“Bunyodkor” – “Nasaf” 0:1 uchrashuvi yakunlangach, 2000/2001 yillarda tavallud topgan yosh futbolchilarimiz murabbiyi – Eldor Moylievdan o'yin haqidagi fikrlari bilan o'rtoqlashishni so'radik. “Bugun o'zaro kuch sinashgan ikkala jamoa ham teng kuchga ega. Bizga nisbatan “Bunyodkor” jamoasida xalqaro musobaqalar havosidan nafas olgan futbolchilar ko'pchilik edi. Xabaringiz bor, ular mamlakatimizning U-16 terma jamoasining asosini tashkil qilishadi. Shuning uchun yosh futbolchilarimizni ruhan ham bugungi o'yinga tayyorlashga urindik. Natijada shogirdlarimiz o'yinda o'zlarining mustahkam irodasini namoyish etishdi. Ularda g'alabaga bo'lgan ishtiyoq ham kuchli edi. Natijasini ko'rib turibsizlar, shogirdlarimiz maqsadiga erishdi. Shogirdlarimga rahmat aytaman, ko'rsatmalarimni to'liq bajarishga harakat qilishdi. Darvozabonimiz? Ha u ham U-16 terma jamoamiz safida o'ynagan. Juda tirishqoq va hozirdan ma'suliyatni zimmasiga ololadi. O'z ustida tinmasdan ishlaydi. O'tgan ikki uchrashuvda ham o'z darvozasi dahlsizligini saqlab qoldi. Men shuni ishonch bilan ayta olamanki, shogirdlarim ichida darvozabonimiz bilan birga 4-5 nafari bemalol o'rinbosarlarimiz tarkibida to'p tepishga tayyor bo'lib qolishdi. Klubimizda mana shunday kelajagi porloq futbolchilar etishib chiqayotganidan faxrlanamiz. Biz murabbiylarga klubimiz rahbariyati tomonidan doimo katta e'tibor qaratiladi. Yosh futbolchilarimizni tarbiyalash uchun, ular bilan o'quv mashg'ulotlari o'tkazish uchun, barcha kerakli shart – sharoitlar bekamu-ko'st muhayyo qilingan. Biz murabbiylar esa ana shu ishonchni va e'tiborni oqlashimiz – bosh jamoamiz va mamlakatimizning turli yoshdagi terma jamoalarimizga munosib futbolchilarni tayyorlab berishimiz kerak.   “Nasaf” klubi oldiga har doim yuqori maqsadlar qo'yiladi. Biz bu maqsadni, klubimiz falsafasini, hozirdan shogirdlarimizga singdirib borayapmiz va shu yo'lda mehnat qilayapmiz. Umid qilamanki, bu harakatlarimiz kelajakda o'z mevasini albatta beradi”, – deydi Eldor Moyliev.
— deya xabar beradi uff.uz nashri.