Bundesligadagi joriy mavsum asta-sekin qizg'in pallaga kirib bormoqda, zero 9ta tur ortda qoldi: yangi futbolchilarning yangi jamoa o'yiniga moslashishlari uchun etarli muddat. Demak, o'zini ijobiy tomondan namoyon etishga ulgurgan o'yinchilar haqidagi dastlabki taassurotlar bilan o'rtoqlashish mavridi keldi. Quyidagi ro'yxatda yozgi transfer paytida Germaniya chempionatiga yo'l olib, hozircha faqat yorqin tasavvur uyg'otayotgan charm to'p ustalari haqida so'z boradi.
Duglas KOSTA
«Shamol kabi uchqur» ta'rifi aynan braziliyalik futbolchiga mos. «Bavariya»ning chap qanotidan o'rin egallagan Duglas Kosta har qanday raqibdan o'zib ketishni uddalaydi. Joriy mavsumda maksimal tezligi soatiga 34,2 kilometr etib belgilangan o'yinchini to'xtatib qolish himoyachilarga oson bo'lmaydi. Kosta hozirgacha to'pni oldinga tashlab, so'ng­ra tezlashish holatini 39 marta bajardi. Vaholanki, u hozirgacha 8ta uchrashuvda maydonga tushgan, «Verder»ga qarshi bahsni zaxira o'rindig'ida kuzatgandi.
Braziliya terma jamoasi a'zosi «Bavariya»ning hujumdagi o'yin uslubiga to'la mos tushadi. U ayni damda Menxengladbaxning «Borussiya» klubi vakili Rafael bilan birga bundesliganing eng yaxshi assistentlari ro'yxatini boshqarib turibdi. Kosta hozirgacha sheriklarini 5 marta golli pas bilan ta'minlagan.
U yakkakurashlarda ham faol. Bu kabi vaziyatlarning 53 foizidan unumli foydalanishi - asosan driblingga tayanadigan futbolchi uchun yomon ko'rsatkich emas. Darvoqe, u 59 foiz holatda raqibni ishonchli tarzda aldab o'tishni uddalaydi. Braziliyalik o'yinchi Donetskning «Shaxtyor»idan Germaniya chempioni safiga qo'shilganidan buyon dastlabki daqiqalardanoq maydonga tushyapti. O'z-o'zidan ko'rinib turibdiki, Riberi va Robben jarohatdan forig' bo'lishgach, asosiy tarkibdagi raqobatni engish ularga oson kechmaydi.
Yulian VAYGL'
Ushbu futbolchi o'tgan mavsum «Myunxen-1860» klubining bitta o'yinini zaxira o'rindig'ida kuzatgan bo'lsa, atigi ikki marta o'yin qaydnomasiga kiritilmadi. Dortmundning «Borussiya» klubi yosh iqtidor egasi hisobiga himoya va maydon markazini mustahkamlash, Nuri Shaxin, Sven Bender hamda Gonsalo Gas­tro kabilarning o'rni bildirmaslikka intildi. Yulianning muntazam ravishda asosiy tarkibga kiritilishini avvaldan taxmin qilish qiyin edi. 19 yoshli futbolchi Tomas Tuxel tuzgan o'yin jarayonida muhim o'rin tutyapti.
«Bavariya» ustozi Pep Gvardiolaning fikricha, Germaniya termasining 21 yoshga to'lmagan a'zolari mamlakat bosh jamoasida o'ynashga munosiblar. Vayglning imkoniyatlari Tuxelni ham befarq qoldirmadi. Matbuot ushbu yarim himoyachiga o'ziga xos ta'rif berishga ham ulgurdi - «Bekkenbauer kabi nafosatli!»
Yulianning yangi jamoaga moslashuvi kishini hayratlantiradi. Har bir o'yinda o'zini xotirjam tutadi. Uning uzatmalari deyarli har bir vaziyatda sheriklariga aniq borib tushadi. Bu boradagi noaniqlikning 10 foizni tashkil etishi «Borussiya» a'zolari orasidagi eng yaxshi ko'rsatkich bo'lib turibdi. Vaygl har bir bahsda to'pni o'rtacha hisobda 95 marta qabul qiladi. Ilkay Gyundogan bilan birga dortmundliklar o'yiniga joziba baxsh etadi.
Entoni MODEST
Hujumchi Entoni Udjning yozda «Verder»ga o'tishi «Kyoln» fanatlarini hayron qoldirgandi. Biroq yangi mavsumning ilk o'yinidan so'ng nigeriyalik futbolchini hech kim yodga olmadi. Chunki «Xoffenxaym»dan kelib qo'shilgan Entoni Modest kubok bahsida «xet-trik» qayd etdi, jamoa esa 4:0 hisobida zafar quchdi. Klubning yangi a'zosi chempionatning dastlabki turida Shtutgartda bitta gol urib, bir marta samarali to'p uzatishi bilan yodda qoldi. Frantsiyalik iqtidor egasi shu zayl barqarorlik ko'rsatishda davom etmoqda. Hozirgacha sermahsullik bobida 8 ochko to'plashga ulgurdi - 6ta gol va 2ta golli pas. Aynan Modestning xizmatlari evaziga «Kyoln» joriy mavsumning 8ta turidan so'ng o'z hisobiga 13ta gol yozib qo'ydi. Vaholanki, o'tgan yilning shu davrida klub atigi 6ta gol bilan kifoyalangandi.
Umuman, Modest «Kyoln» futbolchilari tomonidan urilgan 17ta golning 11tasida bevosita ishtirok etdi. Frantsiyalik o'yinchi jamoasining to'rtta o'yinida hisobni ochuvchi golga mualliflik qildi. Bundesligada bunday davomiylikni hozircha hech kim qayd etganicha yo'q. Mavsum arafasida France Football nashriga intervyu bergan hujumchi 15ta to'p kiritish niyati borligini yashirmagandi. Modest shunday kayfiyatda davom etsa, maqsadiga etishi muqarrar.
Yoxannes GAYS
«Yosh bo'lishiga qaramay, u bundesliganing eng yaxshi olti nafar o'yinchilaridan biri bo'lib turibdi», - «Shalke» bosh murabbiyi Andre Braytenrayter birinchi turdan keyinoq Gaysga shu tariqa qisqa va aniq ta'rif berdi.
22 yoshli yarim himoyachi yozda Maynts­ni Gelzenkirxenga almashtirdi. «Shalke» mutasaddilari yosh o'yinchining salohiyati va iqtidoriga shubha qilmayaptilar. Gaysning asosiy tarkibdan muqim o'rin egallayotganiga hayratlanmasa ham bo'laveradi. Hozirgacha o'tkazilgan to'qqizta o'yinning barchasini dastlabki daqiqalardan boshlagan futbolchi faqat bir marta almashtirildi.
Bu tabiiy hol, zero tayanch yarim himoyasida raqib rejasini barbod etish bilan shug'ullanuvchi Gays jamoasining hujumlaridagi rang-baranglikka zamin hozirlaydi. Uning uzatmalari deyarli barcha vaziyatlarda manzilga aniq etib boradi. Joriy mavsumda 72 marta uzoq masofaga to'p oshirgan futbolchi mazkur ko'rsatkich bo'yicha etakchiga aylangan. «Shalke» raqiblari darvozasi tomon yo'llangan 24ta zarbada bevosita Gaysning ishtiroki bor. Shuningdek, u standart vaziyatlarni ham a'lo darajada ijro qiladi - hozirgacha uning aniq to'p uzatmalaridan so'ng uch marta to'p kiritildi.
Davomi InterFUTBOL gazetasi blogida.
— deya xabar beradi uff.uz nashri.