«Navbahor»ga qarshi kechgan uchrashuvda 5:1 hisobidagi g'alabadan keyin “Metallurg” FK jamoa boshlig'i Shavkat Saidovning o'yin haqidagi fikrlarini bildirdi.
Shavkat Saidov, “Metallurg” FK jamoa boshlig'i: Bugun chiroqli, hujumkor futbol namoyish etdik. Yirik g'alaba uchun barcha futbolchilarimizga minnatdorchilik bildiraman. Birinchi bo'lib o'z darvozamizdan gol o'tkazib yuborgan bo'lsakda, Toshkentda “Bunyodkor”ga qarshi kechgan uchrashuvdan farqli o'laroq yaratilgan vaziyatlardan unumli foydalandik. Yigitlar o'zlarini yo'qotib qo'yishmadi. Butun o'yin davomida hujumkor futbol namoyish etishdi va Bekobod ahlini xursand etishdi.
“Navbahor” shonli tarixga ega, mamlakatimizning etakchi klublaridan biri bo'lib kelgan. Bu jamoaning oliy ligada o'z o'rni, mavqeini saqlab qolishini biz – barcha bekobodliklar, “Metallurg” futbol klubi vakillari chin dildan xohlaymiz. Bugun ular uchrashuvni juda faol boshlashgandi. Ammo ayni paytda jamoaning egallab turgan mavqei o'yinchilarning psixologiyasiga qattiq ta'sir ko'rsatganligi sezilib turdi. Boshlagan ishlarini oxirigacha etkaza olishmadi. Chiziqlardagi uzilishlardan, bo'shliqlardan esa biz unumli foydalandik. Birinchi taymning o'zidayoq yirik hisob qayd etilganidan keyin esa “Navbahor” qarshilikni to'xtatdi. Keyingi uchrashuvlarda “Navbahor”ga omad tilayman, deydi Shavkat Saidov.
— deya xabar beradi uff.uz nashri.