1news.uz — Yaponiya poytaxtida yoshlar va o'smirlar o'rtasidagi Osiyo chempionati nihoyasiga etdi. Odatda, ikki yosh toifasi uchun qit'a birinchiligi bir joyda, ammo ketma-ket, alohida-alohida o'tkazilardi. Bu gal esa hakamlar bir musobaqa ishtirokchilari orasidan 17 yoshgacha va 20 yoshgacha bo'lgan g'olib hamda sovrindor atletlarni  aniqlab olishdi. Ayni paytda avvalgilaridan farqli ravishda, mazkur chempionatda qatnashgan, yoshi 17 dan oshmagan sportchilarning natijalari bir yo'la 20 yoshgacha bo'lgan polvonlar qaydnomasiga ham kiritildi. Aniqroq qilib aytadigan bo'lsak, bir sportchi, agar ko'rsatkichlari taqozo etsa, har ikkala yosh toifasida medallarni qo'lga kiritish imkoniga ega bo'lishdi. Shu bois, O'zbekiston terma jamoasi a'zosi, 1999 yilda tug'ilgan Adhamjon Ergashev 62 kg vazn toifasida o'smirlar o'rtasida ham, yoshlar o'rtasida ham Osiyo chempioni deb tan olindi. Dast ko'tarishda 121, siltab ko'tarishda 151 va mos ravishda ikkikurashda 272 kg natija qayd etgan iste'dodli sportchimiz jamoamiz hisobiga jami 6 ta oltin medal keltirdi. Tabiiyki, Adhamjonning Tokiodagi ajoyib ko'rsatkichi mutaxassislar tomonidan e'tiborsiz qoldirilmadi, ya'ni u vazn toifalaridan qat'iy nazar, musobaqaning eng kuchli sportchisi deb tan olindi. Kichik yosh toifasida Yaponiyaga bizdan 4 nafar sportchi yo'l olgan edi. Kelajagiga katta ishonch bilan qaralayotgan poytaxtimizdagi Respublika Olimpiya zahiralari kolleji talabasi Sarvar Toshtemirov (69 kg vazn toifasi) hamda Navoiy OZK tarbiyalanuvchisi Jasurjon Abduhalimov (+94 kg) hozircha, garchi sovrindorlar qatoriga kira olmagan bo'lsalar-da, qit'a chempionati davomida yaxshigina tajriba to'plab olishdi. O'smirlar o'rtasida qolgan 3 ta medalni Toshkent viloyati vakili Aleksandr Li qo'lga kiritdi. Endigina 16 yoshni qarshilagan bu atletimiz 94 kggacha vaznli polvonlar guruhida munosib natija ko'rsatdi. Uning dast ko'tarishdagi 128 kg va ikkikurashdagi 293 kg ko'rsatkichlari ikkita bronza medalga mos keldi. Siltab ko'tarishda qayd etilgan 165 kg tufayli Sashaning ko'ksini kumush medal bezadi. Mamlakat federatsiyasi va murabbiylar kengashi bu galgi Osiyo chempionatida asosiy e'tiborni yoshlar jamoamizga qaratishgani musobaqa paytida ham yaqqol sezildi. Adhamjondan tashqari, 20 yoshgacha bo'lgan sportchilar bahsida Farxodbek Sobirov ham o'ziga bildirilgan ishonchni oqladi. Uning dast ko'tarishdagi 170 kg natijasiga raqiblaridan hech biri tenglasha olmadi, bu mashq bo'yicha hamyurtimizga oltin medal topshirildi. Siltab ko'tarishning ikkinchi urinishida 195 kg qayd etgan Farxodbek oxirgi imkoniyatdan, sirtdan qaraganda unumli foydalangandek bo'ldi – 200 kg ham bo'ysundirildi. Biroq sportchimiz harakatiga nisbatan hakamlarning o'sha paytdagi chiqargan salbiy qarori biroz tushunarsiz bo'ldi. Televizion translyatsiyani kuzatishning imkoni bo'lmaganligi sababli, vaziyatga aniq baho berish qiyin edi. Nima bo'lganda ham Sobirovga siltab ko'tarish va ikkikurash uchun kumush medal topshirildi. Agar uning oxirgi urinishi inobatga olinganda, yana ikkita oltin naqd bo'lardi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.