Turkiyada «Fenerbaxche»ga qarshi kechgan o'yin ko'rsatib berdiki, «Manchester Yunayted»da juda katta inqiroz yuzaga kelmoqda. Aftidan, voqealar rivoji shunday davom etadigan bo'lsa, Mourino klub tarixidagi eng yomon natijani qayd etishi va klubdan sharmandalarcha haydalishi mumkin. Xo'sh, bu omadsizliklarning sababi nimada? Nega Jozedek tajribali mutaxassis ham «qizil iblislar»ni futbol ummonining aysberglaridan himoya qila olmayapti? ASOSIY AYBDOR — MOURNING O'ZI Oldingi sonlarimizdan birida ham xuddi shu mavzuga to'xtalib o'tgandik va Mourinoning asosiy xatosi Ueyn Runini jamoadan ketkazmoqchi bo'layotgani ekanligini ta'kidlagandik. Buni qarangki, fikrimiz tezda o'z isbotini topmoqda. Internet nashrlarida Runining «Manchester Yunayted»dan ketishi haqidagi xabarlar tarqala boshlagan zahoti Manchester ko'chalarida Mourinoga qarshi namoyishlar kuchaymoqda. Muxlislar shu paytga qadar Jozeni juda yaxshi ko'rishardi, shu bois uning «Manchester Yunayted» murabbiyligini o'z qo'liga olishi katta bayram qilingandi. Muxlislar portugaliyalik mutaxassisni Manchesterga olib kelish uchun har narsaga tayyor edi. Endi esa uni jamoadan ketkazish uchun muxlislar har narsaga tayyor bo'lmoqda.
Asosiy xato mutaxassisning xarakteri bilan bog'liq. Aftidan, u klubda o'zidan obro'liroq odam bo'lishini, ayniqsa, biror-bir futbolchining obro'si, nufuzi o'zinikidan yuqoriroq bo'lishini hazm qila olmaydi, shekilli. Har holda uning qilgan ishlari shunday xulosa chiqarishga sabab bo'lmoqda va aynan shu ishlari uning natijalariga salbiy ta'sir ko'rsatyapti. QADRIYaTLARNI QADRLASh KERAK Nafaqat futbolda, balki, dunyoning har bir jabhasida qadriyatlarning o'rni bo'lakcha. Istalgan millatning ruhiyatini cho'ktirish uchun uning qadriyatlarini oyoqosti qilish kifoya. Joze ham ana shunday qadriyatlarga tupurgan murabbiy sifatida gavdalanmoqda. Tan olish kerak, Runi, Raul kabi futbolchilar o'z jamoalarining qadriyatlari kabi edi. Bu qadriyatlardan ayrilish esa bevosita klubning o'yiniga salbiy ta'sir ko'rsatardi va shunday bo'ldi ham. Bilmadim, nimani o'ylab bu ishni qildi, ammo bir paytlar «Real»ni Rauldan judo qilgan Joze Runini jamoadan ketkazishga urina boshladi-yu, o'ziga nisbatan norozilikni kuchaytirib yubordi. Aslida, shundoq ham Bastian Shvaynshtayger bilan bog'liq mojarolar, uning klubdan oshkora chetlatilishi va qattiq siquvga olinishi aksariyat muxlislarning keskin noroziligiga sabab bo'lgandi. Chunki Bastian bunday kamsitilishlarga munosib futbolchi emasdi. Ammo Joze o'zining tor qarashlari, xudbin fikrlari bilan germaniyalik tajribali o'yinchini chiqitga chiqarib qo'ydi. Aksiga olib, uning o'rniga markaziy yarim himoya chizig'iga qo'yilgan Pol Pogba hech narsaga yaramayapti. Keling, ochig'ini tan olaylik, «Manchester Yunayted»ning o'yin uslubidan kelib chiqadigan bo'lsak, jamoaga Pogbadan ko'ra Shvaynshtaygerning foydasi ko'proq tekkan bo'lardi. Hatto portugaliyalik mutaxassis tomonidan bosim ostida qoldirilgan Mxitaryan ham asosiy tarkibda to'p surishga munosib edi. Ehtimol, Mour Pogba hech narsaga yaramayotganini bilib turgandir, lekin buni tan olishni istamaydi. Axir fransiyalik og'ir karvonni sotib olishni astoydil xohlagan va buning uchun «MYu» rahbarlarini katta pul to'lashga ko'ndirgan ham shaxsan Mourning o'zi edi-da! U xato ish qilgani oshkor bo'lmasligi uchun hech narsaga qaramasdan Pogbani himoya qilmoqda. Davomi Penalti.uz da
— deya xabar beradi uff.uz nashri.