Juda qadim bo'lmagan zamonlarda bir podshoh fuqarolaridan xabar olish maqsadida soddagina kiyinib, mamlakati bo'ylab sayohatga chiqibdi. U yo'l yuribdi, yo'l yursa ham, mo'l yuribdi. Nihoyat, gavjum sartaroshxona oldida to'xtabdi. Dunyoning gapi sartaroshxonada «qaynashi»ni bilgan hukmdor ham oxirgi bo'lib, navbat kutayotganlar safiga qo'shilibdi. Podshoh kutganidek, sartarosh ustarasini abjirlik bilan ishlatish asnosida mijozlarga dadil-dadil so'zlar aytibdi. O'z o'rnida, barcha nuqul uning so'zlarini ma'qullabdi. Navbati etganda, sartaroshxonada podshoh va usta qolishibdi, xolos. Hukmdorning soch-soqolini olar ekan, usta so'z qotibdi: - Muhtaram zot, podshohligingizni bilaman, hurmatingizni saqlab, buni boshqa mijozlarga sezdirmadim. Podshoh sartaroshning hech bir hayajonsiz so'zlayotganidan hayratlanib, o'sha zahoti saroyga qaytibdi va oddiy ustadagi qudrat sababini vaziridan so'rabdi. Dono mulozim esa bir guruh xizmatkorlar bilan borib, sartaroshxonani buzdiribdi va sartarosh doim ishlaydigan joyni kavlab ko'rishni buyuribdi. U taxmin qilganidek, o'sha joydan bir xum tilla topilibdi. Xullas, shu tillalar o'ziga sezdirmay, sartaroshga kuch-qudrat va dadillik baxsh etayotgani ma'lum bo'libdi. Bu-ku bir rivoyat, ammo bugun nainki sartaroshxonalar, balki mamlakatimizdagi katta-kichik tashkilotlar, oshxona-choyxonalar, avtoulovlaru xonadonlarda bir savolga javob izlanayotgani ayon haqiqat: «Janubiy Koreya termasini qanday qilib engish mumkin?!» Javoblar turli-tuman. Kimlardir Samvel Babayanning murabbiy sifatidagi ustamonligiga umid bog'lamoqda. Biroq bu mulohazani inkor etuvchi zukko muxlislar ham talaygina. Jiddiy o'yinga portugalcha munosabatni il­g'amagan murabbiyni ustamon deyish qiyin, qolaversa, uni safarda nemischa tafakkur sinovdan o'tkazadi. Demak, murabbiy tanlaydigan taktik o'yin maromni ushlab turish uchun muhim sanalsa ham, g'alaba yo'lida hal qiluvchi ahamiyat kasb etmaydi. Ayrim muxlislar safardagi zafar uchun etakchi futbolchilarimiz borki imkoniyatlarini ishga solishlari zarurligini ta'kidlashmoqda. Umuman olganda, mazkur mulohazada jon bor. Ana, Genrix Mxitaryan tarkibga qaytishi bilan Armaniston termasi irodali g'alabaga erishdi. Hisob 0:2 bo'lib turganida, jamoani g'alaba sari olg'a boshlash - yuksak mahorat va mardonavorlik namunasi. Faqat, boshqa bir ma'lumot bizni o'yga toldiradi. Xo'sh, u holda Argentina termasi nima sababdan safarda mag'lubiyatga uchradi? Nima, Lionel Messi yoki Xav­­er Maskeranoda, Gonsalo Iguain yoki Serxio  Agueroda mahorat va mardonavorlik etishmadimi? Yo'q, ushbu buyuk futbolchilarda barcha ijobiy jihatlar mujassam. Shunday bo'lsada,  Argentina termasining boshi yana egik. Ayonki, etakchilar harchand urinishmasin, ayrim hollarda ular ham o'yin taqdirini hal qiladigan so'ng­gi so'zni aytisholmaydi. Bunday desak, hammasi yaxshi niyatga bog'liq ekan-da. Inkor etmaymiz - muxlislarning ezgu tilaklarisiz terma jamoamiz ishi bitmaydi. Mana, shunday ezgu tilaklardan biri. Uni tahririyatimizga NamMTI talabasi Sardor Isroilov yo'llagan. Oliy maqsad Bu gal bo'sh o'rindiq yo'q, Seul «Vorld Kap»ida. Yo'qotishlar yo'q bugun, Termamizning safida. Avvaldan aytish qiyin, Qaysi jamoa yutar? Muxlislar bahs startin, Hayajon bilan kutar. Davomi interfutbol.uz saytida.
— deya xabar beradi uff.uz nashri.