O'zbekiston milliy chempionatining 28-turida o'z maydonida Namanganning “Navbahor” jamoasini qabul qilgan “Metallurg” mavsumdagi ikkinchi yrik g'alabasini tantana qildi. Bekobodliklar garchi o'yinda birinchi bo'lib gol o'tkazib yuborishgan bo'lishsa-da, raqibni yirik hisobda dog'da qoldirdi va musobaqa jadvalida yana oltinchi o'ringa ko'tarilib olishdi.
Uchrashuv kutilganidek maydon egalarining hujumlari bilan boshlandi. 5-daqiqadayoq Javohir Esonqulov hisobni ochishi mumkin edi. Ammo u jamoadoshining burchakdan etkazib bergan to'pini chamasi 3-4 metrlardan darvozaga yo'llashning chorasini topolmadi. Shundan so'ng bekobodliklar yarim himoyachisi Dilmurod Karimov ikkita qulay vaziyatni qo'ldan boy berdi. Dastavval uning zarbasidan so'ng to'p darvoza to'sini ustidan o'tib ketgan bo'lsa, keyingi zarba kuchsiz bo'ldi va “Navbahor” darvozaboni to'pni qiyinchiliksiz egallab oldi. Mehmonlar esa qarshi hujumdan unumli foydalanishdi. Bekobodliklar darvozasiga gol kiritilgan paytda ham “Metallurg” hujumda edi. Chamasi 25 metrlardan belgalangan jarima zarbasini Dilmurod Karimov amalga oshirdi. Zarbadan so'ng to'p jonli devorda turgan o'yinchilarga tegdi va qarshi hujumda Abdumalik Abdullaev bekobodliklarning ikki himoyachisini ortda qoldirib darvozabon bilan yakkama yakka chiqdi va hisobni ochdi – 0:1.
Muxlislar o'yinning bunday tus olishini kutishmagandi. Ular futbolchilarni tinimsiz olg'a chorlashib, vaziyatni o'nglashni talab etishdi. Javob gollari esa ko'p kuttirmadi. Bekobodliklar 22-daqiqada hisobni tenglashtirishdi. Maydon markazida to'pni egallab olgan Jahongir Abdumo'minov uni jamoa to'purari Zohid Abdullaevga uzatdi. Zohid esa o'z navbatida chap qanotdan jarima maydoniga yorib kirayotgan Murodjon Toshmatovni ko'rdi va to'pni unga oshirdi. Bekobodliklarning 22-raqamli yarim himoyachisi 22-daqiqada o'z hisobiga chiroyli golni yozib qo'ydi. To'p darvozaning olis yuqori burchagiga borib tushdi – 1:1.
Oradan yana o'n daqiqa o'tgach, “Metallurg” hisobda oldinga chiqib oldi. Bu safar hujum o'ng qanotdan boshlandi va Javohir Esonqulovning ajoyib to'p oshirishidan so'ng Zohid Abdullaev raqib posboni qarshisida yakkama yakka qoldi va o'zining to'purarlik qobiliyatini namoyish etdi – 2:1.
Birinchi taym tugashi arafasida bekobodliklarning hujumlari yanada kuchaydi. 40-daqiqada markaziy himoyachi Islomjon Qobilov hujumga qo'shilib, darvozani nishonga olishga urinib ko'rdi. Ammo bu vaziyatda Aleksandr Korneychuk ishonchli o'ynadi. Biroq bekobodliklar taym oxirigacha yana ikki marta gol kiritishga muvaffaq bo'lishdi. Avvaliga Ayubxon No''monovning ajoyib to'p oshirishidan keyin Zohid Abdullaev dublini rasmiylashtirgan bo'lsa, 44-daqiqada Murodjon Toshmatov tashlab bergan to'pni Dilmurod Karimov raqib darvozasiga joylab, hisobning yirik ko'rinish olishini ta'minladi – 4:1.
Ikkinchi taym ham “Metallurg”ning tezkor hujumlari bilan boshlandi. Dastlabki daqiqadayoq chap qanotdan Murodjon Toshmatov barchani ortda qoldirib ketdi va to'pni jarima maydoni ichiga etkazib berdi. Zohid Abdullaev bosh bilan to'p yo'nalishini o'zgartirdi va olis pastki burchakni nishonga oldi. Ammo zarba biroz noaniq chiqdi. 54-daqiqada o'yinning eng chiroyli goli kiritilishi mumkin edi. Chap qanotda Murodjon Toshmatov yana ta'qibchisini aldab o'tdi va to'pni 11 metrlik nuqtaga oshirdi. Zohid Abdullaev esa to'pni erga tushirmasdan darvozaning yuqori burchagini ko'zladi. Ikkinchi taymda maydonga tushgan Artur Parvanov mo''jiza ko'rsatdi va jamoasini muqarrar goldan saqlab qoldi.
Uchrashuv poyoniga etib borgan sari “Navbahor”ning mag'lubiyati tobora oydinlashib bordi. O'yin tugashiga 18 daqiqa qolganda bekobodliklar yana chap qanotdagi faolliklari evaziga hisobdagi farqni yanada oshirishdi. Dilmurod Karimov raqib himoyachisini ta'qib etib bordi va to'pni undan olib qo'ydi va Javohir Esonqulovga tashladi. Javohir esa chiroyli gol muallifiga aylandi – 5:1.
Uchrashuv oxirida “Metallurg” murabbiylari jamoaning yosh o'yinchilariga ham imkon berishdi. Endshpilda o'yinga qo'shilgan jamoa hujumchilaridan biri Farrux Shotursunovning birgina o'zi ikkita gol kiritishi mumkin edi. Biroq, bu hujumchiga omad farishtasi hozircha qiyo boqmayapti. Shu tariqa o'yinda hisob boshqa o'zgarmadi va “Metallurg” mavsumdagi ikkinchi yirik g'alabasini rasmiylashtirdi.
 “Metallurg” – “Navbahor” – 5:1 (4:1). 04.11.2016 yil. 15:00. Bekobod. 2323 tomoshabin.
Hakamlar: Vladislav Tseytlin – 9,0, Aleksandr Sidorov – 8,3, Doniyor Saylalov – 8,6, Ravshan Kopadze – 9.
Nazoratchi hakam: Bulat Galeev.
O'zPFL vakili: Noil Lutfulin.
Gollar: 0:1 – Abdumalik Abdullaev (10), 1:1 – Murodjon Toshmatov (22, pas – Zohid Abdullaev), 2:1 – Zohid Abdullaev (32, pas – Javohir Esonqulov), 3:1 – Zohid Abdullaev (42, pas – Ayubxon No''monov), 4:1 – Dilmurod Karimov (45, pas – Murodjon Toshmatov), 5:1 – Javohir Esonqulov (72, pas – Dilmurod Karimov).
 “Metallurg”: 32. Suhrobjon Sultonov, 4. (s) Hikmat Hoshimov, 6. Dilmurod Karimov (11. Farrux Shotursunov, 77),  8. Ayubxon No''monov (9. Farhod Namozov,61), 13. Javohir Esonqulov (77. Saidjon Abdujabborov, 77), 14. Davronbek Karimqulov, 15. Zohid Abdullaev, 17. Mirg'iyos Sulaymonov, 22. Murodjon Toshmatov, 40. Islomjon Qobilov, 70. Jahongir Abdumo'minov.
Zahira: 91. Zafar Safoev, 19. Ergash Ismoilov, 23. Sherzod Jalilov, 27. Muhammadodil Qahramonov.
“Navbahor”: 12. Aleksandr Korneychuk (34. Artur Parvanov, 46), 7. Akrom Bahriddinov, 9. Dilshod Jabborov (s), 10. Alisher Mahmudov, 21. A'zamjon Aliev, 24. Ilhomjon Boydedaev, 26. Qahramon Muhammadjonov, 28.Islombek Isoqjonov, 48. Azizbek Turg'unboev (51. Azizbek Mamazoitov, 63), 50. Abdumalik Abdullaev (19. Vladislav Aleksin, 79), 99. Ruslan Vagapov.
Zahira: 27. Murodjon To'ychiboev, 33. Tohirjon Shamsiddinov, 35. Bilol Sharofiddinov, 83. Javohirbek Olimjonov.
Ogohlantirishlar: Islomjon Qobilov (37), Jahongir Abdumo'minov (49), Zohid Abdullaev (90+2) – Azizbek To'rg'unboev (10), Qahramon Muhammadjonov (61).
Uchrashuvning eng yaxshi o'yinchilari: Zohid Abdullaev – Ruslan Vagapov.
— deya xabar beradi uff.uz nashri.