O'zbekiston milliy jamoasi jiddiy o'yinga astoydil hozirlanmoqda. Iordaniya va Janubiy Koreya termalariga qarshi kechadigan uchrashuvlarga tayyorgarlik ko'rish jarayonida ayrim futbolchilar sinovdan o'tkazildi, harakatlaridan qoniqish hosil qilinmagan o'yinchilarga javob berildi. Tarkib deyarli o'zgarishsiz qoldi. Samvel Babayan tuzgan ro'yxatdagi yangilar safiga «Orenburg» a'zosi Vadim Afonin hamda «Nasaf» yarim himoyachisi Odil Hamrobekov qo'shilishdi, xolos. Ehtimol, iordaniyaliklarga qarshi kechadigan o'rtoqlik bahsidan so'ng yana yangiliklarga guvoh bo'larmiz. Hozircha esa bosh jamoamiz murabbiylar shtabi tomonidan saralangan 24 futbolchining Xitoy termasi bilan o'yindan so'ng o'z klubida qanday ko'rsatkich qayd etgani va ularning Seulda o'tkaziladigan muhim uchrashuvda maydonga tushish imkoniyatlarini chamalash bilan cheklanamiz. Xo'sh, asosiy tarkibda tushishga kimlar da'vogar? DARVOZABONLAR Seulda darvozani Lobanov qo'riqlaydimi yoki Nesterov? Balki ushbu mas'uliyatli vazifa Suyunovga ishonib topshirilar? Yo'q, baribir, «Paxtakor» posbonining bu boradagi imkoniyatlari yuqoriroq. Axir u saralashning hal qiluvchi bosqichida faqat Eron termasidan to'p o'tkazib yubordi, xolos. Aynan shu omil Aleksandrga milliy jamoaning asosiy kiperi nomini o'zida saqlab qolish imkoniyatini taqdim etadi. Ignatiyning «Lokomotiv» tarkibidagi o'yinlari esa o'z-o'zidan ikkinchi darajaga tushadi. Mabodo Janubiy Koreya termasiga qarshi bahsda asosiy tarkibda Nesterov tushirilsa, bundan ranjiydiganlardan ko'ra quvonadiganlar ko'pchilikni tashkil etishi tayin. Axir mamlakatimizning eng tajribali va mahoratli kiperining bosh jamoa libosidagi o'yinlarini sog'inganlar bis-yor-da. Eldor Suyunov esa, odatdagidek, uchinchi darvozabon bo'lib qoladi. Boshlang'ich tarkibga asosiy da'vogar:Aleksandr Lobanov. HIMOYaChILAR Balki bu chiziqda o'zgarish kuzatilar? Xitoy termasiga qarshi kechgan bahsda ko'rdik, Davron Hoshimov yomon o'ynamadi. Yoki Anzur Ismoilovning qaytishi munosabati bilan yana avvalgi taktika qo'llanib, Islom To'xtaxo'jaev o'zi uchun qadrdon bo'lib borayotgan o'ng qanotdan joy egallaydimi? Har holda, shunday yo'l tutilishi ehtimoli ham yo'q emas. Xullas, markazda yangilikka qo'l urilmasligi aniqroq. Samvel Vyacheslavovich muhim bahsda Xitoyda to'p surayotgan legionerlarimiz xizmatidan voz kechmasligi tayin. Shuningdek, so'l qanotdan ham ko'ngil to'q. Ushbu chiziq mas'uliyati to'laligicha Vitaliy Denisov zimmasida. Ko'rinib turibdiki, asosiy savol Hoshimov va To'xtaxo'jaevdan birini tanlashda qolmoqda. Bu borada esa baribir, «Lokomotiv» a'zosining ustunligi bor. Shukurov hamda Andreev esa zaxiradan joy olib, har qanday vaziyatda sheriklarining o'rinlarini egallash tadorigini ko'rishlari mumkin. Boshlang'ich tarkibga asosiy da'vogarlar: Islom To'xtaxo'jaev, Egor Krimets, Anzur Ismoilov, Vitaliy Denisov. YaRIM HIMOYaChILAR Mana bu pozitsiyada esa o'zgarish kuzatilishi mumkin. Axir tarkibga yangi qo'shilganlar aynan shu chiziq vakillari-da. «Orenburg» etakchilari qatoridan o'rin egallashga ulgurgan Afonin boshlang'ich tarkibda maydonga tushishi mumkinmi? Mumkin! Kimning o'rniga? Bunisi noma'lum. Balki Aziz Haydarovning joyini egallar? Yo'q. Katta ehtimol bilan termamiz murabbiylar shtabi tavakkalga qo'l urmay, Vadimni zaxira varianti sifatida qo'llashadi. Hamrobekov haqida ham xuddi shunday fikr bildirish mumkin. «Nasaf» vakili to'p suradigan chiziqda raqobat juda kuchli: nafaqat asosiy tarkibda, balki zaxira o'rindig'ida ham. Shunday ekan, kichik Odil ham faqat ehtiyoj tug'ilgan pallada qaysidir jamoadoshining o'rniga maydonga tushishi mumkin. Asosiysi - u yana katta futbolga moslashib, termamiz safidan o'rin egallayapti, qolgani asta-sekin kelaveradi. O'zini ko'rsatish uchun Hamrobekovda hali ko'p imkoniyat bo'ladi. Tayanch chizig'ida Ahmedov - Haydarov juftligi o'ynasa kerak. Ha, Janubiy Koreya termasiga qarshi bahsda milliy jamoamiz sardori zimmasiga himoyachilarga ko'proq yordamlashish yuki ham tushadi. Mabodo hujumchi ortidagi nuqtada Jeparovning o'rnida boshqa futbolchi sinab ko'rilsa, bunga birinchi da'vogar Javohir Sohibov bo'lishi tayin. Yoki xitoyliklar bilan kechgan bahsning eng yaxshi o'yinchisi nomiga loyiq ko'rilgan Otabek Shukurovni tanlashar. Seuldagi o'yinning tezkor kechishini inobatga olsak, «Paxtakor» yarim himoyachisi ko'proq foyda keltirishi mumkin. Xullas, hujum va himoyaga yordam berishga birdek ulguradigan futbolchi maydonga tushadi. Bu borada eng past imkoniyat «Buxoro» vakili Salamat qutiboevda. Endi qanot yarim himoyasi haqida gapirsak. Bizda Janubiy Koreya termasining tezkor himoyachilarini shoshirib qo'yishga qodir futbolchilar bor: Rashidov, Shomurodov, Bikmaev, Masharipov. Faqat ushbu kvartetdan ikki nomzod tanlab olinsa, kifoya. Hoynahoy, boshlang'ich tarkibdagi joy Eldor va Maratga ishonib topshiriladi. Zero, «Lokomotiv» a'zosining Xitoy termasi darvozasini ishg'ol qilishi unga dastlabki daqiqalardan maydonga tushish imkoniyatini yaratadi. Jaloliddin hamda Sardordan esa kerakli paytda o'yinni kuchaytirish maqsadida foydalaniladi. Albatta, bu bir taxmin, xolos. Boshlang'ich tarkibga asosiy da'vogarlar: Odil Ahmedov, Aziz Haydarov, Server Jeparov, Eldor Shomurodov, Marat Bikmaev. Davomi interfutbol.uz saytida.
— deya xabar beradi uff.uz nashri.