Yaponiya poytaxti Tokio shahrida og'ir atletika bo'yicha yoshlar va o'smirlar o'rtasidagi Osiyo chempionati yakunlandi. Avval xabar berib o'tganimizdek musobaqaning dastlabki kunida O'zbekiston terma jamoasi a'zosi, jahon chempioni Adhamjon Ergashev o'smirlar o'rtasida 62 kilogramm vazn toifasida dast ko'tarishda 121 kg, siltab ko'tarishda 151 kg, umumiy 272 kg natija bilan oltin medalga sazovor bo'lgan va Osiyo chempionligini tantana qilgandi.  
E'tiborlisi Adhamjon keyinchalik o'zidan uch yosh katta bo'lgan sportchilar bahsida, ya'ni yoshlar o'rtasida ham barcha raqiblarini ortda qoldirib, qit'a chempioni unvoniga sazovor bo'ldi. Bundan avval o'smirlar Olimpiadasi, shuningdek yoshlar va o'smirlar o'rtasidagi jahon chempionatida muvaffaqiyatli ishtirok etgan hamyurtimizning mahorati Osiyo og'ir atletika federatsiyasi va qit'a chempionati tashkilotchilari e'tiboridan ham chetda qolmadi va chempionat yakunida Adhamjon Ergashev Osiyo chempionatining eng yaxshi atleti sovriniga munosib ko'rildi.
Bu shubhasiz o'zbek og'ir atletika maktabining yana bir ulkan yutug'idir. Shuni aloxida ta'kidlash kerakki kunchiqar yurtda tashkil etilgan Osiyo chempionatida O'zbekiston terma jamoasi 10 nafar sportchi bilan ishtirok etgan bo'lsa ulardan oltitasi sovrinli o'rinlarga sazovor bo'lishdi. Adhamjon Ergashev delegatsiyamiz hisobiga ikkita oltin medal keltirgani xaqida aytib o'tdik, shuningdek Farxod Sobirov 1 ta oltin va 2 ta kumush medallari bilan umumiy hisobda shoxsupaning ikkinchi pog'onasidan joy oldi.
Shahzod Xudoyberganov esa har uchchala yo'nalishda bronza medali bilan taqdirlandi. Aleksandr Li bitta kumush va ikkita bronza medali bilan 3-o'ringa munosib ko'rilgan bo'lsa, Osiyo chempionatida ishtirok etgan har ikkala qizimiz ham sovrinsiz qolishmadi. 58 kg vazn toifasida Muattar Nabieva uchinchi o'rinni, 69 kg vazn toifasida esa Omadoy Otaqo'zievalar ikkinchi o'rinni egallashdi. Anu shu tariqa umumjamoa hisobida O'zbekistonlik atletlar 2 ta oltin, 2 ta kumush va 3 ta bronza medallari bilan Osiyo chempionatini Eron va Yaponiyadan so'ng faxrli uchinchi o'rinda yakunlashdi.
Riodagi XXXI yozgi Olimpiya o'yinlari yakunlanishi bilanoq O'zbekiston og'ir atletika federatsiyasi navbatdagi to'rt yillik tsiklga tayyorgarlini boshlab yubordi. Xabaringiz bor Rio-de-Janeyroda Ruslan Nuriddinov o'zbek sporti tarixida birinchi bo'lib og'ir atletika bo'yicha Olimpiya o'yinlarining oltin medaliga sazovor bo'lagandi, shuningdek Ruslan Olimpiya o'yinlari rekordini yangilagan birinchi o'zbekistonlik sportchiga aylangandi.
Ammo mamlakatimiz og'ir atletika federatsiyasi mutasaddilari bu natija bilan to'xtab qolish niyatida emaslar, aksincha Tokioda yutuqlar zalvorini bundanda oshirishga bel bog'laganlar. Buning uchun yoshlar va o'smirlar o'rtasidagi qit'a hamda jahon chempionatlarida terma jamoamiz a'zolari munosib ishtirok etishlari, xalqaro maydonda tajriba to'plashlari uchun barcha sharoitlarni yaratib berishmoqda. Zero bugungi yoshlar navbatdagi Olimpiya o'yinlarida terma jamoamiz asosini tashkil etish berishsa ajab emas.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.