Namangan xalqaro aeroportida Qatarning Doxa shahrida bo'lib o'tgan boks bo'yicha XVIII jahon chempionatida kumush medal va 2016 yili Braziliyada o'tkaziladigan XXXI yozgi Olimpiada yo'llanmasini qo'lga kiritgan yosh sportchi Murodjon Ahmadaliev tantanali kutib olindi.
Davlat va jamoat tashkilotlari mutasaddilari, murabbiylar, sport muxlislari, yoshlar va ommaviy axborot vositalari xodimlari ishtirok etgan tadbirda Prezidentimiz rahnamoligida navqiron avlodning har tomonlama barkamol insonlar bo'lib ulg'ayishi uchun keng sharoit va imkoniyatlar yaratishga alohida e'tibor qaratilayotgani ta'kidlandi.
– Bugungi kunda uch mingdan ziyod zamonaviy sport inshooti yoshlar ixtiyorida, – deydi Namangan viloyati madaniyat va sport ishlari boshqarmasi boshlig'i Rasuljon Nizomboev. – O'tgan yili sportchilarimiz tomonidan mamlakatimiz va jahon miqyosidagi chempionat va turnirlarda 367 oltin, 354 kumush, 512 bronza medal qo'lga kiritildi. Ayni paytda Prezidentimizning 2013 yil 25 fevraldagi “O'zbekiston sportchilarini 2016 yilda Rio-de-Janeyro shahrida (Braziliya) bo'lib o'tadigan XXXI yozgi Olimpiya va XV Paralimpiya o'yinlariga tayyorlash to'g'risida”gi qarori ijrosi doirasida sportchilarni Osiyo, jahon chempionatlari, xalqaro turnirlar, ayniqsa, Olimpiya o'yinlariga tayyorlashga alohida e'tibor qaratilmoqda.
– Ko'rsatilayotgan bunday e'tibor va g'amxo'rlik zimmamdagi mas'uliyatni yanada oshiradi, – deydi M.Ahmadaliev. – Prezidentimizning yoshlarga bildirayotgan katta ishonchi bizni yanada ulkan g'alabalarga undaydi. Olimpiya o'yinlarida ham Vatanimiz bayrog'i baland ko'tarilishi uchun kuch-g'ayratimni ayamayman.
Manzil: UzA, olympic.uz
— deya xabar beradi uff.uz nashri.