Bundan 3-4 yil avval mamlakatimizning turli yoshdagi terma jamoalarida «Paxtakor» akademiyasi tarbiyalanuvchilari ko'pchilikni tashkil qilardi. Bugunga kelib vaziyat biroz o'zgardi. Endilikda ular safiga «Bunyodkor» akademiyasida millionlar o'yini sir-asrorlarini o'rganayotganlar ham qo'shilishdi. Bu - birinchi navbatda, ushbu ta'lim maskanida olib borilayotgan islohotlar samarasi. Qolaversa, bir necha yil avval ekilgan nihol mevasini bera boshladi. O'z navbatida, «Bunyodkor» klubi bosh murabbiyi Sergey Lushanning yoshlarga qaratayotgan e'tibori ham bunga zamin yaratyapti, desak mubolag'a bo'lmaydi. Sir emaski, oliy liganing aksariyat jamoalarida yoshlarga e'tibor past. Asosan natijani o'ylab, tajribali futbolchilar va saviyasi past legionerlarga tayanilmoqda. «Bunyodkor»da esa buning aksini ko'ryapmiz. Doston Hamdamov, Akrom Komilov, Otabek Shukurov, Eldor Shomurodov kabilar bugungi kunda «qaldirg'ochlar»ning asosiy tarkibida to'p surishmoqda. Bunday iqtidorli futbolchilar qatoriga himoyachi Rustam Ashurmatovni ham bemalol kiritish mumkin. Odatda, boshqa amplua vakillaridan ko'ra, mudofaa chizig'idagilarning tajribaliroq bo'lishlari talab etiladi. Rustam esa, o'z mehnati va intilishi evaziga oliy liganing ko'zga ko'ringan himoyachilari safiga qo'shildi. Biz navbatdagi mashg'ulotlardan so'ng ushbu futbolchidan intervyu oldik. - Rustam, suhbatimiz avvalida futboldagi ilk qadamlaringizni eslaylik. Nega aynan futbolni tanlagansiz? - Sportning bu turini tanlashimga tog'am Baxtiyor Ashurmatov sababchi bo'lganlar. Aynan ularga havas qilib, futbol olamiga qadam qo'yganman. Lekin bosh sababchi sifatida bobomni ko'rsatishim mumkin. Chunki ular qo'limdan etaklab, futbol to'garagiga olib borganlar. Bilasizmi, faoliyatimni hujumchi sifatida boshlaganman. Keyinchalik tog'amga bo'lgan havas tufayli ampluamni almashtirdim. O'shandan beri himoyada o'ynab kelyapman. - Uydagilarning munosabati qanday bo'lgan? «Boshqa sohani tanlarsan, bitta oiladan bir futbolchi chiqqani etadi», deyishmaganmi? - Aksincha, bu borada meni har doim qo'llab-quvvatlashgan. Shu bois, aslo qiyinchilikka duch kelmaganman. - Ayrim futbolchilar ma'lum bir darajaga etishganlarida ilk murabbiylarini biroz esdan chiqarib qo'yishadi... - Fikringizni tushundim. To'g'risini aytsam, hali aqlimni tanimasimdanoq millionlar o'yiniga mehr qo'yganman. Yuqorida bobom haqida gapirdim. Aynan ular mening futboldagi ilk murabbiyim, desam to'g'ri bo'ladi. O'zimdan 2-3 yosh katta bolalar bilan to'p surganman. Qo'qon shahridagi oddiy futbol maktabiga borganman. Keyin «Bunyodkor» akademiyasiga qo'shilganman. Professional futboldagi birinchi murabbiylarim - Ibrohim va Vohid akalar. «Bunyodkor»da esa Sergey Lushan qo'l ostida faoliyat yurityapman. - Toshkentga kim taklif qilgan? Bu siz uchun kutilmagan chorlov bo'lganmi? - Qo'qonda «Bunyodkor» klubi bolalar o'rtasida turnir o'tkazgan. Musobaqa yakunida murabbiylar 20 nafar futbolchini tanlab olib, poytaxtga taklif qilishgan. Bir necha kunlik mashg'ulotlardan so'ng 3 nafar futbolchini akademiyada olib qolishgan. Ular orasida men ham bor edim. Tanlovga Sergey Lushan boshchilik qilgandilar. Ochig'i, buni kutmagandim. Mazkur taklifdan so'ng hayotimda katta o'zgarishlar ro'y berdi. «Bunyodkor»­da to'p surish orqali oldimda katta dunyo arenalariga yo'l ochilishi mumkinligini bilardim. - O'sha paytda tog'angiz bilan maslahatlashganmisiz? Umuman, Baxtiyor aka sizning ham birinchi muxlisingiz, ham birinchi tanqidchingiz bo'lib qolyaptilarmi? - Albatta, bir qarorga kelishdan avval tog'amdan tavsiya olganman. Bu xabar u kishini ham quvontirgan. Har bir masalada hamon Baxtiyor tog'amdan maslahat so'rayman. Xatolarimni aytib, tegishli ko'rsatmalar beradilar. - Ko'proq qaysi kamchiliklaringiz uchun dakki olasiz? Tanbehlarni to'g'ri qabul qilasizmi? - Shubhasiz, to'g'ri qabul qilaman. Boisi, hech kim ular kabi menga to'g'ri tavsiya va tanbeh bera olmaydi. Futbol ichida ham, uning tashqarisida ham tog'amdan bemaslahat ish qilmayman. Ko'proq yurish-turishimga e'tibor qaratish, kattalar va kichiklarga birdek munosabatda bo'lishga chaqiradilar. - Sizga tog'angizning o'yinlarini stadiondan ko'rish nasib qilganmi? Ulardan aynan qaysi jihatlarni o'zlashtirishga intilyapsiz? - Ayrim o'yinlarini bevosita tribunada kuzatganman. Lekin aynan qaysi uchrashuvga kirganimni eslay olmayman. Chunki o'shanda juda yosh edim. Tog'amning barcha xislatlarini o'zlashtirishga urinaman. Ayniqsa, maydonda o'zlarini ayamasliklari, jonlarini berib to'p surishlarini o'zimga singdirishga intilyapman. Ular kabi o'ynash uchun hali ancha ter to'kishim kerak. - «Bunyodkor» tarkibidagi dast­labki o'yiningiz va birinchi golingiz esingizdami? Davomi IFF.uz saytida.
— deya xabar beradi uff.uz nashri.