Qadrli futbol ishqibozlari «InterFUTBOL» gazetasining seshanba sonida bir-biridan qiziqarli maqolalarni mutolaa qilishingiz mumkin. Esklyuziv materiallar, tahlil va suhbatlar  ham sizni befarq qoldirmaydi degan umiddamiz. Demak, gazetamizning 89-sonida nimalarni o'qish mumkin? - Yashil maydonlarga boshlansin havas Yana dalalarga boshlaydi havas, Bog'larda xazonlar yonadi lov-lov. Do'stlarim, bu kuzning barglari emas, Mening yuragimdan to'kilgan olov... Boqiy dunyo bilan yuzlashgan ardoqli shoirimiz Abdulla Oripov qalamiga mansub bu misralar bag'rida olam-olam ma'no mujassam. Deylik, futbol muxlisi uchun shoir nazarda tutgan «dalalar» - jahon chempionatining final bosqichi. Havas futbol muxlisini o'sha «dalalar» sari boshlayveradi... - Tayyorgarlik boshlandi, muammo yo'q Xabaringiz bordir, O'zbekiston milliy jamoasi 10 noyabr kuni Toshkentda Iordaniya termasiga qarshi o'rtoqlik uchrashuvida maydonga tushadi. Payshanba kuni «Paxtakor» markaziy stadionida o'tkaziladigan o'yin 15 noyabr sanasi Janubiy Koreya termasi bilan bo'ladigan JCh-2018 saralash bosqichining muhim bahsiga tayyorgarlik vazifasini o'tab beradi. Ushbu ikki uchrashuvga qaratilgan tayyorgarlik jarayoni 4 noyabr­dan boshlandi. - Kim ketaru, qolar? 28-tur yakunlariga ko'ra ham, chempion nomi aniqlanmadi. Ammo faqat rasman shunday. Amalda esa qaysi klub chempionlik rutbasini olishini bilib bo'ldik chog'i - «Lokomotiv» navbatdagi g'alabani rasmiylashtirgancha o'z tarixidagi ilk oltin medalni yutishga juda va juda yaqinlashdi. «Temiryo'lchilar» endi keyingi o'yinda «Metallurg»ga yutqazmasalar kifoya, 30-tur natijalari chempionlik taqdiriga ta'sir qilmaydigan holat yuzaga keladi... - Ilhom ShARIPOV:«Mahalliy iqtidorlar tayanchimiz» «Dinamo» yana oliy ligaga qaytdi - bu xabar ko'hna va yurtimizning eng chiroyli shaharlaridan biri Samarqanddagi har bir futbol muxlisiga xushkayfiyat bag'ishladi. Tan olish lozim, Ilhom Sharipov boshqaruvidagi jamoa butun mavsumda ko'tarinki ruhni pasaytirmadi va finish marrasiga 3ta tur qolgan vaqt oliy liga yo'llanmasini rasman naqd qildi. Shubhasiz, «Dinamo»dek o'z tarixiga ega klubning elitada ishtirok etishi ajoyib, ammo kelasi mavsum jamoa qay ko'rinishda bo'ladi? Yangilangan «Dinamo»dan nimalar kutish mumkin? Bu savollar ko'pchilikni qiziqtirayotgani tayin. Shu bois, jamoa bosh murabbiyi bilan bafurja suhbatlash asnosida eng muhim mavzular yuzasidan fikr almashdik. - Kim ko'p o'ynagan? Sir emaski, o'zbekistonlik legionerlarning aksariyati Rossiya chempionatida o'ynab, mahalliy muxlislar yoqimtoyiga aylanishgan. Ular orasida ushbu birinchilikda eng ko'p uchrashuv o'tkazgan futbolchilar kimligini bilasizmi? Mabodo bundan bexabar bo'lsangiz, Sports.uz ijodkorlari tomonidan tayyorlangan ushbu maqola orqali mavzu qahramonlari bilan tanishishingiz mumkin. - Rejali ish samarasi O'tgan haftaning eng g'alati o'yinlaridan biri Rossiya chempionatida bo'lib o'tdi. RFPLning 12-turida «Ural» o'z maydonida «Terek»ni qabul qildi va 1:4 hisobida mag'lubiyatga uchradi. Uchrashuvning birinchi bo'limi odatiy o'tgan va 1:1 hisobi qayd etilib turgan edi. Hammasi ikkinchi bo'limda boshlandi - himoyachilar avtogol urishga, darvozabon Dmitriy Arapov esa xurmacha qiliq namoyish etishga tushib ketishdi. Vaziyat shu qadar absurd ko'rinish oldiki, uchrashuvni sharhlab borayotgan jurnalist Timur Juravel ham chidab tura olmadi va bunday o'yinni tomosha qilish uyat ekanini ta'kidladi. - Ishqibozlik va ishbilarmonlik Yaqinda tanishlardan biri taklif kiritib qoldi: «Oliy liga rivojlanishi uchun klublarni xususiylashtirish kerak». Umuman, uning gaplari yangilik emas. Bu haqda ilgari ham ko'p gapirilgan va xususiylashtirishning turli yo'llari aytilgan. Agar shunday islohotga yo'lga qo'yilsa, klublar ta'minotini yo'lga qo'yadiganlar topilishi ham ta'kidlangan. Bu borada aytiladigan yangi gaplar yo'qdir, balki. Ammo... - Rustam AShURMATOV:«Mavsumni kamida bita sovrin bilan yakunlashimiz shart» Sir emaski, oliy liganing aksariyat jamoalarida yoshlarga e'tibor past. Asosan natijani o'ylab, tajribali futbolchilar va saviyasi past legionerlarga tayanilmoqda. «Bunyodkor»da esa buning aksini ko'ryapmiz. Doston Hamdamov, Akrom Komilov, Otabek Shukurov, Eldor Shomurodov kabilar bugungi kunda «qaldirg'ochlar»ning asosiy tarkibida to'p surishmoqda. Bunday iqtidorli futbolchilar qatoriga himoyachi Rustam Ashurmatovni ham bemalol kiritish mumkin. Odatda, boshqa amplua vakillaridan ko'ra, mudofaa chizig'idagilarning tajribaliroq bo'lishlari talab etiladi. Rustam esa, o'z mehnati va intilishi evaziga oliy liganing ko'zga ko'ringan himoyachilari safiga qo'shildi. Biz navbatdagi mashg'ulotlardan so'ng ushbu futbolchidan intervyu oldik. - Qaysi hakam ma'qul? Quyidagi statistik maqolada so'nggi 5 yil davomida milliy jamoamiz ishtirokidagi rasmiy o'yinlarda ishlagan hakamlar xususida so'z boradi. Demak, mamlakatimiz bosh jamoasi 2011 yildan buyon jami 46ta rasmiy uchrashuvda maydonga tushdi va ularni 24 nafar hakam boshqardi. Sir emas, OFK so'nggi vaqtlarda hakamlik masalasiga jiddiy e'tibor qaratmoqda. Shunga muvofiq, referilar ham o'zlariga biriktirilgan uchrashuvlarni imkon qadar yuqori saviyada boshqarishga intilishyapti. Tushunarliki, kamida yana bir davomida Eron, Qatar, Xitoy, Suriya va J.Koreya vakillari jamoamiz o'yinlariga tayinlanmaydilar. Shunday ekan, OFK uchun O'zbekiston termasi ishtirokidagi o'yinlarga Saudiya Arabistoni va Yaponiya kabi mamlakat hakamlarini jo'natish eng maqbul yo'ldir. - Milosh Krasich:«Rossiyaga qaytardim, ammo pul uchun emas» Serbiyalik vinger Milosh Krasich yaqinda 32 yoshga to'ldi. Yarim himoyachi o'z umrining 6 yilini TsSKA (Moskva)ga bag'ishlagach, «Yuventus»da bir mavsum yorqin nur sochdi. Biroq keyinchalik Antonio Konte sxemasiga to'g'ri kelmadi va deyarli 3 yil davomida Turkiya va Frantsiya chempionatlari aro sarson yurdi. Milosh bu vaqtda ahyon-ahyondagina o'zini eslatib turdi. U nihoyat, o'tgan yili o'z jamoasini topdi - ayni payt Polshaning «Lexiya»sida sardorlik qilmoqda... - Sarmoya samarasi qani? YoZGI TRANSFERLARNING 7ta ENG BESAMAR XARIDI. Muayyan bir transferning nechog'li omadli chiqqani yoki behudaligi ma'lum muddat, loaqal bitta to'liq mavsumdan keyin oydinlashadi. Lekin xaridning muvaffaqiyatli ekanligiga shubha uyg'onishi uchun bir necha oy etarli. Soccer.ru sayti aynan  oxirgi transferlar mavsumida amalga oshirilgan kelishuvlarga nazar solib,  ular orasidan shunday shubha uyg'ota boshlaganlarini aniqladi. - Youngstars: Manuel Lokatelli – yangi Albertini Ishonchimiz komil, «Milan»-«Yuventus» o'yinini tomosha qilgan aksariyat muxlislar «rossonerlar» tarkibidagi 18 yoshli yigitcha - Manuel Lokatelli raqibning mohir yarim himoyachilaridan qanday o'tib ketganini huzurlanib kuzatishgan. Shuningdek, uning Buffon qo'riqlayotgan darvozani qay tariqa nishonga olganini ham... - Joze Mourino: «Fener» futbolcha ayyorlikdan foydalandi» Bechora Joze Mourino. Uning ishlari yoppasiga orqaga ketyapti. Qarang, yozgi tranfserlar bozori payti portugaliyalik mutaxassisning talabi bilan etarlicha mablag' sarflagan «Manchester Yunayted» na Angliya premer-ligasi va na Evropa Ligasida katta xarajatga munosib ishtirok etyapti. «Qizil iblislar» avvalgi haftaning payshanba oqshomi EL guruh raundi 4-turi doirasida «Fenerbaxche» maydonida mag'lubiyatga uchrashdi va «Benazir»ning yana jurnalistlarning «achchiq-achchiq» savollariga javob izlashiga to'g'ri keldi. - Krishtianu Ronaldu:«Ilhom manbai – o'zimman» «Real Madrid» vingeri Krishtianu Ronaldu barcha futbol fanatlariga birdek yoqmasligi, ya'ni ayrimlar unga faqat nafrat yoxud hasad ko'zi bilan qarashlarini oddiy hol o'rnida ko'radi. Boshqacha aytganda, u muxlislar  munosabatining xilma-xilligidan zarracha tashvish chekmaydi. Axir ayrimlarning aynan nafrat aralash munosabatlari portugaliyalik uchun qo'shimcha motivatsiya sifatida xizmat qiladi. - Maktubingizni oldik: BEPARVOLIK OQIBATI O'ylab-o'ylab achinasan, jahling chiqadi, kuyunasan, jig'ibiyron bo'lasan... Men «Navbahor»ning bugungi holatini nazarda tutyapman. Axir kechagina Namangandagi stadionga muxlis sig'masdi, bugun hayhotday arena deyarli bo'sh qolyapti. Nega shunday bo'ldi? Mutasaddilar nega beparvolar? Mana, shonli tarixga ega jamoamiz bir oyog'i bilan birinchi ligada turibdi. Nahotki, vaziyat shu darajaga kelishigacha qarab turish mumkin bo'lsa? HAMIShA BIRGA BO'LAYLIK AZIZLAR!!!
— deya xabar beradi uff.uz nashri.