada Korniychuk bilan yakkama-yakka vaziyatga chiqib borgan Zohid Abdullaev “dubl”ni rasmiylashtirdi. Oradan hech qancha vaqt o'tmay Dilmurod Karimov chap qanotda to'pga ega chiqib, darvozaning olis burchagini nishonga oldi. Mezbonlarning ikki goliga qadar futbolchilarimizda hisobni tenglashtirish uchun yaxshigina imkoniyatlar bo'lganligini aytish joiz. Dastlab Mahmudovning 24 metrlardan amalga oshirgan jarima zarbasidan keyin Sultonov to'pni qaytarib qolgan bo'lsa Mahmudovning burchakdan uzatgan to'pini Turg'unboev darvozaga yo'llay olmadi. Zarbaga birozgina aniqlik etishmadi.
Uch to'p farqi bilan oldinda borayotgan “Metallurg” futbolchilari ikkinchi bo'limni ancha xotirjam tarzda o'tkazishdi. Mezbonlar xotirjamlikka berilishgan bo'lsada tashabbusni raqib tomoniga o'tishiga imkon berishmadi. Aksincha ustunlikni o'z qo'llarida saqlab turgan holda yana bir bor muvaffaqiyat qozonishdi. 73-daqiqada himoyachilarimizning navbatdagi xatosidan keyin Javohir Esonqulov ham o'z hisobiga gol yozib qo'ydi. Tanaffusdan keyin futbolchilarimizda kam bo'lsada imkoniyatlar bo'ldi. Dastlab Mahmudovning 25 metrlar chamasi uzoqlikdan amalga oshirgan jarima zarbasiga aniqlik etishmagan bo'lsa keyinchalik Aleksinning chap qanotdan jarima maydonchasiga yorib kirib, darvoza tomon bergan zarbasidan keyin Sultonov to'pni maydon tashqarisiga chiqarib yuborishga ulgurdi. Bir safar Artur Parvanov darvozasini muqarrar goldan saqlab qolganligini ham qo'shimcha qilish joiz. O'sha vaziyatda Zohid Abdullaevning kuchli zarbasidan keyin  Parvanov to'pni ajoyib seyv namoyish etib maydon tashqarisiga chiqarib yubordi. Xullas ikkinchi bo'limda boshqa e'tiborga molik voqelik kuzatilmadi.
Tarkibda mahoratli futbolchilarni etishmasligi “Navbahor”ni zarariga ishlamoqda. Ayrim o'yinchilar jarohat tufayli Bekoboddagi bahsda ishtirok eta olmaganliklari ham pand berdi. Bir tur oldin jarohat olgan Tohir Shamsitdinovni maydonga tusha olmaganligi ham tarkibni kuchsizlanishiga olib keldi. Davralar oralig'ida olib borilgan selektsiya ishlaridagi xatoliklar “Navbahor”ni saviyasiz jamoalardan biri deb e'tirof etilishiga sabab bo'lmoqda.
“Metallurg” – “Navbahor” – 5:1 (4:1). 4 noyabr. Bekobod. “Metallurg” o'yingohi. 2323 tomoshabin.
Hakamlar: V.Tseytlin – 9,0, A.Sidorov – 8,3, D.Saylalov – 8,6, R.Kapadze - 9.
Nazoratchi – B.Galeev.
PFL vakili – N.Lutfulin
“Metallurg”: 32. Suhrob Sultonov, 4. Hikmat Hoshimov (S), 6. Dilmurod Karimov (11. Farruh Shotursunov, 77), 8. Ayubxon No''monov (9. Farhod Namozov, 62), 13. Javohir Esonqulov (77. Said Abdujabborov, 77), 14. Davron Karimqulov, 15. Zohid Abdullaev, 17. Mirg'iyoz Suleymanov, 22. Murod Toshmatov, 40. Islom Qobilov, 70. Jahongir Abdumo'minov.
“Navbahor”: 12. Aleksandr Korniychuk (34. Artur Parvanov, 46), 7. Akram Bahriddinov, 9. Dilshod Jabborov (S), 10. Alisher Mahmudov, 21. A'zam Aliev, 24. Ilhom Boydedaev, 26. Qahramon Mahammadjonov, 28. Islom Isoqjonov, 48. Azizbek Turg'unboev (51. Azizbek Mamazoyitov, 64), 50. Abdumalik Abdullaev (19. Vladislav Aleksin, 79), 99. Ruslan Vagapov.
Gollar: M.Toshmatov (22), Z.Abdullaev (32,43), D.Karimov (45), J.Esonqulov (73) - A.Abdullaev (10).
Ogohlantirishlar: I.Qobilov (37), J.Abdumo'minov (49), Z.Abdullaev (90+2) – A.Turg'unboev (15), Q.Mahammadjonov (61).
Eng yaxshi o'yinchilar – Z.Abdullaev – R.Vagapov.
— deya xabar beradi uff.uz nashri.