Bir vaqtlari Qoraqalpog'iston futboli yurtimizda yuqori nufuzga ega edi. «Orol» jamoasi esa oliy ligada istalgan raqibga boshog'riq bo'lar, qolaversa, iqtidorlar etkazib berishi bilan ham nom qozongandi.
To'g'ri, bu o'lkada hamon  ko'plab iste'dodlar kashf etilmoqda - Azamat Allaniyozov, Navro'z Alimov, Oybek Nurboev, Salamat Quttibaev... Ammo hamma gap shundaki, bu futbolchilar uchun endi «Orol»da emas, balki bosh­qa jamoalarda o'ynash afzalroq. Nukus klubi o'z nomiga hamohang tarzda «qurimoqda».
Ayni vaqtda jamoa birinchi ligada 15-o'rinni egallab turibdi. Mag'lubiyatlar girdobida qolgan klubda yuzaga kelgan inqiroz sabablarini aniqlash maqsadida «Orol» PFK direktori Begdiyar Allayarov bilan ko'rishib, unga o'zimizni qiziqtirgan savollar bilan murojaat etdik. Mutasaddi  suhbat davomida O'FF va PFL  rahbariyatidan klubdagi mavjud muammolarni hal qilish bo'yicha amaliy yordam so'rash maqsadida Toshkentga tashrif buyurganini aytdi.
- Begdiyar aka, «Orol»dek klubning bunday ayanchli ahvolga tushib qolishiga sabab nima? Mavjud ma'lumotlarga qaraganda, jamoa moliya­viy masalada oqsayotgan ekan.
- To'g'ri, birinchi nav­batda, aynan iqtisodiy muammolar bizga xalal beryapti. Futbolchilarga anchadan buyon maosh to'lolmayapmiz. Chunki klub hisob-raqamida pul yo'q. Yordam berishi lozim bo'lgan tashkilotlar esa hozircha sukut saqlashyapti.
- Futbolchilar qanchadan buyon maosh olishmayapti?
- «Orol» PFK direktori sifatida 2015 yilning aprel oyidan buyon faoliyat yurityapman. Rahbarlikka tayinlanganimdan to hozirga qadar biror marta futbolchi va murabbiylarga maosh berolmadik.
- Sir emaski, ayni damda klublarimizning deyarli barchasi homiy tashkilotlar qaramog'ida. Nahotki, butun boshli Qoraqalpog'istonda «Orol»­ga yordam bera oladiganlar topilmasa?
- Bor, albatta. 2015 yilning 26 may sanasida O'zbekiston futbolini qo'llab-quvvatlash jamoat jamg'armasi Qoraqalpog'iston bo'limi Vasiylik kengashi majlisining bayoni chiqdi. Unga ko'ra, «Orol» PFKning moddiy-texnik bazasini yanada mustahkamlash va uni rivojlantirish asosiy maqsad sifatida belgilandi. Natijada, klubga homiylik qilish vazifasi 49ta korxona va tashkilot zimmasiga yuklatildi. Ushbu muassasalar 805 million so'm miqdoridagi mablag'ni klub hisobiga o'tkazib berishlari lozim edi. Ammo bu gaplar o'z chiroyini qog'ozda saqlab qoldi, xolos. Klub bir so'm ham olmadi. Mazkur masalada etarlicha muammolar bor, ammo hozircha ularni tilga olishni istamayman. Toshkentga kelib, PFL direktori Farhod Magometov bilan uchrashdim. U klubimizga yordam berishni va'da qildi. Shunday ekan, hozircha kutib turganimiz ma'qul. Umid qilamanki, yaqin vaqtlar ichida «Orol»da ijobiy o'zgarishlar ro'y beradi.
- Hozirda klub bosh murabbiyligi yaqin o'tmishning mashhur futbolchilaridan biri Ne'matilla Quttiboev zimmasida. Uning ishiga qanday baho berasiz?
- «Orol» aynan shu toifa futbolchilarning fidoyiligi evaziga o'ynashda davom etmoqda. Ne'matilla klub uchun qo'lidan kelgan barcha ishni qilmoqda. U tumanlardan iqtidorlarni izlab topib, jamoaga olib kelmoqda. Afsuski, hozirgi sharoitimiz bu iqtidorlarni tarbiyalab, professional futbolchi qilib etkazish uchun kamlik qiladi. O'zingiz o'ylang, tumanlardan kelayotgan futbolchilarning hatto yotoqxona bilan ham ta'minlanmayotganini qanday baholash mumkin? Biz ularning mashg'ulotga qatnashlari uchun yo'lkira haqini ham berolmaymiz. Xarajatlarni oila a'zolaridan olgan pullari evaziga qoplashadi. Natija ijobiy tus olmasa, futbolchilarni mablag' bilan ta'minlayotgan ota-onalari, akalarining ham toqati toq bo'lishi tayin. Qanchadan-qancha iqtidorlarning ilojsizlik tufayli futbolni tashlab ketishayotgani achinarli, albatta. Ne'matilla qo'lidan kelgan barcha ishni qilmoqda. Ishonsangiz, tumanlardan kelgan ikki futbolchi bir necha oy davomida uning uyida yashashdi. Mehmonxonaga faqat o'tgan oy uchun pul o'tkazilgandi, ammo bu mablag' tugadi. Endi boshpana ham muammo. Mana shunday sharoitda ishlayapmiz.
Davomi InterFUTBOL gazetasi blogida.
— deya xabar beradi uff.uz nashri.