Bugun O'zbekiston milliy terma jamoasi Toshkentda Iordaniya futbolchilariga qarshi o'rtoqlik uchrashuvida maydonga tushadi. Ushbu o'yin FIFA kunlari doirasida o'tkazilayotgani bois, rasmiy maqomda bo'ladi va tabiiyki, reytingdagi o'rnimizga ta'sir qiladi. Lekin boshqa tomondan olib qarasak, bu bahsda muxlislar ochiq futbol ko'rishmasa kerak. Boisi, 15 noyabr kuni terma jamoamizni Seulda Janubiy Koreyaga qarshi o'tkaziladigan o'ta muhim uchrashuv kutib turibdi. Samvel Babayan JCh-2018 3-saralash bosqichidan o'rin olgan ushbu bahs oldidan katta tavakkalga yo'l qo'ymasa kerak. Jarohatlardan saqlanish va qolaversa, Koreya uchun asosiy qartalarni ochmaslik uchun ham bugun deyarli ikkinchi tarkibga ishonch bildirilsa kerak.
Terma jamoamiz 4 noyabr kunidan e'tiboran Iordaniya va Janubiy Koreyaga qarshi kechadigan o'yinlarga tayyorgarlikni olib bormoqda. Mashg'ulotlar «Jar» va «Paxtakor» stadionlarida bo'lib o'tmoqda. Lekin 8 noyabr kuniga kelibgina Samvel Babayan to'liq tarkibda mashg'ulot o'tkazdi. Shunda ham terma jamoamizning barcha futbolchilari to'laqonli mashg'ulotda qatnashishmadi. Rossiya chempionatida to'p suradigan legionerlar - Odil Ahmedov («Krasnodar»), Vitaliy Denisov («Lokomotiv») va Vadim Afonin («Orenburg») 7 noyabr kuni Toshkentga etib kelishdi. Mashg'ulotlarga esa 8 noyabrdan qo'shilishdi. Shu kuni Toshkentning «Lokomotiv» klubi hujumkor yarim himoyachisi Marat Bikmaev mashg'ulotlarni faqatgina kuzatish bilan cheklandi. Ma'lum bo'lishicha, u biroz shamollab qolgan ekan. BAAning «Al-Shabab» klubida o'ynayotgan Aziz Haydarov esa jarohati sababli mashg'ulotlarda qatnashmayapti. Uning qachon umumiy guruhga qo'shilishi hozircha noma'lum. Haydarov BAA pro-ligasi doirasidagi o'yinda jarohat olgan edi. Eldor Suyunov esa kechadan mashg'ulotlarga qo'shildi. qolgan barcha futbolchilarning salomatliklari joyida. Mashg'ulotlar avvaldan belgilangan tartibda olib borilyapti. Darvozabonlar bilan Anvar Rashidov ishlayapti. Futbolchilarga esa Samvel Babayan o'z yordamchilari bilan bosh-qosh bo'lmoqda.
O'zbekiston va Iordaniya terma jamoalari shu kungacha o'zaro 11ta o'yinda maydonga tushishgan. Uchrashuvlarning 5tasida futbolchilarimizning qo'llari baland kelgan. Beshta o'yinda durang natija qayd etilgan. Faqat bir marotaba Iordaniya terma jamoasi ko'chasida bayram bo'lgan. To'plar nisbati - 18:12, terma jamoamiz foydasiga. Yagona mag'lubiyatni 2012 yilning 15 avgust kuni qabul qilib olganmiz. O'shanda Amman shahrida ikki terma jamoa o'rtasida o'rtoqlik uchrashuvi tashkil etilgan va unda maydon egalari g'alaba  qozonishgan edi (2:0). Ushbu jamoalar o'rtasida kechgan o'yinlardagi eng yirik hisob 2008 yilning 22 mart kuni Toshkentda o'tkazilgan o'yinda kuzatilgan. O'rtoqlik maqomidagi o'sha uchrashuvda futbolchilarimiz 4:1 hisobida zafar quchishgan edi. To'g'ri, terma jamoamiz penaltilar seriyasida ham mag'lubiyat alamini totib ko'rgan. Yodingizda bo'lsa, 2013 yilning 10 sentyabr kuni Toshkentda kechgan JCh-2014 «pley-off» bosqich doirasidagi o'yinda aynan penaltilar seriyasida mag'lubiyatga uchragan edik. «Paxtakor» stadionida kechgan o'yinning asosiy va qo'shimcha bo'limlarida durang (1:1) qayd etilgan. Lotereyalar bahsida iordaniyaliklar 9:8 hisobida ustun kelishgandi. Bugun o'zaro o'n ikkinchi to'qnashuv bo'ladi. Iordaniya termasiga qarshi kechadigan o'rtoqlik o'yini oldidan o'z vaqtida terma jamoamizda to'p surgan futbolchilarning fikrlari bilan qiziqdik.
Bahodir Nasimov, «Bunyodkor» hujumchisi:
- Terma jamoamizni ikkita muhim uchrashuv kutib turibdi. Lekin bu o'yinlar orasida baribir, asosiy urg'u Janubiy Koreya bilan bo'ladigan bahsga qaratiladi. Iordaniya bilan kechadigan uchrashuv 15 noyabr kungi o'yinga tayyorgarlik vazifasini o'tab beradi. Tabiiyki, Iordaniya bilan bo'lib o'tadigan uchrashuvga katta vazifa va talablar qo'yilmaydi. Ammo o'yinning qanday maqom va nufuzda ekanligidan qat'iy nazar, g'alaba hamisha yoqimli bo'lib kelgan. qolaversa, terma jamoamiz o'z maydonida o'ynaydi. Stadionga tashrif buyuradigan muxlislar uylariga ko'tarinki kayfiyatda qaytishlarini ta'minlash kerak. Men har ikki o'yinda ham futbolchilarimizga g'alaba yor bo'lishini chin dildan tilayman.
Aziz Ibragimov, «Buxoro» yarim himoyachisi:
- Fikrimcha, eng qiyin o'yin Seulda bo'lib o'tadi. Janubiy Koreya guruhimizdagi eng kuchli raqib. Garchi hozir guruhda 3-o'rinni egallab turgan bo'lishsada, bu ularning shunga munosib ekanliklarini ko'rsatmaydi. Chunki kurash hali oldinda. Asosiy o'yinlar bizni endi qarshi oladi. Shu bois, turnir jadvalidagi holatga aldanib qolmaslik kerak. Iordaniya bilan bo'ladigan o'yindan men faqat g'alaba kutyapman. Bu borada milliy jamoadagi do'stlarimga omad tilayman. Har holda termamiz hamma qartalarni ochib o'ynamasa kerak. Sababi, bu o'yinni koreyalik «ayg'oqchilar» «Paxtakor» stadionidan kuzatishlari mumkin. Koreyani nimaning hisobiga mag'lub etish mumkin? O'ylashimcha, o'yinga tanlangan to'g'ri taktika evaziga bu ishni uddalasa bo'ladi. Koreyslar o'ta tartibli o'yin namoyish etishadi. Men o'ynagan paytdagi Koreya bilan hozirgisining o'rtasida farq bormi? Albatta, bor. Lekin ko'pchilik o'ylagandek, hozirgi tarkib kuchliroq emas. Shaxsan menga bundan 5-6 yil avvalgisi kuchliroq ko'rinyapti. To'g'ri, bugungi Koreya safida Angliya, Germaniya kabi kuchli chempionatlarda o'ynaydigan futbolchilar bor. Ammo ular terma jamoa o'yinlariga optimal sport formasida kelishmayapti. Kamoliddin ALIMOV Manba: "InterFUTBOL" gazetasi
— deya xabar beradi uff.uz nashri.