«Dinamo» jamoasi muddat avval Oliy Liga yo'llanmasini qo'lga kiritgach, Samarqanddagi so'nggi o'yindan keyin aksariyat futbolchi va muxlislar taqdirlanishdi.
Jumladan, jamoaning tajribali himoyachisi, butun mavsum davomida yoshlarga o'rnak bo'la olgan Aleksey Nikolaev klub tomonidan «Yilning eng yaxshi futbolchisi» deb topildi. Futbolchiga sovrinni Samarqand viloyat Futbol Federatsiyasi vitse-prezidenti Shuhrat Sayfullaev topshirdi.
Birinchi Ligada eng ko'p o'yin o'tkazib, eng kam gol (19) o'tkazgan Mixail Naumov «Eng yaxshi darvozabon» deb e'tirof etildi. Mohir posbonga faxriy yorliq hamda esdalik sovg'ani Samarqand viloyat «Dinamo» Sport Jamiyati raisi Server Osmonov topshirdi.
«Dinamo» jamoasining 21 yoshli hujumchisi Amirjon Safarov joriy mavsumda mavsumning kashfiyotlaridan biri bo'ldi. Safarov chempionat davomida «Dinamo»ning g'alabalariga katta hissa qo'shib, 23 ta gol bilan to'purarlar ro'yxatida etakchilardan biri bo'ldi. Aynan shu bois, u «Dinamo»ning 2016 yildagi «eng yaxshi to'purari» faxriy yorlig'i hamda sovrini bilan taqdirlandi. Unga sovg'ani «Bunyodkor» hujumchisi Bahodir Nasimov topshirdi.
2016 yilgi mavsum davomida «Dinamo» jamoasini xoh uydagi, xoh safardagi o'yinlarida ashaddiy muxlis Shavkat Burhonov sevimli jamoasini qizg'in qo'llab-quvvatlab, muxlislarga o'rnak bo'la oldi. Fidoyilikka javoban ashaddiy ishqiboz «Dinamo» klubi tomonidan «Yilning eng jonkuyar muxlisi» deb topilib, faxriy yorliq va «Dinamo» klubi futbolchilari dastxati tushirilgan to'p bilan taqdirlandi.
Taqdirlash marosimidan fotojamlanmani «Galereya» bo'limidan tomosha qilishingiz mumkin.
«Dinamo» klubi matbuot xizmati
— deya xabar beradi uff.uz nashri.