Ukraina Premer-ligasi ishtirokchisi "Stal" klubi a'zolari marhum paxtakorchilar xotirasini yod etishdi.   1926 yil Dneprodzerjinsk shahrida tashkil etilgan ushbu klub avvalgi mavsumda o'zining Ukraina Premer-ligasida debyutini o'tkazib, 8-pog'onani egalladi. Joriy mavsumda ham jamoa 14 turdan keyin 8-o'rinni band etgan. 1979 yilning 11 avgust kuni "Paxtakor" Dneprodzerjinsk shahri osmonida aviahalokatga uchragan va unda jamoamizning 17 nafar a'zosi halok bo'lgan. 28 oktyabr kuni "Stal" futbol klubi rahbariyati, jamoa a'zolari va faxriylari "Paxtakor" a'zolari xotirasiga bag'ishlab Kurilovka qishlog'ida bunyod etilgan xotira haykaliga tashrif buyurishdi. Qishloq yig'ini vakili S.Grechanovskiy "Stal" a'zolariga mash'um halokat va haykalning qurilishi borasida ma'lumot berib o'tdi. Yodga olish marosimidan keyin "Stal" prezidenti Vardan Israelyan mahalliy "Paxtakor-Kurilovka" jamoasi vakillariga klub sharflarini sovg'a qildi. "Paxtakor" futbol klubi millionlar o'yinidagi do'stlik, ahillik va hamkorlikni hamisha qadrlaydi. "Stal" futbol klubiga "Paxtakor-79" jamoasi a'zolariga ko'rsatilgan hurmat va ehtirom uchun katta minnatdorchilik bildiramiz va ushbu jamoaga omad tilab qoladi.  
— deya xabar beradi uff.uz nashri.