Gazetamizning avvalgi sonlarida o'zbek futbolidagi mashhurlarning asosiy kasblaridan tashqari nimalarga qiziqishlari, ularning fe'l-atvori-yu xislatlari bilan sizlarni yaqindan tanishtirishni boshlagan edik. Ushbu mavzuni davom ettirish maqsadida sahifamizning navbatdagi qahramoni - taniqli mutaxassis, FIFA va OFK yo'riqchisi Islom Ahmedovni suhbatga tortdik. - Islom aka, futbolni kasb sifatida tanlashingizga kim yoki qanday voqea sababchi bo'lgan? - Hech kim mening majburan futbolchi bo'lishimni istamagan. Qishloqda tug'ilib, voyaga etganman. Tabiiyki, uy ishlari juda ham ko'p bo'lgan. Shu bois, ishtiyoq bilan to'p surish imkoniyati yo'q edi. Duch kelgan joyda o'ynayverardik. Bu insoniy tuyg'ularga o'xshaydi: aksariyat holatlarda kishi nima uchun sevib qolganligini bilmaydi. Men ham nega millionlar o'yiniga mehr qo'yganimni bilmayman. Bolalikda futbolga nisbatan paydo bo'lgan muhabbat haligacha saqlanib qolgan. - O'yinchilik faoliyatingizdan ko'nglingiz to'lganmi? - O'z imkoniyatimni to'liq namoyon qilolmaganman. Lekin umumiy olganda, futbolchilik faloliyatimdan qoniqqanman. - Qaysi ustozlaringizni ko'p eslaysiz? Eng qadrli murabbiyingiz kim va nima uchun? - Otam 12 yoshga to'lganimda hozirgi Respublika olimpiya zaxiralari kollejiga o'qishga bergan. U erda Mannon Alimov va Vladimir Yatchenko menga ustozlik qilishgan, millionlar o'yinining ilk sir-asrorlarini o'rgatishgan. Ta'bir joiz bo'lsa, futboldagi poydevorimni o'shalar qo'yishgan. Mazkur sport maktabini tamomlaganimdan so'ng, Evgeniy Kazakov qo'l ostida to'p surganman. O'sha kezlari O'zbekiston o'smirlar termasi bosh murabbiyi hisoblangan ushbu mutaxassis keyinchalik yoshlar jamoasini shug'ullantirgan. Talabalik yillarimdan to shu kungacha Rustam Akramovdan saboq olyapman. Bu insondan futboldan tashqari hayotda ham ko'p narsa o'rgandim. - Futbol bo'lmaganida, kasb sifatida qaysi sohani tanlardingiz? - O'zimni boshqa sport turida tasavvur qila olmayman. - Millionlar o'yinida erishgan eng katta muvaffaqiyatingiz? - Juda ko'p yutuqlarni qo'lga kiritdim. Ammo o'ylashimcha, eng ulkan muvaffaqiyatlar hali oldinda kutib turibdi. - Sizni hayratga solgan gol va o'yin? Davomi interfutbol.uz saytida
— deya xabar beradi uff.uz nashri.